English-Français
ជាតិ
សង្គមជាតិ
កូនខ្មែរអាយុ៨ឆ្នាំ«បង្រៀនភាសាអង់គ្លេស»គួរឲ្យចាប់អារម្មណ៍
× ភ្នំពេញ៖ ចេះភាសាអង់គ្លេសមិនសូវចម្លែកមែននៅសម័យបច្ចុប្បន្ននេះ។ ប៉ុន្តែ ក៏មិនមានន័យថា គ្រប់មនុស្សទាំងអស់អាចចេះនិយាយ និងប្រើប្រាស់ភាសាអង់គ្លេសបានល្អដែរ។ កុមារី យិន សុវណ្ណាវិណ ទើបមានអាយុ៨ឆ្នាំនៅឆ្នាំ២០១៦នេះ រៀនថ្នាក់ទី២នៅសាលាអន្តរជាតិ CIA អាចនិយាយភាសាអង់គ្លេសបានល្អគួរសម។ ចេះនិយយាភាសាអង់គ្លេសមិនចម្លែកមែន ពីព្រោះ កុមារី តូចច្រឡឹងរូបនេះ រៀននៅសាលាអន្តរជាតិជាភាសាអង់គ្លេស។ តែអ្វីដែលគួរឲ្យកោតសរសើរនោះ គឺកុមារីមានទេពកោសល្យផ្នែកបង្រៀនដ៏ប៉ិនប្រសព្វ ហើយកុមារីរូបនេះ មានឆន្ទៈចង់ក្លាយខ្លួនជាគ្រូបង្រៀនភាសាអង់គ្លេសនៅថ្ងៃអនាគត។
«តើឯងចង់ធ្វើអ្វីនៅថ្ងៃអនាគត»។ នេះ គឺជាសំណួររបស់អ្នកកាសែតសួរទៅកាន់កុមារីជាភាសាអង់គ្លេស។ ឆ្លើយជាភាសាអង់គ្លេសមកវិញភ្លាមថា ខ្លួនគេចង់ក្លាយខ្លួនទៅជាគ្រូបង្រៀនជាភាសាអង់គ្លេសនាថ្ងៃអនាគត។ កុមារីមិនបានផ្តល់ហេតុផលច្រើនទេ តែកុមារីរូបនេះ បន្តប្រាប់ទៀតថា ខ្លួនគេបានថតការបង្រៀនរបស់គេជាភាសាអង់គ្លេស ហើយបង្ហោះនៅលើ YouTube។
ក្រោយពីនិយាយរួចហើយ កុមារី សុវណ្ណាវិណ ទាញទូសព្ទរបស់គេចេញមក ហើយវាយចូល YouTube ដើម្បីបង្ហាញវីដេអូដែលខ្លួនគេដើរតួជាគ្រូបង្រៀនភាសាអង់គ្លេស។ បន្ទាប់ពីមើលហើយ គេអាចសន្និដ្ឋានបានថា កុមារីរូបនេះ ពិតជា មានទេពកោសល្យបង្រៀនល្អមែន។ ការបង្រៀននេះ គ្មានការណែនាំពីនរណាឡើយ ពោល គឺកុមារីនេះ មានបំណងចង់ធ្វើដោយខ្លួនឯង។ កុមារី បានប្រាប់ថា ខ្លួនគេលួចមើលការបង្រៀនរបស់គ្រូនៅសាលា ហើយរូបគេ ក៏ធ្វើត្រាប់តាមតែម្តងទៅ។ លោក យិន សុប៊ុណ្ណា ដែលត្រូវជាឪពុក និងជាសាស្ត្រាចារ្យផងនោះ បាននិយាយប្រាប់សារព័ត៌មានថ្មីៗថា កូនស្រីរបស់លោកមាន«ដុង»បង្រៀនពីកំណើតមកម្ល៉េះ។ លោក ប៊ុណ្ណា បានបន្តទៀតថា៖«វាចូលចិត្តបង្រៀន វាចង់តែបង្រៀន។ វាបង្រៀនប្អូនវារាល់ថ្ងៃ»។ មិនត្រឹមតែប៉ុណ្ណោះ សុវណ្ណាវិណ ចូលចិត្តមើលសៀវភៅ និងសរសេរអត្ថបទផងដែរ។
រៀងរាល់ថ្ងៃសៅរ៍ និងថ្ងៃអាទិត្យ សុវណ្ណាវិណ ត្រូវបានឪពុកតម្រូវឲ្យសរសេរអត្ថបទជាភាសាខ្មែរ និងអង់គ្លេសចំនួន៣០០ពាក្យក្នុងអត្ថបទនីមួយៗ។ នេះ គឺជារបៀបបង្ហាត់បង្រៀនរបស់លោក ប៊ុណ្ណា ទៅកាន់កូនទាំងបីរបស់គាត់។ លោក ប៊ុណ្ណា បានកោតសរសើរកូនស្រីរបស់លោកថា ពិន្ទុរបស់ សុវណ្ណាវិណ មិនដែលតិចជាង៩ទេ ហើយកុមារីរូបនេះ ទទួលបានចំណាត់ថ្នាក់លេខ១ ២ ឬលេខ៣ ជារៀងរាល់ខែ។ សុវណ្ណាវិណ ពូកែទាំងខ្មែរ និងភាសាអង់គ្លេស។ នៅចុងខែឧសភានេះ កុមារី សុវណ្ណាវិណ នឹងចូលរួមការប្រឡងប្រជែងសិស្សពូកែផ្នែកគណិតវិទ្យាបន្ថែមទៀត។
កុមារី សុវណ្ណាវិណ គឺជាកូនស្រីទី២ របស់អ្នកស្រី អ៊ឹង សុវណ្ណលី ជាគ្រូបង្រៀន EM និងលោក យិន សុប៊ុណ្ណា ជាគ្រូបង្រៀនសាលាគរុកោសល្យនៅក្រុងតាខ្មៅខេត្តកណ្តាល។ ទាំងឪពុក និងម្តាយមិនសូវចេះភាសាអង់គ្លេសទេ តែ កុមារី សុវណ្ណាវិណ ហាក់មានទេពកោសល្យពិសេសចំពោះភាសាបរទេសមួយនេះ៕ បញ្ជាក់៖ You Tube នេះថតកាលពី១ឆ្នាំមុន៕
© រក្សាសិទ្ធិដោយ thmeythmey.com