English-Français
ជាតិ
សង្គមជាតិ
សត្វឆ្កែ និងឆ្មា ត្រូវការម៉ាស្សា សម្អាតត្រចៀក កាត់ក្រចក…ដើម្បីកម្ចាត់ស្ត្រេសចេញដូចមនុស្សដែរ
× ភ្នំពេញ៖ សេវាកម្មថែទាំសត្វឆ្កែ និងឆ្មាមួយកន្លែងត្រូវបានបង្កើតឡើងនៅក្នុងរាជធានីភ្នំពេញម្តុំទួលគោករាជធានីភ្នំពេញ ដោយជនជាតិឥណ្ឌាដែលមានបទពិសោធន៍យូរឆ្នាំនៅក្នុងជំនួញនេះ។ អ្នកស្រី Donabelle Zuzart, ជនជាតិឥណ្ឌា, ដែលមានជំនាញខាងថែទាំសត្វឆ្កែ និងឆ្មាតាំងពីនៅតូច បានសម្រេចចិត្តបើកជំនួញប្រភេទនេះនៅក្នុងប្រទេសកម្ពុជា។ ជាជំនួញមួយដែលជនជាតិខ្មែរភាគច្រើនមិនហ៊ានបោះទុនទេ តែអ្នកស្រីអាចធ្វើឲ្យជំនួញមួយនេះឲ្យដំណើរការដោយជោគជ័យគ្រាន់បើនៅពេលនេះ។
សូមអញ្ជើញស្តាប់បទសម្ភាសន៍ជាភាសាអង់គ្លេសរវាងលោក គី សុខលីម អគ្គនាយកសារព័ត៌មានថ្មីៗ និងអ្នកស្រី Donabelle Zuzart នាយកគ្រប់គ្រងសេវាកម្ម Pet Grooming Cambodia ដូចតទៅ៖
ក្នុងមួយថ្ងៃៗ អ្នកស្រី Donabelle Zuzart អាចទទួលបានអតិថិជនដែលមានឆ្កែ ឬឆ្មាចំនួន៤នាក់ជាមធ្យមក្នុងមួយថ្ងៃ។ សេវាថែទាំអាចមានតម្លៃប្រែប្រួលពីក្រោម១០ដុល្លារ រហូតដល់ជាង៥០ដុល្លារអាមេរិកអាស្រ័យទៅលើតម្រូវការសេវាកម្មពីអតិថិជនតិចឬក៏ច្រើន មានន័យថា តើអតិថិជនត្រូវការតែម៉ាស្សាមួយ ឬត្រូវការសេវាច្រើនបន្ថែមទៀត ដូចជា កាត់ក្រចក សម្អាតត្រចៀក ដុះធ្មេញ។ល។
វាជារឿងចម្លែកបន្តិចនៅកម្ពុជាដែលក្រុមហ៊ុនមួយផ្តល់សេវាកម្ម កាត់ក្រចក ដុះធ្មេញ ម៉ាស្សា ងូតទឹក ឲ្យសត្វឆ្កែ ឬឆ្មា។ តែសម្រាប់នៅបរទេសវិញ នេះ គឺជាជំនួញមួយដែលអាចរកប្រាក់ចំណូលបានច្រើនគួរសម។
អ្នកស្រី Donabelle Zuzart មិនមែនជាគ្រូពេទ្យសត្វទេ។ តែអ្នកស្រី គឺជាអ្នកជំនាញថែទាំសត្វ បង្រៀនសត្វឲ្យចេះយោគយល់គ្នា ឬរស់នៅជាមួយគ្នាបាន។ ប្រសិនបើមានឆ្កែ ឬឆ្មា ឈឺ អ្នកស្រីត្រូវណែនាំម្ចាស់ឲ្យបញ្ជូនទៅកាន់គ្លីនិកជំនាញសត្វដើម្បីព្យាបាល។
សត្វ ក៏ដូចមនុស្សដែរ។ មនុស្សកើតស្ត្រេស សត្វក៏មានស្ត្រេសដូចមនុស្សដែរ។ អ្នកស្រី Donabelle Zuzart បាននិយាយថា៖«ឆ្កែត្រូវការសម្អាត ត្រូវការម៉ាស្សា ដូចមនុស្សដែរ។ ពេលសម្អាត ឬម៉ាស្សារួចហើយ ពួកវាមានអារម្មណ៍សប្បាយដូចមនុស្សដែរ»។ អ្នកស្រីបានបន្តទៀតថា មនុស្សពេលមានអារម្មណ៍មួរម៉ៅ ឬធុញទ្រាន់ ពួកគេត្រូវការម៉ាស្សា ចំណែកឯឆ្កែវិញ ពួកវាក៏ត្រូវការម៉ាស្សាដែរ។
អ្នកស្រី Donabelle Zuzart កត់សម្គាល់ថា ពលរដ្ឋខ្មែរមិនមែនមិនខ្វល់នឹងការថែទាំងឆ្កែ ឬឆ្មាទេ។ តែពួកគេនៅខ្វះការយល់ដឹងក្នុងរឿងនេះ។ ចំពោះបញ្ហានេះ អ្នកស្រីគ្រាន់តែចង់រម្លឹកថា សត្វត្រូវការដូចមនុស្សដែរ។ សម្រាប់អ្នកស្រី Donabelle Zuzart សត្វឆ្កែ ជាសត្វដែលមានភក្តីភាពចំពោះម្ចាស់ និងគោរពម្ចាស់វាណាស់៕
© រក្សាសិទ្ធិដោយ thmeythmey.com