លោក ហ៊ុន ម៉ាណែត នឹងចូលរួមរត់ប្រណាំងភ្នំពេញពាក់កណ្តាលម៉ារ៉ាតុងអន្តរជាតិ

កីឡាជាតិ

ជាតិ

លោក ហ៊ុន ម៉ាណែត នឹងចូលរួមរត់ប្រណាំងភ្នំពេញពាក់កណ្តាលម៉ារ៉ាតុងអន្តរជាតិ

24, May 2016 , 8:19 am

រូបភាព

ដោយ:

លោកឧត្តមសេនីយ៍ឯក ហ៊ុន ម៉ាណែត មេបញ្ជាការរងកងទ័ពជើងគោក នឹងចូលរួមប្រកួតរត់ប្រណាំងភ្នំពេញពាក់កណ្តាលម៉ារ៉ាតុងអន្តរជាតិលើកទី៦ ដែលរៀបចំដោយគណៈកម្មាធិការជាតិអូឡាំពិកកម្ពុជា(NOCC) នាថ្ងៃទី១២ ខែមិថុនា ឆ្នាំ២០១៦ នៅរាជធានីភ្នំពេញ។ ការរត់ប្រណាំងពាក់កណ្តាលម៉ារ៉ាតុងអន្តរជាតិនេះ ធ្វើឡើងក្នុងគោលបំណងធំៗចំនួន៣ ទី១.ដើម្បីអបអរថ្ងៃបុណ្យចម្រើនព្រះជន្មសម្តេចមហាក្សត្រី នរោត្តម មុន្នីនាថ, ទី២.ដើម្បីអបអរខួបលើកទី១២២ នៃថ្ងៃបង្កើតរបស់អូឡាំពិក និងទី៣.ដើម្បីស្វែងរកថវិកាជួយដល់មន្ទីរពេទ្រគន្ធបុប្ផា។

លោកឧត្តមសេនីយ៍ឯក ហ៊ុន ម៉ាណែត មេបញ្ជាការរងកងទ័ពជើងគោក និងជានាយរងសេនាធិការចម្រុះនៃកងយោធពលខេមរភូមិន្ទ ព្រមទាំងក្រុមរបស់លោក នឹងចូលរួមរត់ប្រណាំងក្នុងព្រឹត្តិការណ៍ភ្នំពេញពាក់កណ្តាលម៉ារ៉ាតុង អន្តរជាតិលើកទី៦ ដែលជាទិវាមហាជន ដើម្បីមនុស្សធម៌ នាថ្ងៃទី១២ ខែមិថុនា ខាងមុខនេះ។ ហើយសម្រាប់ការចូលរួមនេះដែរ លោក ហ៊ុន ម៉ាណែត ក្រុមរបស់លោកនឹងប្រកួតក្នុងរយៈចម្ងាយ ១០គីឡូម៉ែត្រ។

លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជានាពិធីសន្និសីទសារព័ត៌មាននៅទីស្នាក់ការ NOCC កាលពីព្រឹកមិញរៀបរាប់ដូច្នេះថា៖«ការរត់របស់យើងឆ្នាំនេះគឺមានការចុះឈ្មោះរត់ជាក្រុមច្រើន ប៉ុន្តែក្រុមមួយដែលពិសេសនោះ គឺក្រុមរបស់ឯកឧត្តម ហ៊ុន ម៉ាណែត ដោយគាត់នឹងរត់ ១០គីឡូម៉ែត្រ។ ហើយនៅពេលគាត់រត់១០គីឡូម៉ែត្រ ដូច្នេះកូនទាហ៊ានរបស់គាត់ក៏រត់១០គីឡូម៉ែត្រដែរ»។

ព្រឹត្តិការណ៍រត់ប្រណាំងភ្នំពេញពាក់កណ្តាលម៉ារ៉ាតុងនេះ ធ្វើឡើងក្នុងគោលបំណងធំៗ៣ គឹដើម្បីអបអរសាទរថ្ងៃបុណ្យចម្រើនព្រះជន្មសម្តេមហាក្សត្រី រោត្តម មុន្នីនាថ និងដើម្បីអបអរសាទរខួបលើកទី១២២នៃថ្ងៃបង្កើតអូឡាំពិក ព្រមទាំងដើម្បីមនុស្សធម៌ស្វែងរកថវិកាជួយមុន្នីពេទ្រគុន្ធបុប្ផា។ មិនត្រឹមតែប៉ុណ្ណោះព្រឹត្តិការណ៍លក្ខណៈមហាជនមួយនេះធ្វើឡើងដើម្បីទីក្រុងស្អាត និងទីក្រុងបៃតងថែមទៀតផង។

លោកអគ្គលេខាធិការរូបនេះបានបញ្ជាក់ថា ព្រឹត្តិការណ៍រត់ប្រណាំងភ្នំពេញពាក់កណ្តាល់ម៉ារ៉ាតុងអន្តរជាតិ នេះ មិនមែនធ្វើឡើងដើម្បីស្វែងរកប្រាក់កម្រៃ និងប្រាក់ចំណេញនោះទេ គឺដើម្បីមនុស្សធម៌ និងសង្គម ពោលគឺថវិកាដែលនៅសល់ពីការរៀបចំនឹងប្រគល់ជូនមន្ទីរពេទ្យគន្ធបុប្ផាទាំងអស់។ ហើយលោកសង្ឃឹមថា ឆ្នាំនេះគណៈកម្មាធិការជាតិអូឡាំពិកនឹងទទួលបានថវិកាជាង១ម៉ឺនដុល្លារ ដើម្បីប្រគល់ជូនមន្ទីរពេទ្យគន្ធបុប្ផា ព្រោះឆ្នាំមុនថវិកានៅសល់៥ពាន់ដុល្លារ ហើយថវិកានេះនឹងប្រគល់ជូនឆ្នាំនេះ។

លោកបានបញ្ជាក់ទៀតថា សម្រាប់កីឡាករកីឡាការិនីដែលបានចុះឈ្មោះរួចត្រូវទៅយកអាវ និងលេខសំគាល់នៅថ្ងៃទី៩ ដល់ទី១១ ខែមិថុនា នៅមុខព្រះបរមរាជវាំង ហើយកីឡាករកីឡាការិនីដែលមិនទាន់បានចុះឈ្មោះចូលរួមប្រកួតអាចមកចុះឈ្មោះចុងក្រោយនៅមុខព្រះបរមរាជវាំង ចាប់ពីថ្ងៃទី៦ ដល់ថ្ងៃទី១១ ខែមុថុនា៕