ជាតិ
សេដ្ឋកិច្ច
រដ្ឋបាលជលផល ប្រកាសផ្តល់ជំនួយបច្ចេកទេសសម្រាប់ការចិញ្ចឹមត្រីឆ្ដោ
× ភ្នំពេញ៖ រាជរដ្ឋាភិបាល នាពេលថ្មីៗនេះ បានសម្រេចអនុញ្ញាតជាផ្លូវការឲ្យពលរដ្ឋចិញ្ចឹមត្រីឆ្ដោ និងត្រីរ៉ស់ឡើងវិញ។ ជាមួយគ្នានេះដែរ អគ្គនាយកដ្ឋានរដ្ឋបាលជលផល នៅថ្ងៃទី២៤ខែឧសភា ប្រកាសផ្តល់បច្ចេកទេសចិញ្ចឹមត្រីឆ្តោ ដែលជាការលើកទឹកចិត្តឲ្យពលរដ្ឋប្រកមុខរបរមួយនេះ។
រដ្ឋបាលជលផល នឹងជួយបង្រៀនពីរបៀបចិញ្ចឹមត្រីឆ្ដោ ដូចជាវិធីភ្ញាស់កូនត្រី និងថែទាំ ដល់ពលរដ្ឋ តាមរយៈការបើកវគ្គបណ្តុះបណ្ដាល និងសិក្ខាសាលា។ នេះបើតាមលោក ឡេង សុវណ្ណ មន្ត្រីរដ្ឋបាលជលផល ក្រសួងកសិកម្ម រុក្ខាប្រមាញ់និងនេសាទ ដែលត្រូវដកស្រង់សំដីដោយទីភ្នាក់ងារព័ត៌មានជាតិកម្ពុជា AKP នៅថ្ងៃទី២៤ខែឧសភា។ មន្ត្រីរូបនេះបន្ថែមទៀតថា ក្រសួងកសិកម្ម កំពុងពិចារណាលើគម្រោងផលិតចំណីសិប្បនិមិត្ត ឬចំណីគ្រាប់ផ្សំពីធម្មជាតិ ដើម្បីយកចំណីទាំងនេះជំនួសឲ្យការយកកូនត្រីឲ្យត្រីឆ្ដោស៊ី ដែលនាំឲ្យចំណាយថវិកាច្រើននោះ។
លោក ឡេង សុវណ្ណ ឲ្យដឹងទៀតថា បច្ចុប្បន្ននេះ មានប្រជាពលរដ្ឋប្រមាណ៤០ភាគរយ បានផ្លាស់ប្តូរទម្លាប់ពីការនេសាទតាមបែបធម្មជាតិ មកធ្វើវារីវប្បកម្មចិញ្ចឹមត្រីរ៉ស់ ត្រីឆ្ពិន ត្រីប្រា និងបង្គា បង្កង ដើម្បីផ្គត់ផ្គង់តម្រូវការទីផ្សារ។
តាមរបាយការណ៍ ការចិញ្ចឹមត្រីជាលក្ខណៈគ្រួសារ និងពាណិជ្ជកម្ម នៅទូទាំងប្រទេស បានកើនឡើងដល់ប្រមាណ៦ ម៉ឺនគ្រួសារ។ ដោយឡែកទិន្នផលត្រីចិញ្ចឹមទឹកសាបប្រចាំឆ្នាំសរុបមានប្រមាណ១២ម៉ឺនតោន ប៉ុន្តែចំនួននេះនៅមិនទាន់អាចផ្គត់ផ្គង់តម្រូវការបាននៅឡើយ៕
Tag:
ឡេង សុវណ្ណ
ត្រីឆ្ដោ
© រក្សាសិទ្ធិដោយ thmeythmey.com