អន្តរជាតិ
ក្រុមប្រទេស៧ ឯកភាពគ្នាបន្តទណ្ឌកម្មប្រឆាំងរុស្ស៊ី តែរុស្ស៊ីថាខ្លួនមិនខ្វល់
× ក្នុងកិច្ចប្រជុំក្រុមប្រទេស ៧ ព្រោះគ្មានវត្តមានរុស្ស៊ី ដែលរៀបចំឡើងនៅជប៉ុននោះ នាយករដ្ឋមន្ត្រីអង់គ្លេសលោក ដេវីដ ខេមេរ៉ូន បានអះអាងថា សមាជិកទាំងអស់ឯកភាពគ្នាថានឹងបន្តទណ្ឌកម្មប្រឆាំងរុស្ស៊ីចាប់ពីខែមិថុនាខាងមុខ។ ការបន្តទណ្ឌកម្មនេះគឺដើម្បីដាក់សម្ពាធឲ្យរុស្ស៊ីអនុវត្តតាមកិច្ចព្រមព្រៀងសន្តិភាពទីក្រុង Minsk ឆ្នាំ ២០១៥ ឲ្យបានពេញលេញ។
ថ្ងៃសុក្រទី ២៧ ឧសភា ម្សិលមិញ ដែលជាថ្ងៃទី២នៃកិច្ចប្រជុំកំពូលប្រទេស ៧ នៅប្រទេសជប៉ុន ប្រមុខរដ្ឋាភិបាលអង់គ្លេសលោក ដេវីដ ខេមេរ៉ូន បានលើកឡើងបណ្តាសមាជិកក្រុមប្រទេស ៧ បានឯកភាពគ្នារួចរាល់ហើយថានឹងបន្តទណ្ឌកម្មរុស្ស៊ីចាប់ពីខែមិថុនាខាងមុខ។ ប៉ុន្តែរុស្ស៊ីបានឆ្លើយតបវិញថា ខ្លួនមិនខ្វល់ខ្វាយឡើយ ហើយក៏គ្មានចេតនាជជែកពិភាក្សាជាមួយលោកខាងលិចដើម្បីស្នើសុំឲ្យមានការដកទណ្ឌកម្មដែរ។
ការបន្តដាក់ទណ្ឌកម្មប្រឆាំងរុស្ស៊ីនេះត្រូវបានបណ្តាមេដឹកនាំក្រុមប្រទេស ៧នេះពន្យល់ថាជាការដាក់គំនៀបឲ្យរុស្ស៊ីអនុវត្តកិច្ចព្រមព្រៀងសន្តិភាពក្រុង Minsk ដែលចូលជាធរមានតាំងពីពាក់កណ្តាលខែកុម្ភៈឆ្នាំមុនឲ្យបានពេញលេញ។
លោកថា៖« ក្រុមប្រទេស៧បានឯកភាពគ្នានិងយល់ពីសារសំខាន់នៃការបន្តទណ្ឌកម្មនៅក្នុងខែមិថុនា។ អ៊ុយក្រែនជាជនរងគ្រោះនៃសកម្មភាពឈ្លានពានរបស់រុស្ស៊ី។ យើងមិនត្រូវបំភ្លេចចោលការពិតឡើយ។ ហើយក្រុមប្រទេស ៧ ក៏ច្បាស់ក្នុងចិត្តហើយថាទណ្ឌកម្មត្រូវនៅរហូតដល់កិច្ចព្រមព្រៀង Minsk ត្រូវបានគេអនុវត្តពេញលេញ។ ខ្ញុំគិតថាវាជាការសម្រេចចិត្តដ៏សំខាន់បំផុតមួយ»។
ក្រៅពីនេះ ក្រុមប្រទេស ៧នេះនៅតែមានជំនឿថា ជម្លោះអ៊ុយក្រែនត្រូវតែដោះស្រាយដោយសន្តិវិធី ជាពិសេសតាមផ្លូវការទូត និងមានការគោរពច្បាប់អន្តរជាតិ ជាពិសេសគោរពអធិបតេយ្យ បូរណភាពដែនដីរបស់អ៊ុយក្រែនពេញលេញ។ ហើយក្រុមប្រទេសទាំងអស់នេះបន្តដាក់សម្ពាធលើរុស្ស៊ី ដើម្បីឲ្យរុស្ស៊ីដកដៃចេញពីជម្លោះអ៊ុយក្រែននិងប្រគលទឹកដី Crimea ត្រលប់មកវិញផងដែរ។
យ៉ាងណាក៏ដោយ ភាគីរុស្ស៊ីបានអះអាងថា ខ្លួនមិនបានគិតគូរជជែកពិភាក្សាជាមួយបណ្តាប្រទេសលោកខាងលិចឡើយ។ មួយថ្ងៃមុនការឯកភាពគ្នាបន្តទណ្ឌប្រឆាំងរុស្ស៊ី រដ្ឋមន្ត្រីការបរទេសរុស្ស៊ីលោក Sergei Lavrov បានថ្លែងថា រដ្ឋាភិបាលរុស្ស៊ីមិនបានគិតថានិងមានបំណងជជែកជាមួយមិត្តនៅលោកខាងលិចអំពីលក្ខខណ្ឌនានាដែលនាំឲ្យមានការដកទណ្ឌកម្មឡើយ។ នេះមានន័យថា រុស្ស៊ីមិនខ្វល់ខ្វាយពីអ្វីដែលលោកខាងលិចទាំងនោះកំពុងធ្វើឡើយ ទោះជាដកឬមិនដកក៏រុស្ស៊ីមិនយកចិត្តទុកដាក់ដែរ។
ជារឿយៗចាប់តាំងពីវិបត្តិអ៊ុយក្រែនផ្ទុះឡើយ រុស្ស៊ីតែងតែទាត់ចោលការចោទប្រកាន់ថាខ្លួនឈ្លានពានអ៊ុយក្រែននិងដណ្តើមយកទឹកដី Crimea ពីអ៊ុយក្រែន។ ហើយរុស្ស៊ីក៏ព្រមានលោកខាងលិចវិញផងដែរអំពីការដាក់ទណ្ឌកម្មប្រឆាំងខ្លួន ដោយអះអាងថា ទណ្ឌកម្មនេះនឹងមិនមានប្រសិទ្ធភាពឡើយ ហើយវាផ្តល់ផលផ្ទុយពីការចង់បានទៅវិញដែរ៕
Tag:
រុស្ស៊ី
អង់គ្លេស
G7
© រក្សាសិទ្ធិដោយ thmeythmey.com