អន្តរជាតិ
ជប៉ុន សន្យាគាំទ្រឡាវដើម្បីសម្រេចកិច្ចប្រជុំអាស៊ានប្រកបដោយផ្លែផ្កា នាយករដ្ឋមន្ត្រីឡាវ(ខាងឆ្វេង) និងនាយករដ្ឋមន្ត្រីជប៉ុនខាងស្តាំ (រូបភាព Japan Times)
× លោកនាយករដ្ឋមន្ត្រីជប៉ុន ស៊ីនហ្សូ អាបេ នឹងបំពេញទស្សនកិច្ចទៅកាន់សាធារណរដ្ឋប្រជាធិបតេយ្យប្រជាមានិតឡាវដើម្បីចូលរួមកិច្ចប្រជុំកំពូលនៃសមាគមន៍ប្រជាជាតិអាស៊ីអាគ្នេយ៍ដែលហៅកាត់ថា អាស៊ាននោះ។ លោក អាបេ សន្យា នឹងខិតខំជួយជំរុញកិច្ចប្រជុំ និងតួនាទីរបស់ឡាវដែលជាប្រធាននៃ កិច្ចប្រជុំឲ្យដំណើរការរលូន។
នាយករដ្ឋមន្ត្រីជប៉ុន លោក ស៊ិនហ្សូ អាប៉េ បានអះអាងថា លោក នឹងបំពេញទស្សនកិច្ចផ្លូវការនៅខែកញ្ញាដើម្បីចូលរួមកិច្ចប្រជុំពាក់ព័ន្ធរបស់អាស៊ាន។ លោក ក៏បានបញ្ជាក់ថា នឹងពង្រីកការអភិវឌ្ឍទំនាក់ ទំនងទ្វេភាគីរវាងជប៉ុន និងឡាវផងដែរ។ នេះបើយោងតាមសារព័ត៌មាន Japan Times ។
ការលើកឡើងនេះ ធ្វើឡើងនាឱកាសនៃជំនួបរវាងលោកនាយករដ្ឋមន្ត្រីស៊ីនហ្សូ អាបេ និង លោកនាយករដ្ឋមន្ត្រីថ្មីឡាវ Thongloun Sisoulith នៅក្នុងក្រុង Nagoya នៃប្រទេសជប៉ុន ក្នុងពេលដែលលោក Thongloun Sisoulith ទៅចូលរួមកិច្ចប្រជុំដែលរៀបចំដោយប្រទេសក្រុម G7។
នាជំនួបនោះដែរ លោក អាបេ បានអះអាងថាជប៉ុន នឹងជួយឡាវពេញទំហឹងដើម្បីសម្រេចកិច្ចប្រជុំពាក់ព័ន្ធរបស់អាស៊ានឲ្យបានជោគជ័យដែលនឹងប្រារព្ធឡើងនៅខែកញ្ញាខាងមុខ។ នេះបើយោងតាម ការអះអាងរបស់ Hiroshige Seko មន្ត្រីជាន់ខ្ពស់រដ្ឋាភិបាលជប៉ុន ដែលបានសង្ខេបបា្រប់អ្នកសារព័ត៌មានក្រោយកិច្ចប្រជុំនោះ។
មន្ត្រីជាន់ខ្ពស់រូបនោះ ក៏បានបន្ថែមដែរថា «ការអភិវឌ្ឍរបស់ឡាវ នឹងផ្តល់ប្រយោជន៍ដល់អាស៊ាន ហើយការអភិវឌ្ឍរបស់អាស៊ាន នឹងផ្តល់ប្រយោជន៍ដល់ជប៉ុនផងដែរ»។ ជប៉ុន នឹងគាំទ្រឡាវតាមដែល អាចធ្វើទៅបាន ដើម្បីឲ្យកិច្ចប្រជុំពាក់ព័ន្ធកំពូលរបស់អាស៊ានសម្រេចបានជាលទ្ធផលផ្លែផ្កា។
ជាពិសេសនោះ លោក អាបេ ក៏បានបង្ហាញការសង្ឃឹមថា ការដឹកនាំរបស់លោក Thongloun នឹងជំរុញ ឲ្យអាស៊ានអាចមានសំឡេងតែមួយលើបញ្ហាក្នុងតំបន់ ដែលមានបញ្ហានៃការបន្តវាតទីរបស់ចិននៅក្នុង សមុទ្រចិនខាងត្បូងជាដើម។
សូមបញ្ជាក់ផងដែរថា ឆ្នាំ២០១៦នេះ ឡាវ ត្រូវធ្វើជាប្រធានវិលជុំបន្ទាប់ពីម៉ាឡេស៊ី ។ នេះ គឺជាលើកទី២ហើយក្នុងការធ្វើជាប្រធានអាស៊ានក្រោយទទួលបានសមាជិកភាពតាំងពីឆ្នាំ១៩៩៧។ ដូចបានកំណត់ក្នុងមាត្រា៣១នៃ ធម្មនុញ្ញអាស៊ាន រដ្ឋដែលត្រូវធ្វើជាប្រធានអាស៊ានត្រូវមានការទទួលខុសត្រូវច្រើនជាពិសេសសម្រាប់ កិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធដែលរាប់បញ្ចូលទាំងកិច្ចប្រជុំអាស៊ីបូព៌ាដែលមានវត្តមានអាមេរិក និងចិនជាមួយគ្នាផងដែរនោះ។ បញ្ហាសមុទ្រចិន ត្រូវបានគេរំពឹងថា នឹងក្លាយជាប្រធានក្តៅជាថ្មីក្នុងកិច្ចប្រជុំកំពូលអាស៊ានលើកនេះ។
ជុំវិញបញ្ហាសមុទ្រចិនខាងត្បូងនេះដែរ លោកនាយករដ្ឋមន្ត្រីឡាវ Thongloun Sisoulith បានអះអាងរួចហើយថា ឡាវ បង្កើតបរិយាកាសមួយដ៏ល្អសម្រាប់ភាគីពាក់ព័ន្ធដើម្បីដោះស្រាយបញ្ហាសមុទ្រចិនខាង ត្បូងប្រកបដោយផ្លែផ្កា៕
Tag:
ជប៉ុន
សមុទ្រចិនខាងត្បូង
ជប៉ុន
© រក្សាសិទ្ធិដោយ thmeythmey.com