អន្តរជាតិ
ជប៉ុន ៖ ក្មេងប្រុសម្នាក់បាត់ខ្លួន បន្ទាប់ពីឪពុកម្តាយដាក់ទោសដោយទុកចោលនៅក្នុងព្រៃ រូបថតក្រុមអ្នកជួយសង្គ្រោះជប៉ុន
× ក្មេងប្រុសអាយុ ៧ ឆ្នាំម្នាក់បានបាត់ខ្លួននៅក្នុងព្រៃនៃកោះហុកកៃដូ ប្រទេសជប៉ុន តាំងពីព្រលប់ថ្ងៃសៅរ៍ បន្ទាប់ពីឪពុកម្តាយបញ្ជាឲ្យចុះចេញពីរថយន្ត ដើម្បីដាក់ទោសកូនដែលចចេសមិនស្តាប់បង្កាប់។
នៅថ្ងៃចន្ទនេះ ក្រុមអ្នកជួយសង្គ្រោះប្រមាណ ១៥០ នាក់បានបន្តការរុករកក្មេងនៅក្នុងព្រៃ។ ប៉ូលិសនៃកោះហុកកៃដូបាននិយាយថា ដំបូងឪពុកម្តាយរបស់ក្មេងបានរាយការណ៍ប្រាប់អាជ្ញាធរថា កូនប្រុសបាត់ខ្លួន នៅពេលដែលពួកគេកំពុងបេះបន្លែព្រៃ ប៉ុន្តែប៉ុន្មានម៉ោងក្រោយមក ពួកគេក៏សារភាពថា ពួកគេបានឈប់រថយន្ត រួចបញ្ជាឲ្យកូនចុះចេញពីរថយន្ត ហើយក៏បររថយន្តទៅបាត់ដើម្បីទុកជាការព្រមាន។ ប៉ុន្មាននាទីក្រោយមក ឪពុករបស់ក្មេងប្រុសបានបររថយន្តត្រឡប់មកកន្លែងដើមវិញ ប៉ុន្តែកូនបានបាត់ខ្លួនទៅហើយ។
ឪពុកម្តាយរបស់ក្មេងប្រុសរូបនេះចង់ដាក់ទោសកូនដែលបានលេងគប់ដុំថ្ម ពេលដែលពួកគេទៅលេងនៅស្ទឹងមួយ កាលពីព្រឹកថ្ងៃសៅរ៍កើតហេតុ នេះបើតាមបណ្តាញព័ត៌មានរបស់ជប៉ុន៕
ប្រភព៖ abcnews
© រក្សាសិទ្ធិដោយ thmeythmey.com