ជាតិ
នយោបាយជាតិ
តុលាការបង្គាប់ឲ្យឯកឧត្តម កឹម សុខា ចូលខ្លួនបំភ្លឺជាថ្មី
× ភ្នំពេញ៖ ចៅក្រមស៊ើបសួរ សាលាដំបូងរាជធានីភ្នំពេញ លោក ថាន់ ឡេង បានចេញដីកាបង្គាប់ឲ្យប្រធានស្តីទីគណបក្សសង្គ្រោះជាតិឯកឧត្តម កឹម សុខា ចូលខ្លួនបំភ្លឺនៅសាលាដំបូងរាជធានីភ្នំពេញ នៅថ្ងៃទី ១៤ មិថុនា ដើម្បីសាកសួរពីដំណើររឿងពីបទ «បដិសេធក្នុងការចូលខ្លួន» ក្នុងនាមជាសាក្សី។ នេះបើតាមដីការបង្គាប់ចៅក្រមស៊ើបសួរចុះថ្ងៃទី០២មិថុនា។
កាលពីថ្ងៃទី២៦ ឧសភា អយ្យការអមសាលាដំបូងរាជធានីភ្នំពេញ បានសម្រេចចោទប្រកាន់ឯកឧត្តម កឹម សុខា ពីបទ «បដិសេធក្នុងការចូលខ្លួន» ក្នុងនាមជាសាក្សីលើសំណុំរឿង សញ្ចារកម្ម តាមមាត្រា៥៣៨នៃក្រមព្រហ្មទណ្ឌ ដោយអយ្យការបញ្ជាក់ថា ជាបទល្មើសជាក់ស្តែង ។
ក្រោយមកសមាជិកសភាមកពីគណបក្សប្រជាជនកម្ពុជាទាំង៦៨រូប បានសម្រេចបានផ្តល់សិទ្ធិដល់សមត្ថកិច្ចក្នុងការធ្វើចំណាត់ការលើឯកឧត្តម កឹម សុខា ប្រធានស្តីទីគណបក្សសង្គ្រោះជាតិ ដែលត្រូវបានអយ្យការសាលាដំបូងរាជធានីភ្នំពេញ ចោទប្រកាន់ពីបទ «បដិសេធក្នុងការចូលខ្លួន» នេះ ខណៈអ្នកនាំពាក្យនៃក្រសួងយុត្តិធម៌ លោក គឹម សន្តិភាព អះអាងថា នីតិវិធីរបស់តុលាការលើករណីឯកឧត្តម កឹម សុខា ពេលនេះគឺត្រឹមត្រូវតាមច្បាប់។
សម្រាប់អ្នកច្បាប់រូបនេះ បើទោះជារដ្ឋសភាមិនប្រជុំនិយាយអំពីករណីឯកឧត្តម កឹម សុខា ក៏នីតិវិធីតុលាការនៅតែទៅមុខធម្មតា រហូតដល់ការជំនុំជម្រះ ហើយក្នុងករណីបទល្មើសជាក់ស្តែងនេះ អភ័យឯកសិទ្ធិសភារបស់ឯកឧត្តម កឹម សុខា មិនអាចរារាំងដំណើរការនីតិវិធីតុលាការឡើយ។
អ្នកច្បាប់និងមេធាវីគណបក្សសង្គ្រោះជាតិ យល់ឃើញថា នីតិវិធីតុលាការលើដំណើររឿងរបស់ឯកឧត្តម កឹម សុខា គឺមិនត្រឹមត្រូវនោះទេ ដោយផ្ទុយពីច្បាប់រដ្ឋធម្មនុញ្ញ មាត្រា ៨០ ស្តីពី អភ័យឯកសិទ្ធិតំណាងរាស្ត្រ។ ចំណែកគណបក្សសង្គ្រោះជាតិ ព្រមានថា បើសិនជាមានការចាប់ខ្លួនឯកឧត្តម កឹម សុខា មែននោះ បាតុកម្មអហិង្សាទ្រង់ទ្រាយធំពីសំណាក់ប្រជាពលរដ្ឋ នឹងកើតមានឡើងជាថ្មីទៀត។
© រក្សាសិទ្ធិដោយ thmeythmey.com