ជាតិ
នយោបាយជាតិ
ភ្ជុំបិណ្ឌឆ្នាំនេះ ឯកឧត្តម កឹម សុខា មិនបានទៅធ្វើបុណ្យនៅវត្តដូចប្រជាជនខ្មែរដទៃទៀតឡើយ
×
ប្រធានស្តីទីគណបក្សសង្គ្រោះជាតិ ដែលកំពុងតែឃុំខ្លួនឯងនៅក្នុងទីស្នាក់ការកណ្តាលគណបក្សនៅសង្កាត់ចាក់អង្រែលើ មិនបានទៅធ្វើបុណ្យនៅវត្តក្នុងឱកាសបុណ្យភ្ជុំបិណ្ឌនោះទេ។
ពិធីបុណ្យភ្ជុំបិណ្ឌឆ្នាំនេះ មិនដូចរាល់ឆ្នាំនោះឡើយសម្រាប់ឯកឧត្តម កឹម សុខា ប្រធានស្តីទីគណបក្សសង្គ្រោះជាតិ។ ខុសប្លែកពីរាល់ឆ្នាំ ដោយសារភ្ជុំបិណ្ឌឆ្នាំនេះ ឯកឧត្តម កឹម សុខា ស្នាក់នៅតែនៅក្នុងបក្ស មិនបានទៅធ្វើបុណ្យនៅឯវត្តអារាមនោះឡើយ។
តាមរយៈហ្វេសប៊ុករបស់ខ្លួនកាលពីថ្ងៃទី ២៦ ខែកញ្ញា ប្រធានស្តីទីគណបក្សសង្គ្រោះជាតិរូបនេះ បានសរសេរយ៉ាងនេះថា៖«ទោះបីរដូវភ្ជុំបិណ្ឌនេះ ខ្ញុំផ្ទាល់ខ្លួនមិនបានទៅវត្តអារាមក៏ដោយ ក៏ខ្ញុំបានជូនគ្រឿងបរិក្ខា និងបច្ច័យទៅម្តាយខ្ញុំ។ ថ្ងៃបិណ្ឌទី១០ ភរិយាខ្ញុំ និងកូនស្រីខ្ញុំទាំងពីរក៏បានទៅវត្តបង្សុកូលឧទិ្ទសកុសលជូនដល់បុព្វការីជនរបស់ខ្ញុំផងដែរ»។ អ្នកនយោបាយមកពីខេត្តតាកែវរូបនេះ បន្តដូច្នេះទៀតថា៖«ហើយថ្ងៃបិណ្ឌទី១១ ខ្ញុំ និងថ្នាក់ដឹកនាំគណបក្សសង្គ្រោះជាតិ និមន្តព្រះសង្ឃមកទីស្នាក់ការកណ្តាលគណបក្សសង្គ្រោះជាតិ ប្រារព្ធពិធីបង្សុកូលឧទ្ទិសកុសលដល់បុព្វការីជនរបស់សកម្មជនគណបក្សសង្គ្រោះជាតិ និងសកម្មជនសង្គមស៊ីវិលសរុប ២៥ រូប ដែលកំពុងជាប់ពន្ធនាគារ ដោយមានការអញ្ជើញចូលរួមពីសំណាក់ក្រុមគ្រួសាររបស់ពួកគាត់ផងដែរ»។
លោក អេង ឆៃអ៊ាង មន្ត្រីជាន់ខ្ពស់គណបក្សសង្គ្រោះជាតិ មិនអត្ថាធិប្បាយច្រើនពីហេតុផលដែលឧត្តម កឹម សុខា មិនទៅធ្វើបុណ្យភ្ជុំបិណ្ឌនៅវត្តអារាមឡើយ។ តែមតិមួយចំនួនលើកឡើងថា ឯកឧត្តម កឹម សុខា មិនហ៊ានចេញក្រៅពីស្នាក់ការ ឬទៅធ្វើបុណ្យ ក្នុងអំឡុងពេលភ្ជុំបិណ្ឌនេះ ដោយសារខ្លាចអាជ្ញាធរចាប់ខ្លួន។
លោក អេង ឆៃអ៊ាង ធ្លាប់ប្រាប់សារព័ត៌មានថ្មីៗថា ឯកឧត្តម កឹម សុខា សម្រេចឃុំខ្លួនឯងនៅក្នុងស្នាក់ការបក្ស មិនមែនពីព្រោះតែខ្លាចសមត្ថកិច្ចចាប់ខ្លួននោះឡើយ។ ប៉ុន្តែផ្ទុយទៅវិញ លោកអះអាងថា ការឃុំខ្លួនឯងរបស់ឯកឧត្តម កឹម សុខា ដើម្បីធ្វើកូដកម្មនយោបាយប្រឆាំងនឹងការសម្រេចរបស់ប្រព័ន្ធតុលាការមកលើរូបលោកទាំងមានអភ័យឯកសិទ្ធិរដ្ឋសភា និងទាមទារឲ្យមានដំណោះស្រាយនយោបាយ។
សូមរម្លឹកថា ឯកឧត្តម កឹម សុខា បានឃុំខ្លួនឯងនៅទីស្នាក់កណ្តាលបក្សចាប់តាំងពីថ្ងៃទី ២៦ ខែ ឧសភា បន្ទាប់ពីអាជ្ញាធរឃាត់រថយន្តឯកឧត្តម តែមិនឃើញឯកឧត្តម កឹម សុខា នៅក្នុងរថយន្តនោះ។ ក្រោយមកឯកឧត្តម កឹម សុខា ត្រូវបានតុលាការកាត់ទោសឲ្យជាប់ពន្ធនាគារ៥ខែ និងពិន័យជាប្រាក់៨សែនរៀល ក្រោមបទចោទ«បដិសេធក្នុងការចូលខ្លួន» ក្នុងនាមជាសាក្សីលើសំណុំរឿង សញ្ចារកម្ម តាមមាត្រា៥៣៨នៃក្រមព្រហ្មទណ្ឌ ដោយអយ្យការបញ្ជាក់ថា ជាបទល្មើសជាក់ស្តែង៕
Tag:
កឹម សុខា
ភ្ជុំបិណ្ឌ
© រក្សាសិទ្ធិដោយ thmeythmey.com