ថ្ងៃរម្លឹកខួបនៃការចូលទិវង្គតព្រះមហាក្សត្រ អ្នកប្រឆាំង ចង់រកដំណោះស្រាយ តែមន្ត្រីបក្សកាន់អំណាច ថាអត់

ជាតិ

នយោបាយជាតិ

ថ្ងៃរម្លឹកខួបនៃការចូលទិវង្គតព្រះមហាក្សត្រ អ្នកប្រឆាំង ចង់រកដំណោះស្រាយ តែមន្ត្រីបក្សកាន់អំណាច ថាអត់

15, Oct 2018 , 4:59 pm

រូបភាព

រូបពី AFP

ដោយ: ថ្មីៗ

ភ្នំពេញ៖ ក្នុងថ្ងៃរម្លឹកខួប៦ឆ្នាំនៃការសោយទិវង្គតរបស់ព្រះមហាវីរក្សត្រខ្មែរ អតីតមន្ត្រីបក្សប្រឆាំង ចង់ឲ្យមេដឹកនាំកម្ពុជា យកកិច្ចព្រមព្រៀងសន្តិភាពទីក្រុងប៉ារីស មកធ្វើជាដំណោះស្រាយ។ តែមន្ត្រីបក្សកាន់អំណាច លើកឡើងថា បក្សខ្លួន មិនបង្រួបប្រួមជាតិជាមួយបក្សប្រឆាំង ដែលជាក្រុមក្បត់ជាតិនោះទេ។

មេដឹកនាំកំពូលនៃអតីតគណបក្សប្រឆាំង គឺលោក សម រង្ស៊ី និងលោក កឹម សុខា ដូចជាមិនទាន់បញ្ចេញសារអ្វីទាក់ទងនឹងការរម្លឹបខួប៦ឆ្នាំនៃការសោយទីវង្គតរបស់ព្រះបាទ នរោត្តម សីហនុ អតីតព្រះមហាក្សត្រខ្មែរនោះទេ។ ប៉ុន្តែ គេ ឃើញមន្ត្រីជាន់ខ្ពស់មួយចំនួននៃអតីតគណបក្សប្រឆាំង បានបញ្ចេញមតិលើបណ្តាញសង្គមហ្វេសប៊ុក។

លោក យ៉ែម បុញ្ញឫទ្ធិ ដែលធ្លាប់ធ្វើជាអ្នកនាំពាក្យកាលពីគណបក្សប្រឆាំង នៅមានវត្តមាន បានសរសេរសារលើទំព័រហ្វេសប៊ុកថា៖«យើងត្រូវឈរលើផលប្រយោជន៍ជាតិជាធំ មិនត្រូវយកពលរដ្ឋខ្មែរធ្វើជាឧបករណ៍ ដើម្បីតែគោលដៅបម្រើមហិច្ឆតាអំណាចផ្ទាល់ខ្លួន បក្ខពួក ឬមហិច្ឆតាបរទេសនោះទេ។ យើងត្រូវឆក់យកឱកាស និងគុណប្រយោជន៍នៃកិច្ចព្រមព្រៀងសន្តិភាពទីក្រុងប៉ារីស ២៣តុលា ឆ្នាំ៩១ មកអនុវត្ត ដើម្បីដោះស្រាយបញ្ហា»។

ក្រៅពីសារដែលបង្កប់ន័យចង់ឲ្យមានដំណោះស្រាយនៅកម្ពុជា អតីតអ្នកនាំពាក្យគណបក្សប្រឆាំងរូបនេះ ក៏មានសារមួយឃ្លាទៀតដែរ ដែលជាការឧទ្ទិសព្រះរាជកុសល ថ្វាយដល់ព្រះ វិញ្ញាណក្ខន្ធនៃព្រះបរមរតនកោដ្ឋ ដោយលោក សូមបួងសួងឲ្យទ្រង់ យាងសោយសុខក្នុងសុគតិភព។

ចំណែក លោក អេង ឆៃអ៊ាង អតីតអនុប្រធានគណបក្សប្រឆាំង ពុំបានបញ្ចេញទស្សនៈផ្ទាល់ខ្លួននោះទេ តែលោក បានស្រង់បណ្តាំមួយចំនួនរបស់ព្រះបរមរតនកោដ្ឋ ទៅបង្ហោះលើគណនីហ្វេសប៊ុក។ បណ្តាំទាំងនោះ រួមមាន ១. របស់ដែលមានតម្លៃបំផុតសម្រាប់ជាតិ គឺ ឯករាជ្យ, ២. អាវុធសំខាន់សម្រាប់កសាងនិងការពារឯករាជ្យ គឺការរួបរួមគ្នាជាធ្លុងមួយ, ៣. រួបរួមគ្នាជាធ្លុងមួយ ដើម្បីស្រោចស្រង់ប្រទេសយើង ឯករាជ្យជាតិយើង ឲ្យឆ្លងផុតពីគ្រោះថ្នាក់នានា។

រីឯ លោក សុខ ឥសាន អ្នកនាំពាក្យគណបក្សកាន់អំណាច បានអះអាងថា គណបក្សរបស់លោក បានប្រកាន់ខ្ជាប់នូវគោលជំហរសុខដុមនីយកម្មសង្គម ដោយផ្អែកលើនយោបាយបង្រួបបង្រួម និងផ្សះផ្សារជាតិ រួមទាំងវប្បធម៌សន្ទនា។ ប៉ុន្តែ លោក សង្កត់ធ្ងន់ ការបង្រួបបង្រួម ការផ្សះផ្សារ និងវប្បធ៏មសន្ទនា ត្រូវតែផ្អែកលើគោលការណ៏ប្រជាធិបតេយ្យនិងនីតិរដ្ឋ។

អ្នកនាំពាក្យគណបក្សកាន់អំណាច បានសរសេរសារក្នុងបណ្តាញទំនាក់ទំនងតេឡេក្រាមយ៉ាងដូច្នេះថា៖«ដាច់ខាតគណបក្សប្រជាជនកម្ពុជា មិនផ្សះផ្សារនិងបង្រួបបង្រួមជាតិមួយក្រុមជនក្បត់ជាតិ រំលោភលទ្ធិប្រជាធិបតេយ្យឡើយ។ នេះហើយគឺជាព្រះរាជបណ្តាំរបស់ព្រះបរមរតនកោដ្ឋ ដែលបន្សល់ឲ្យកូនចៅគណបក្សប្រជាជនកម្ពុជាអនុវត្តតរៀងទៅ។ ហេតុដូច្នេះហើយ បានជាគណបក្សប្រជាជនកម្ពុជា ប្តេជ្ញាការពាររដ្ឋធម្មនុញ្ញនិងរបបរាជានិយម ឲ្យបានជាដាច់ខាត និងប្តេជ្ញាដើរតាមគន្លងលទ្ធិប្រជាធិបតេយ្យនិងនីតិរដ្ឋ ទោះបីក្រុមណា ជនណានិយាយអ្វីក្រៅពីនេះក៏ដោយ...»។

ដោយឡែក ទំព័រហ្វេសប៊ុករបស់សម្តេចនាយករដ្ឋមន្ត្រី ហ៊ុន សែន ប្រធានគណបក្សប្រជាជនកម្ពុជា បានបង្ហោះសារបែបអាឡោះអាល័យចំពោះការបាត់បង់ព្រះមហាវីរក្សត្រ។ សារលើទំព័រហ្វេសប៊ុករបស់នាយករដ្ឋមន្ត្រី បានសរសេរបែបនេះថា៖«នៅថ្ងៃនេះ ប្រជារាស្ត្រទូទាំងប្រទេស ព្រមទាំងមន្ត្រីរាជការ កងកម្លាំងប្រដាប់អាវុធគ្រប់ជាន់ថ្នាក់ សូមសម្តែងនូវការគោរពដឹងគុណដ៏ខ្ពង់ខ្ពស់បំផុតថ្វាយចំពោះព្រះបរមរតនកោដ្ឋ ដែលព្រះអង្គបានលះបង់និងបូជាព្រះកាយពលដ៏ធំធេងបំផុតចំពោះជាតិមាតុភូមិកម្ពុជា»៕