ជាតិ
នយោបាយជាតិ
សម្តេច ហ៊ុន សែន មមាញឹកខ្លាំងនឹងកិច្ចប្រជុំនៅបរទេស ក្នុងរយៈពេលចុងក្រោយនេះ សម្តេច ហ៊ុន សែន ត្រឡប់មកកម្ពុជាវិញ កាលពីរសៀលថ្ងៃទី១២ ខែតុលា ឆ្នាំ២០១៨ បន្ទប់ពីបញ្ចប់កិច្ចប្រជុំជាប់គ្នាចំនួនពីរ គឺនៅជប៉ុន និងនៅឥណ្ឌូនេស៊ី
× ភ្នំពេញ៖ សម្តេច ហ៊ុន សែន បានបរិយាយពីភាពមមាញឹកនៃការចេញទៅក្រៅប្រទេស ដើម្បីចូលរួមក្នុងកិច្ចប្រជុំផ្សេងៗ នារយៈពេលចុងក្រោយនេះ។ ទោះជាយ៉ាងនេះក្តី នាយករដ្ឋមន្ត្រីកម្ពុជា នៅតែបង្ហាញសេចក្តីពេញចិត្តចំពោះការងាររបស់ខ្លួន។
នៅយប់ម៉ោងជាង១២ ឈានចូលថ្ងៃទី១៧ ខែតុលានេះ ប្រមុខរដ្ឋាភិបាលកម្ពុជា នឹងដឹកនាំគណៈប្រតិភូ ចាកចេញពីប្រទេសកម្ពុជា ឆ្ពោះទៅកាន់ប្រទេសបែលហ្សិក ដើម្បីចូលរួមក្នុងកិច្ចប្រជុំអាស៊ី-អឺរ៉ុបលើកទី១២។ បន្ទាប់មក គណៈប្រតិភូកម្ពុជា នឹងបន្តទៅបំពេញទស្សនកិច្ចនៅប្រទេសទួគី ចាប់ពីថ្ងៃទី២០ ដល់ថ្ងៃទី ២២ ខែតុលា។
ក្រោយបំពេញទស្សនកិច្ចនៅប្រទេសទួកគីរួចហើយ គណៈប្រតិភូកម្ពុជា នឹងធ្វើដំណើរទៅកាន់ទីក្រុងហ្សឺណែវ ប្រទេសស្វីស ដើម្បីចូលរួមសន្និសីទស្តីពីពាណិជ្ជកម្ម។ តាមការគ្រោងទុក គណៈប្រតិភូកម្ពុជា នឹងត្រឡប់មកដល់កម្ពុជាវិញ នៅថ្ងៃទី២៥ ខែតុលា។
តាមរយៈសារដែលបង្ហោះលើទំព័រហ្វេសប៊ុក មេដឹកនាំកម្ពុជា បានសរសេរយ៉ាងដូច្នេះថា៖«កម្មវិធីការងារនៅក្រៅប្រទេសលើកនេះ ពិតជាមមាញឹកស្ទើរតែរកពេលបាយមិនឃើញ ប្រជុំផង ជំនួបទ្វេភាគីផង តែខ្ញុំពេញចិត្តនឹងធ្វើកិច្ចការនេះ ព្រោះជាប្រយោជន៍ជាតិយើង»។
នាយករដ្ឋមន្ត្រីកម្ពុជា បានបានសរសេរទៀតថា៖«ការងារមួយ ដែលខ្ញុំមិនអាចបោះបង់ចោលបាន គឺជួបបងប្អូនប្រជាជន និងនិស្សិតខ្មែរដែលកំពុងរស់នៅ និងរៀនសូត្រនៅអឺរ៉ុប ដែលបងប្អូនកូនក្មួយកំពុងរង់ចាំខ្ញុំនៅទីនោះ»។
ចាប់ពីចុងខែកញ្ញា ឆ្នាំ២០១៨មក សម្តេច ហ៊ុន សែន បានចេញទៅចូលរួមក្នុងកិច្ចប្រជុំនៅបរទេសជាញឹកញាប់។ កិច្ចប្រជុំនៅបណ្តាប្រទេសមួយចំនួន ដែលប្រមុខរដ្ឋាភិបាលកម្ពុជា បានទៅចូលរួមកន្លងមក មានដូចជា កិច្ចប្រជុំនៃមហាសន្និបាតអង្គការសហប្រជាជាតិនៅសហរដ្ឋអាមេរិក កិច្ចប្រជុំនៅជប៉ុន និងកិច្ចប្រជុំឥណ្ឌូណេស៊ី ជាដើម៕
© រក្សាសិទ្ធិដោយ thmeythmey.com