ជាតិ
២៥ខេត្ត/រាជធានី
×![]()
ភ្នំពេញ៖ អង្គការសេដាក បានរៀបចំសិក្ខាសាលាដែលស្តីពី «យុវជនឆ្ពោះទៅកសិកម្មសរីរាង្គ» ដើម្បីជំរុញយុវជនចំនួន២៤រូបដែលជាកសិករក្មេងមកពីបណ្តាខេត្ត អនុវត្តគោលការណ៍បច្ចេកទេសផ្នែកកសិកម្មសរីរាង្គ និងបង្កើនការយល់ដឹងដល់អ្នកបរិភោគ និងពង្រឹងទំនាក់ទំនងរវាងកសិករ និងទីផ្សារកសិកម្ម។ យុវជន២៤រូបនេះ ធ្វើការចែករំលែកបទពិសោធន៍ និងលើកយកបញ្ហាប្រឈមផ្សេងៗក្នុងការអនុវត្ត និងគ្រប់គ្រងកសិដ្ឋានសរីរាង្គរបស់ខ្លួន។
សិក្ខាសាលានេះ មានការចូលរួមពីយុវជន ចំនួន២៤រូបដែលជាកសិករកំពុងអនុវត្តកសិកម្មសរីរាង្គនៅតាមបណ្តាខេត្តមួយចំនួនដូចជា ខេត្តកំពង់ស្ពឺ ព្រៃវែង កំពត កំពង់ឆ្នាំង តាកែវ និងភ្នំពេញ។ យុវជនទាំងនោះ បានចែករំលែក បទពិសោធន៍ ជុំវិញការថែទាំ ការអនុវត្តដាំដំណាំផ្សេងៗ ដោយប្រើជីធម្មជាតិ និងការគ្រប់គ្រងកសិដ្ឋានឲ្យមានប្រសិទ្ធភាព ដែលអាចបង្កើនចំណូលដល់កសិករនៅតាមមូលដ្ឋាន។
អ្នកស្រី តុង ចាន់ធាង នាយិកាប្រតិបត្តិនៃអង្គការសេដាក បានឲ្យដឹងថា សេដាក មានគោលបំណង ចង់ឲ្យយុវជនឆ្ពោះទៅកសិកម្មសរីរាង្គ ដើម្បីបណ្តុះគំនិតឲ្យយុវជនងាកមកចាប់អារម្មណ៍ និងស្រឡាញ់កសិកម្មសរីរាង្គ និងផ្តល់ជាចំណេះដឹងដល់យុវជនឲ្យចូលរួមជាមួយកសិករនៅតាមមូលដ្ឋាន។ លើសពីនេះ អ្នកស្រី ចាន់ធាង ចង់ឲ្យយុវជនចាប់អារម្មណ៍លើបញ្ហាសុខភាព ដោយងាកទៅដាំដំណាំ និងការហូប បន្លែសរីរាង្គ ដោយគោរពតាមគោលការណ៍ធម្មជាតិ។
អ្នកស្រី ចាន់ធាង បញ្ជាក់ថា៖“យើងមើលឃើញថាយុវជនមិនសូវចាប់អារម្មណ៍ផ្នែកកសិកម្មទេ ដោយសារតែពូកគេគិតថា ការងារកសិកម្មធ្វើការនៅក្រោមកំដៅថ្ងៃ មានភាពនឿយហត់ខ្លាំង និងរកចំណូលបានតិច។ ត្រង់ចំណុចនេះហើយ ដែលធ្វើឲ្យមានកង្វះកសិករដែលជាបញ្ហាធ្វើឲ្យកសិកម្មមិនអាចបម្រើទីផ្សារបានលឿន។ ដូច្នេះយើងមានតែជំរុញឲ្យយុវជន និងកសិករ សហការគ្នាបង្កើតសហគមន៍គាំទ្រកសិកម្មសរីរាង្គ ដើម្បីកាត់បន្ថយបន្លែគីមី និងសម្រាប់ផ្គត់ផ្គង់ទីផ្សារឲ្យទាន់តម្រូវការអ្នកបរិភោគ”។
ដោយសារតែព្រួយបារម្ភពីសារធាតុគីមីដែលពលរដ្ឋខ្មែរបានបរិភោគរាល់ថ្ងៃ លោក ម៉ក់ រ៉េម ដែលជាយុវជនមកពីខេត្តតាកែវ បានឲ្យដឹងថា ខ្លួនចង់ឲ្យកសិករ ខិតខំដាំដំណាំសរីរាង្គឲ្យកាន់តែច្រើនបន្ថែមទៀត សម្រាប់បំពេញតម្រូវការទីផ្សារឲ្យទូលំទូលាយ ហើយលោក រ៉េម ក៏ចង់ឲ្យភោជនីយដ្ឋាននានាគាំទ្រដំណាំសរីរាង្គ ដើម្បីឲ្យអ្នកបរិភោគមានសុខភាពល្អ។ លោក រ៉េម ប្រាប់ថា៖“វត្តមាន កសិកម្មសរីរាង្គពិតជារួមចំណែកក្នុងការអភិវឌ្ឃវិស័យកសិកម្មនៅកម្ពុជា និងរួមចំណែកកាត់បន្ថយការចំណកស្រុករបស់កសិករផងដែរ”។
សម្រាប់លោក ពៅ រតនា ដែលបានចូលរួមសិក្ខាសាលានេះ បានធ្វើឲ្យលោកយល់ដឹងពីចំណេះដឹងបន្ថែមលើបញ្ហាប្រឈមរបស់ប្រជាកសិករ អំពីកង្វះអ្នកដាំំកសិកម្មសរីរាង្គ និងកង្វះការនាំចេញទៅទីផ្សរ។ ដើម្បីដោះស្រាយបញ្ហានេះ លោក រតនា មានគោលបំណងបង្កើត START UP ផ្នែកអាហារដ្ឋានសរីរាង្គ ដើម្បីបង្កើតទំនាក់ទំនងគ្នារវាងកសិករ និងម្ចាស់ភោជនីយដ្ឋាននានា។
សូមបញ្ជាក់ថា អង្គការសេដាក បង្កើតឡើងនៅថ្ងៃទី២៤ ខែសីហា ឆ្នាំ១៩៩៧ ដោយមានលោក យ៉ង់ សាំងកុមារ ជាស្ថាបនិកអង្គការសេដាក និងមានអ្នកស្រី តុង ចាន់ធាង ជានាយិកាប្រតិបត្តិនៃអង្គការសេដាក ដែលសហការគ្នាជាមួយប្រជាកសិករនៅតាមបណ្តាខេត្តដែលជាខេត្តមានសក្តានុពុលផ្នែកកសិកម្ម ខេត្តទាំងនោះមានដូចជា ខេត្តកំពង់ឆ្នាំង តាកែវ ព្រៃវែង កំពត ជាពិសេសខេត្តមណ្ឌលគីរី និងរតនគីរី៕
Tag:
យុវជន
សេដាក
កសិកម្ម
© រក្សាសិទ្ធិដោយ thmeythmey.com
