ប្រតិភូកីឡាយុវជនកម្ពុជា បានបញ្ចប់បេសសកម្មរយៈពេល២០ថ្ងៃនៅអាហ្សង់ទីន ដោយបានវិលប្រឡប់មកកម្ពុជាវិញកាលពីយប់ថ្ងៃទី២១ ខែតុលា។ កម្ពុជាមិនទទួលបានមេដាយណាឡើយពីព្រឹត្តិការណ៍ Buenos Aires 2018 Youth Olympic Games ប៉ុន្តែកីឡាករកម្ពុជាបង្ហាញភាពលេចធ្លោដ៏គួរឲ្យកត់សម្គាល់ ដែលក្នុងនោះ កីឡាករវាយសីកម្ពុជា វ៉ាត់ វណ្ណធុន ដណ្តើមបានមេដាយមាសពីការប្រកួតមិត្តភាពអន្តរជាតិ ដែលរៀបចំដោយគណៈកម្មាធិការអូឡាំពិកអន្តរជាតិ និងសហព័ន្ធីកីឡាវាយសីអន្តរជាតិ។
ដើម្បីអបអរ និងរឹតចំណងសាមគ្គីភាពឲ្យកាន់ជិតស្និទ្ធរវាងយុវជនយុវនារីប្រទេសជាសមាជិក ដែលចូលរួមប្រកួតក្នុងព្រឹត្តិការណ៍យុវជនអូឡាំពិកនៅអាហ្សង់ទីន សហព័ន្ធកីឡាវាយសីអន្តរជាតិ សហការជាមួយគណៈកម្មាធិការអូឡាំពិកអន្តរជាតិ បានរៀបចំការប្រកួតកីឡាវាយសីចម្រុះជាតិសាសន៍ដណ្តើមពានរង្វាន់លក្ខណៈមិត្តភាពអន្តរជាតិ។
ការប្រកួតនេះមាន៦៤ប្រទេសចូលរួមហើយបែងចែកជា៨ក្រុមដោយក្នុង១ក្រុមមាន៨ប្រទេស។ កីឡាករ វ៉ាត់ វណ្ណធុន របស់កម្ពុជាស្ថិតនៅក្នុងក្រុមអាល់ហ្វា(Alpha) ដែលមានកីឡាករមកពីប្រទេសអ៊ីតាលី, ឥណ្ឌា, ប៊ុលហ្គារី, ស្វីស, កាណាដា, សហរដ្ឋអាមេរិក និងស្រីលង្កា។
ក្រោយឆ្លងកាត់ការប្រកួតយ៉ាងស្វិតស្វាញ ក្រុមរបស់កីឡាករ វ៉ាត់ វណ្ណធុន ដណ្តើមបានមេដាយមាស ក្រោយយកឈ្នះក្រុម Omega ដែលមានប្រទេសវៀតណាម, អ៊ុយក្រែន, ថៃ, បារាំង, ឆាយនីសតៃប៉ិ, ន័រវែស, ហ្វីជី និងនូវែលសេឡង់ នៅវគ្គផ្តាច់ព្រ័ត្រ។ មុនឡើងដល់វគ្គផ្តាច់ព្រ័ត្រ ក្រុមរបស់ វណ្ណធន់ បានយកឈ្នះក្រុម Theta ដែលមានកីឡាករមកពី ជប៉ុន, សាធារណរដ្ឋឆែក, ប្រេស៊ីល, អាល្លឺម៉ង់, អូស្ត្រាលី, អេហ្ស៊ីប និងបែលហ្ស៊ិក នៅវគ្គពាក់កណ្តាលផ្តាច់ព្រ័ត្រ។
តែយ៉ាងណាមេដាយនេះ មិនរាប់បញ្ចូលក្នុងតារាងមេដាយនៃការប្រកួតយុវជនអូឡាំពិក Youth Olympic នោះទេ។ សម្រាប់ការប្រកួតយុវជនអូឡាំពិកនៅប្រទេសអាហ្សង់ទីន កម្ពុជាបញ្ជូនកីឡាករ៣រូបលើ៣ប្រភេទកីឡាចូលរួម រួមមានចំបាប់ ហែលទឹក និងវាយសី។ ជាលទ្ធផលកម្ពុជាមិនទទួលបានមេដាយនោះទេ៕