ក្រោយផ្ទុះទំនាស់ក្នុងសង្គ្រោះជាតិ លោក សម រង្ស៊ី បានស្នើឲ្យរួមគ្នាជាធ្លុងមួយ

ជាតិ

នយោបាយជាតិ

ក្រោយផ្ទុះទំនាស់ក្នុងសង្គ្រោះជាតិ លោក សម រង្ស៊ី បានស្នើឲ្យរួមគ្នាជាធ្លុងមួយ

04, Dec 2018 , 10:52 am

រូបភាព

លោក សម រង្ស៊ី ថ្លែងសារក្នុងពិធីបិទសន្និសីទនៅអាមេរិក ក្រោយលោក ត្រូវបានស្នើឲ្យឡើងកាន់តំណែងជាប្រធានស្តីទីនៃអតីតគណបក្សសង្គ្រោះជាតិ។ រូបពីទំព័រហ្វេសប៊ុករបស់លោក លោក សម រង្ស៊ី

ដោយ: ថ្មីៗ

លោក សម រង្ស៊ី ហាក់ខ្លាចថ្នាក់ដឹកនាំនិងអ្នកគាំទ្របែកបាក់គ្នា ក្រោយពីលោក ទទួលយកតំណែងជាប្រធានស្តីទីនៃអតីតគណបក្សសង្គ្រោះជាតិ។ លោក បានបង្ហោះវីដេអូខ្លីមួយ ដែលមានរយៈពេលជាង២នាទី ដើម្បីប្រាប់ថ្នាក់ដឹកនាំនិងអ្នកទាំទ្រ កុំឲ្យប្រទូសសរ៉ាយដាក់គ្នា។

តាមរយៈវីដេអូឃ្លីបលើទំព័រហ្វេសប៊ុក ដែលបង្ហោះចេញទីក្រុងអាត្លង់តា រដ្ឋចចា សហរដ្ឋអាមេរិក លោក សម រង្ស៊ី ព្យាយាមពន្យល់ពីយុទ្ធសាស្ត្ររបស់លោក ទៅកាន់ថ្នាក់ដឹកនាំនិងអ្នកគាំទ្រនៃអតីតគណបក្សសង្គ្រោះជាតិ។ លោក លើកឡើងជាថ្មីថា អ្វីដែលលោកធ្វើពេលនេះ គឺជារៀបចំយុទ្ធសាស្ត្រ និងកំណត់គោលដៅច្បាស់លាស់ ដើម្បីធ្វើឲ្យគណបក្សសង្គ្រោះជាតិរស់ឡើងវិញ ហើយលោក កឹម សុខា នឹងអាចទទួលបានសិទ្ធិសេរីភាពពេញលេញ។

លោក សម រង្ស៊ី បានបន្ថែមថា អតីតគណបក្សសង្គ្រោះជាតិ ត្រូវតែរកដំណោះស្រាយ ដោយមិនអាចបន្តទុកឲ្យនៅជាប់គាំងបែបនេះនោះទេ។ លោក បញ្ជាក់យ៉ាងដូច្នេះថា៖«យើងត្រូវកំណត់យុទ្ធសាស្ត្រនិងយុទ្ធវិធី ដើម្បីធ្វើសេចក្តីសមស្របឲ្យទាន់ពេលវេលា។ យើង នឹងចាត់ចែងការងារ ដែលត្រូវតែបំពេញក្នុងពេលប៉ុន្មានខែខាងមុននេះ ដើម្បីរំដោះប្រទេសយើងឲ្យទាល់តែបាន»។

បន្ទាប់ពីបកស្រាយពីយុទ្ធសាស្ត្ររួចហើយ លោក សម រង្ស៊ី ដែលទើបនឹងត្រូវបានស្នើឲ្យឡើងកាន់តំណែងជាប្រធានស្តីទីនៃអតីតគណបក្សសង្គ្រោះជាតិ ក៏អំពាវនាវឲ្យថ្នាក់ដឹកនាំគ្រប់ជាន់ថ្នាក់និងអ្នកគាំទ្រ ជឿជាក់លើរូបលោក និង លោក កឹម សុខា ហើយត្រូវចៀសវាងការបែកបាក់គ្នា។ លោក អំពាវនាវយ៉ាងដូច្នេះថា៖«យើងត្រូវតែរួមកម្លាំងគ្នាជាធ្លុងមួយ ហើយត្រូវរក្សាជំហរឲ្យច្បាស់ថា កឹម សុខា និង សម រង្ស៊ី ជាមនុស្សតែមួយ បេះដូងតែមួយ គោលបំណងតែមួយ។ កុំចាញ់ការឃោសនា ដែលថាគណបក្សសង្គ្រោះជាតិ បែកបាក់គ្នា គឺអត់ទេ។ យើង យល់ឲ្យច្បាស់ថាទាល់តែយើងរួបរួមគ្នារឹងមាំ ទើបយើងជោគជ័យ...»។

សាររបស់លោក សម រង្ស៊ី នាពេលនេះ គឺធ្វើឡើយក្រោយពីមានការខ្វែងគំនិតគ្នាក្នុងអតីតគណបក្សសង្គ្រោះជាតិ។ អ្នក ដែលគាំទ្រលោក បានបង្ហាញការពេញចិត្តចំពោះការផ្តល់តំណែងជាប្រធានស្តីទីទៅឲ្យលោក ដោយពួកគេយល់ថា លោក កឹម សុខា ដែលជាប្រធាន កំពុងស្ថិតក្នុងគំនាប ហើយពុំមានសេរីភាពក្នុងការបំពេញការងារឡើយ។

ប៉ុន្តែអ្នកដែលឈរខាងលោក កឹម សុខា បានបន្ទោសលោក សម រង្ស៊ីថា ការធ្វើបែបនេះ គឺជាមូលហេតុដែលនាំឲ្យអតីតគណបក្សសង្គ្រោះជាតិ បែបបាក់គ្នា។ អ្នកខ្លះ រិះគន់លោក សម រង្ស៊ី ថា បានដណ្តើមតំណែងពីលោក កឹម សុខា។

មន្ត្រីដែលគាំទ្រលោក កឹម សុខា បានចេញសេចក្តីថ្លែងការណ៍មួយក្នុងនាមជាអតីតគណបក្សសង្គ្រោះជាតិ ដើម្បីប្រកាសមិនទទួលស្គាល់ការសម្រេចឲ្យលោក សម រង្ស៊ី ឡើងធ្វើជាប្រធានស្តីទី។ សេចក្តីថ្លែងការណ៍នោះ បញ្ជាក់ថា ការសម្រេចនេះ គឺខុសនឹងលក្ខន្តិកៈរបស់គណបក្សសង្គ្រោះជាតិ៕