ជាតិ
នយោបាយជាតិ
សម្តេច ហ៊ុន សែន ប្រាប់មេដឹកនាំវៀតណាមផ្ទាល់មាត់ថា «កម្ពុជា គ្មានកងទ័ពចិនទេ» ជំនួបរវាងនាយករដ្ឋមន្រ្តីកម្ពុជា និង នាយករដ្ឋមន្រ្តីវៀតណាម នៅថ្ងៃទី៧ ខែធ្នូ ឆ្នាំ២០១៨ នៅទីក្រុងហាណូយ ប្រទេសវៀតណាម
× ទោះជាធ្លាប់ប្រកាសជាសាធារណៈពីរ-បីដងរួចមកហើយក្តីថា កងទ័ពជើងទឹករបស់ចិនពុំបានមកតាំងមូលដ្ឋាននៅកម្ពុជា ដូចការចុះផ្សាយរបស់សារព័ត៌មានបរទេសនោះទេ ក៏សម្តេច ហ៊ុន សែន នៅតែឆ្លៀតបញ្ជាក់រឿងនេះម្តងទៀត ទៅកាន់មេដឹកនាំវៀតណាម ក្នុងឱកាសដែលភាគីទាំងពីរ បានជួបគ្នា នៅទីក្រុងហាណូយ ប្រទេសវៀតណាម នាថ្ងៃទី៧ ខែធ្នូ ឆ្នាំ២០១៨។
ក្នុងសន្និសីទកាសែត ដែលធ្វើឡើងរួមគ្នាជាមួយលោក ង្វៀន សួនហ្វ៊ុក នាយករដ្ឋមន្ត្រីវៀតណាម នៅក្រោយជំនួប សម្តេច ហ៊ុន សែន បានអះអាងថា ព័ត៌មាននិងការឃោសនាអកុសលនេះ អាចក្លាយជាកង្វល់ដល់ប្រទេសជិតខាងនិងប្រទេសក្នុងតំបន់ ប្រសិនបើវា នៅតែបន្តទៅទៀត។ ឈរទន្ទឹមជាមួយនាយករដ្ឋមន្ត្រីវៀតណាម នៅចំពោះមុខអ្នកកាសែត នាយករដ្ឋមន្ត្រីកម្ពុជា បានថ្លែងបែបនេះថា៖«ខ្ញុំ សង្ឃឹមថា ពាក្យចចាមអារ៉ាមនេះ នឹងត្រូវបញ្ចប់។ [ក្នុងជំនួប] អម្បាញ់មិញ ឯកឧត្តម ង្វៀន សួនហ្វ៊ុក បានអរគុណខ្ញុំ ដែលខ្ញុំបានផ្តល់ជូនគាត់ អំពីព័ត៌មានខាងលើនេះ»។
ក្នុងជំនួបរវាងអ្នកទាំងពីរ មានឯកសារ៦ ដែលត្រូវបានចុះហត្ថលេខា គឺ អនុស្សរណៈនៃការយោគយល់គ្នាស្តីពីយុទ្ធសហប្រតិបត្តិការលើវិស័យដឹកជញ្ជូនសម្រាប់រយៈពេល៧ឆ្នាំ ពីឆ្នាំ២០១៨-២០២៥, វិសោធនកម្មពិធីសារឆ្នាំ២០០៥ សម្រាប់ការអនុវត្តកិច្ចព្រមព្រៀងនៃការដឹកជញ្ជូនតាមផ្លូវគោកឆ្នាំ១៩៩៨, វិសោធនកម្ម កិច្ចព្រមព្រៀងស្តីពីការដឹកជញ្ជូនផ្លូវទឹកឆ្នាំ២០០៩, កិច្ចព្រមព្រៀងពាណិជ្ជកម្មតាមព្រំដែនកម្ពុជា-វៀតណាម, កិច្ចសម្របសម្រួលជំរុញពាណិជកម្មទ្វេភាគីកម្ពុជា-វៀតណាមសម្រាប់ឆ្នាំ២០១៨-២០១៩ ស្តីពីការអនុគ្រោះលើពន្ធបន្ទាត់ពន្ធគយឲ្យគ្នាទៅវិញទៅមក, និង កិច្ចព្រមព្រៀងស្តីពីការទប់ស្កាត់ការជួញដូរ ការជីកកកាយដោយខុសច្បាប់ និងការនាំត្រឡប់មកវិញនូវសម្បត្តិបេតិកភណ្ឌនៃប្រទេសទាំងពីរ។
គណៈប្រតិភូកម្ពុជា នឹងបញ្ចប់ទស្សនកិច្ចនៅវៀតណាម នៅថ្ងៃទី៨ ខែធ្នូ។
ជំវិញព័ត៌មានដែលចុះផ្សាយថា មានកងទ័ពជើងទឹករបស់ចិន មកតាំងមូលដ្ឋាន នៅកម្ពុជា គឺចាប់ផ្តើមផ្ទុះឡើង កាលពីប៉ុន្មានសប្តាហ៍មុន ក្រោយពីកាសែតបរទេស បានចុះផ្សាយ។ បន្ទាប់មក ព័ត៌មាននេះ ក៏សាយភាយ ទៅដល់មេដឹកនាំអាមេរិក ដែលជំរុញឲ្យលោក ម៉ៃ ផេន អនុប្រធានាធិបតីអាមេរិក សរសេរលិខិតមកសួរប្រមុខរដ្ឋាភិបាលកម្ពុជា។
ប្រមុខរដ្ឋាភិបាលកម្ពុជា ក៏បានសរសេរលិខិតឆ្លើយតបទៅវិញ ដោយបកស្រាយថា រដ្ឋធម្មនុញ្ញកម្ពុជា ពុំអនុញ្ញាតឲ្យមានកម្លាំងបរទេស មកតាំងមូលដ្ឋានលើទឹកដីកម្ពុជាឡើយ ហើយព័ត៌មានដែលចុះផ្សាយនោះ គឺជាព័ត៌មានមិនពិត៕
Tag:
ហ៊ុន សែន
កម្ពុជា-វៀតណាម
ទ័ពចិន
© រក្សាសិទ្ធិដោយ thmeythmey.com