ជាតិ
សង្គមជាតិ
មន្ត្រីកាំកុងត្រូល ដុតកម្ទេចខ្ទឹមសផ្ទុកសារធាតុគីមីនាំចូលពីប្រទេសចិន ជាង ២០តោន រូបភាពពីក្រសួងពាណិជ្ជកម្ម
× ភ្នំពេញ៖ ខ្ទឹមសនាំចូលពីប្រទេសចិន និងគ្រាប់ធញ្ញជាតិទម្ងន់ជាង ២៥តោន ដែលមានផ្ទុកសារធាតុគីមីប្រភេទថ្នាំពុលកសិកម្ម Disulfoton សម្រាប់ការពារសត្វល្អិតបំផ្លាញដំណាំ ត្រូវបានរកឃើញ និងដុតកម្ទេចចោល ក្នុងខេត្តព្រះសីហនុ នាព្រឹកថ្ងៃទី៣១ ខែមករា ឆ្នាំ២០១៩នេះ។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ដែលបានចូលរួមក្នុងពិធីដុតកម្ទេចទំនិញផ្ទុកសារធាតុគីមីតាំងនោះបានលើកឡើងថា ទំនិញនោះអាចបង្កផលប៉ះពាល់ដល់ប្រព័ន្ធសរសៃប្រសាទ ដូចជាធ្វើឱ្យអ្នកបរិភោគក្អួត រាគ ញ័រ ប្រកាច់ ភ្នែករួមតូច និងពិបាកដកដង្ហើម ហើយអាចបណ្តាលឱ្យស្លាប់បាន ក្នុងករណីធ្ងន់ធ្ងរ។
រដ្ឋមន្ត្រីក្រសួងពាណិជ្ជកម្ម និយយដូច្នេះថា៖«ការដុតកម្ទេចទំនិញថ្ងៃនេះ គឺដើម្បីឆ្លើយតបនឹងកង្វល់របស់ប្រជាពលរដ្ឋ»។
រដ្ឋមន្ត្រីក្រសួងពាណិជ្ជកម្ម ស្នើឲ្យមន្ត្រីសាខាកាំកុងត្រូលទាំងអស់ បន្តប្រឹងប្រែងត្រួតពិនិត្យទំនិញនៅលើទីផ្សារ និងនៅតាមហាងលក់ទំនិញថែមទៀត ដើម្បីចូលរួមលើកកម្ពស់សុវត្ថិភាពម្ហូបអាហារ ជូនអ្នកប្រើប្រាស់នៅកម្ពុជា ដោយអនុលោមតាមកម្មវិធីអភិក្រម ស្តីពី «ការគ្រប់គ្រងហានិភ័យ» ផ្អែកលើមូលដ្ឋានបច្ចេកទេស និងវិទ្យាសាស្ត្រច្បាស់លាស់។
ក្នុងឆ្នាំ២០១៨ អគ្គនាយកដ្ឋានកាំកុងត្រូល បានដកហូតទំនិញខូចគុណភាព និងម្ហូបអាហារពុំមានសុវត្ថិភាព ទម្ងន់សរុបចំនួន ៦៦តោន (បន្លែ ផ្លែឈើ គ្រឿងកំប៉ុង គ្រឿងសមុទ្រ និងសាច់ស្រស់មានផ្ទុកសារធាតុគីមីហាមឃាត់ ឬសំណល់ថ្នាំកសិកម្ម) យកទៅដុតកម្ទេចចោល ។ក្នុងនោះទំនិញទម្ងន់ ៥,៣តោន ត្រូវបានរឹបអូសពីមាត់ច្រកព្រំដែន និងនៅតាមទីផ្សារនៃខេត្តព្រះសីហនុ។នេះបើយោងតាមរបាយការណ៍របស់អគ្គនាយកដ្ឋានកាំកុងត្រូល៕
Tag:
ទំនិញផ្ទុកសារធាតុគីមី
© រក្សាសិទ្ធិដោយ thmeythmey.com