អន្តរជាតិ
រូបភាព AFP
×![]()
ដោយ: តន ចាន់រិទ្ធារ៉ា
ទោះរងការរិះគន់ពីសហគមន៍អន្តរជាតិ និងអង្គការសិទ្ធិមនុស្សក្ដី ប្រធានាធិបតីហ្វីលីពីន រ៉ូឌ្រីហ្គោ ឌូទើតេ នឹងមិនបន្ធូរដៃឡើយក្នុងការធ្វើសង្គ្រាមប្រឆាំងគ្រឿងញៀន។ លោក ឌូទើតេ ប្រកាសជាចំហថា លោកនឹងមិនលើកលែងឲ្យនរណាឡើយដែលបំផ្លាញអនាគតហ្វីលីពីន ហើយយុទ្ធនាការនេះនឹងបន្តធ្វើរហូតទោះលោកអាចអស់តំណែង ឬជួបបញ្ហាផ្សេងៗដោយសាររឿងនេះក្ដី។
សង្គ្រាមបោសសម្អាតគ្រឿងញៀន គឺជាគោលនយោបាយដ៏ធំ និងចម្រូងចម្រាសរបស់ប្រធានាធិបតីហ្វីលីពីន រ៉ូឌ្រីហ្គោ ឌូទើតេ ។ របាយការណ៍ពីប៉ូលិសហ្វីលីពីនបង្ហាញថា មនុស្សជាង៥ពាន់នាក់ បានបាត់បង់ជីវិតក្នុងយុទ្ធនាការកណ្ដាប់ដៃដែកនេះ ប៉ុន្តែក្រុមសិទ្ធិមនុស្សដែលរិះគន់ចំណាត់ការមួយនេះអះអាងថា តួលេខរបស់រដ្ឋាភិបាលនេះមានចំនួនតិចជាងចំនួនជាក់ស្ដែងដែលអាចមានដល់មួយម៉ឺននាក់ឯណោះ។
ទោះជាយ៉ាងណា លោក ឌូទើតេ គ្មានបំណងបន្ធូរដៃឡើយ។ ពីវិមានប្រធានាធិបតី Malacañang នៅថ្ងៃទី២០ ខែកុម្ភៈ មេដឹកនាំហ្វីលីពីនរូបនេះប្រកាសថា យុទ្ធនាការបង្ក្រាបគ្រឿងញៀន នឹងរឹតបន្តឹងកាន់តែខ្លាំងទៀតនៅពេលខាងមុខ ហើយលោកក៏បានប្រាប់មនុស្សរាល់គ្នារួចរាល់ហើយពីរឿងនេះ។ លោកថា លោកមិនឲ្យហ្វីលីពីនត្រូវបានបំផ្លាញដោយគ្រឿងញៀនរហូតធ្លាក់ខ្លួនជារដ្ឋមួយដែលបែកបាក់ដោយសារធាតុញៀននេះឡើយ។
ទន្ទឹមនឹងការប្រកាសរឹតបន្តឹងការបង្ក្រាបគ្រឿងញៀននោះ ប្រធានាធិបតីហ្វីលីពីនក៏រូបប្ដេជ្ញាចិត្តជីកឬសជីកគល់ការជួញដូរ និងលំហូរគ្រឿងញៀនចូលហ្វីលីពីនមិនចេះឈប់ឈរ។ សារព័ត៌មានហ្វីលីពីន ABS-CBN ផ្សាយថា លោក ឌូទើតេ បានគំរាមឈ្មួញគ្រឿងញៀនទាំងអស់ មិនថាពួកគេជាជនជាតិម៉ិកស៊ិក ចិន ឬជនរួមឈាមហ្វីលីពីនឡើយ គឺពួកគេគ្មានផ្លូវទៀតឡើយដោយលោកនឹងតាមចាប់ពួកគេ ហើយសម្លាប់ចោលតែម្ដង។
ប្រតិបត្តិការខ្លាំងក្លាបែបនេះ ធ្វើឲ្យលោក ឌូទើតេ រងប្រតិកម្មមិនតិចឡើយពិសេសលើប្រធានបទសិទ្ធិមនុស្ស។ ការសម្លាប់មនុស្សឆៅៗបែបនេះ ធ្វើឲ្យតុលការព្រហ្មទណ្ឌអន្តរជាតិបើកការស៊ើបអង្កេតបឋមដើម្បីពិនិត្យស្ថានការណ៍ថា ចំណាត់ការរបស់រដ្ឋាភិបាលលោក ឌូទើតេ អាចស្ថិតក្រោមយុត្តាធិការរបស់ខ្លួនទៀតផង។ យ៉ាងណាមិញ ប្រធានាធិបតីមាត់ឆៅរូបនេះមិនខ្វល់ខ្វាយអ្វីទេ ហើយក៏ត្រៀមខ្លួនទទួលយកលទ្ធផលដែលកើតចេញពីនយោបាយរបស់ខ្លួនផង។
«ខ្ញុំត្រៀមខ្លួនចុះនរក តែខ្ញុំមិនដឹកនាំប្រទេសឲ្យយ៉ាប់យ៉ឺនឡើយ។» នេះជាការសន្យារបស់លោក ឌូទើតេ ដែលជាសញ្ញាបង្ហាញថា សង្គ្រាមគ្រឿងញៀននឹងនៅតែជាអាទិភាពសំខាន់របស់រដ្ឋាភិបាលលោកដដែល។ មិនត្រឹមមិនបោះបង់ឡើយ លោក ឌូទើតេ ក៏បង្ហើបដែរថា សង្គ្រាមមួយនេះនឹងកាន់តែបង្ហូរឈាមខ្លាំងថែមទៀត ព្រោះក្នុងនាមជាប្រធានាធិបតី លោកមានកាត្វកិច្ចរក្សាសុវត្ថិភាពសម្រាប់ប្រជាជនហ្វីលីពីន៕
Tag:
ហ្វីលីពីន
រ៉ូឌ្រីហ្គោ ឌូទើតេ
គ្រឿងញៀន
© រក្សាសិទ្ធិដោយ thmeythmey.com
