មិន​ខុសពី​តាម​បណ្ដាខេត្ត​មួយចំនួនឡើយ ខេត្ត​ប៉ៃលិន ដែល​នៅ​ជិត​ព្រំ​ដែន​កម្ពុជា-ថៃ ក៏​នឹង​រៀបចំ​ព្រឹត្តិការណ៍​«សង្រ្កាន្តប៉ៃលិន»ផងដែរ ក្រោម​កិច្ច​សហការជាមួយមន្ទីរអង្គភាព និងសហភាពសហព័ន្ធយុវជនកម្ពុជាខេត្ត ដើម្បីអបអរសាទរពិធីបុណ្យចូលឆ្នាំថ្មី ប្រពៃណីខ្មែរ។
 

បើតាម​រដ្ឋបាល​ខេត្ត​ប៉ៃលិន ក្នុង​ព្រឹត្តិការណ៍​​«សង្រ្កាន្តប៉ៃលិន នឹង​មានកម្មវិធីបែបប្រពៃណីជាតិ និងកម្សាន្តសប្បាយជាច្រើន ដូចជាល្បែងប្រជាប្រិយ ការតាំងបង្ហាញស្តង់ពិព័រណ៌ កម្មវិធីប្រគំតន្ត្រីខ្នាតធំ និងបាញ់ពពុះសាប៊ូ បាញ់ទឹកត្រជាក់។ ក្រៅពី​កម្មវិធីទាំងនេះ ក៏​មាន​ការ​ប្រឡងបវរកញ្ញាមនុស្សចាស់ ចាប់ពីអាយុ ៤០ឆ្នាំ ដល់៦០ឆ្នាំ, កម្មវិធីបោះតង់តាមរមណីយដ្ឋាន តំបន់ទេសចរណ៍នានា សម្រាប់ទទួលភ្ញៀវទេសចរណ៍ជាតិ-អន្តរជាតិ ផងដែរ។
 

 

ដើម្បី​ឱ្យ​ព្រឹត្តិការណ៍នេះ កាន់តែ​មាន​ភាព​រីករាយ រដ្ឋបាលខេត្តប៉ៃលិន បាន​អំពាវនាវដល់ប្រជាពលរដ្ឋគ្រប់មជ្ឈដ្ឋានមកកម្សាន្តនៅខេត្តប៉ៃលិន ឱ្យ​បានច្រើនកុះករ។ ជាមួយគ្នានេះ រដ្ឋបាលខេត្ត ក៏​បា​ន​រៀបចំ​ផ្ទះសំណាក់ សណ្ឋាគារទំនើបៗប្រកបដោយផាសុក​ភាព អាហារដ្ឋានមានអនាម័យល្អ និងតម្លៃសមរម្យ ដល់​ភ្ញៀវទេសចរ អាចបោះតង់រាំលេងកម្សាន្ត ដោយធានាការពារសុវត្ថិភាពផងដែរ។ នេះបើតាម​សេចក្ដី​ប្រកាសព័ត៌មាន​ខាងលើ៕