«ដំណើរទស្សនកិច្ចរបស់នាវាទាំងពីរគ្រឿងនេះ ជាផ្នែកនៃកាលវិភាគកងទ័ពជើងទឹកចិនសម្រាប់កម្មវិធីហ្វឹកហ្វឹននៅដែនសមុទ្រឆ្ងាយ»។ ទីភ្នាក់ងារព័ត៌មាន Xinhua បានស្រង់សេចក្តីប្រកាសរបស់ក្រសួងការពារជាតិចិនបែបនេះ ដោយបន្តយោធាកម្ពុជា និងបណ្តាប្រទេសផ្សេងទៀត នឹងចូលរួមជាមួយយោធាចិន ដើម្បីអនុវត្តសមយុទ្ធពាក់ព័ន្ធ។ 

 

បេសកកម្មរបស់នាវាយោធាទាំងពីរគ្រឿងនេះ នឹងជួយពង្រឹងសមត្ថភាពកងទ័ព, កិច្ចសហប្រតិបត្តិការ និងទំនុកចិត្តរវាងកងទ័ពជើងទឹកកម្ពុជា និងទីម័រខាងកើត។

 

ការសំចតរបស់នាវា Qijiguang និង នាវាJinggangshan នៅកម្ពុជានេះ ធ្វើឡើងស្របពេល យោធាចិន និងកម្ពុជា ធ្វើសមយុទ្ធនាគមាសឆ្នាំ២០២៤។ សមយុទ្ធនេះ នឹងផ្តោតលើ ប្រធានបទ «ប្រតិបត្តិការប្រឆាំងភេរវកម្ម និងជួយសង្រ្គោះមនុស្សធម៌រួមគ្នា» ដែលស្រដៀងនឹងសមយុទ្ធនៅក្នុងឆ្នាំ២០២៣​ ដែរ។ 

 

តាមលិខិតជូនដំណឹងរបស់មជ្ឈមណ្ឌលហ្វឹកហ្វឺនកងរាជអាវុធហត្ថភ្នំជុំសែនរីករាយ ទៅកាន់គណៈអភិបាលស្រុកសាមគ្គីមានជ័យ ខេត្តកំពង់ឆ្នាំង មជ្ឈមណ្ឌលហ្វឹកហ្វឺនកងរាជអាវុធហត្ថភ្នំជុំសែនរីករាយ នឹងរៀបចំសមយុទ្ធនាគមាស ២០២៤ ដែលចាប់ផ្តើមពីថ្ងៃទី១០ ដល់ថ្ងៃទី៣០ ខែឧសភា៕