ស្ថិតិរកបានគ្រាប់បាល់ច្រើនរាល់ការប្រកួត ជាមួយបច្ចេកទេសស៊ុតដ៏​ប៉ិនប្រសប់ ធ្វើឱ្យ Kane ក្លាយជាកីឡាករខ្សែប្រយុទ្ធដ៏ពិសេសមួយប្រចាំសតវត្សទី ២១។ ប៉ុន្តែជារឿងសោកស្តាយ Kane មិនធ្លាប់ឈ្នះពានអ្វីមួយឡើយទាំងលីគ និងសូម្បីតែពានរង្វាន់ UCL ដែលជាឱកាសចុងក្រោយរូបគេមានជាមួយនឹង Bayern Munich។
 

Kane ត្រូវបានគេផ្តល់រហស្សនាមបន្ថែម ១ ទៀតថា ជាកីឡាករជាប់បណ្តាសារ ដែលរឿងនេះធ្លាប់ត្រូវបានគេតែងនិយាយសំដៅទៅកាន់ក្រុម Tottenham Hotspur។ Spurs ត្រូវបានចាត់ទុកជាក្លិបមួយដែលជាប់បណ្តាសារជាក្រុមមិនដែលឈ្នះពានរង្វាន់មួយសោះ ទោះបីជាក្លិបមានសមត្ថភាពខ្លាំងក្នុងការប្រកួតប្រជែងក៏ដោយក្តី។ ព្រោះតែក្លិបមានប្រវត្តិសាស្ត្រមិនដែលឈ្នះពានអ្វីមួយរយៈពេល ១៦ឆ្នាំ រួចមក ទើបកីឡាករកើតចេញពីក្រុមយុវជន Spurs សម្រេចចិត្តចាកចេញ ផ្លាស់ទៅកាន់ទឹកដីអាល្លឺម៉ង់ ដើម្បីស្វែងរកឱកាសឈ្នះពាន។
 

ការឈ្នះពានចុងក្រោយបង្អស់របស់ Spurs នៅក្នុងឆ្នាំ ២០០៨ ពានរង្វាន់ League Cup កាលនោះ ដែលបច្ចុប្បន្នមានឈ្មោះថា EFL Cup។
 

ក្តីស្រមៃចុងក្រោយ ត្រូវបានរសាត់បន្ថែមទៀត ក្រោយពីរបូតពានចំនួន ៣ ក្នុងប្រទេសអាល្លឺម៉ង់ Bayern Munich ត្រូវបានក្រុម Real Madrid ទម្លាក់ចេញត្រឹមវគ្គ ១/២ ផ្តាច់ព្រ័ត្រ លទ្ធផលសរុបទាំងពីរជើង ៤-៣។ កាលពីជើងទីមួយ Bayern បង្ហាញទម្រង់លេងបានល្អក្នុងទឹកដី ក៏ដូចជាក្រៅដី ប៉ុន្តែ Real Madrid បង្ហាញពីសមត្ថភាពខ្លាំងរបស់ខ្លួនពេលវិលត្រឡប់ធ្វើម្ចាស់ផ្ទះ។
  

ជំនួបចាញ់ Real Madrid គឺជាការបង្ហាញខ្លួនលើកទី ៦៣៤ប្រកួត សម្រាប់ Kane ដែលបានលេងឱ្យក្លិប ព្រមទាំងនៅក្រុមជម្រើសជាតិ។ ជាធម្មតាកីឡាករបាល់ទាត់មួយចំនួន ដែលមានសមត្ថភាព និងការប្រកួតច្រើនបែបនេះ គឺតែងតែធ្លាប់បានឈ្នះពានរង្វាន់មួយចំនួនក្នុងអាជីពរួចទៅហើ។
 

អ្នកគាំទ្រវិស័យបាល់ទាត់ភាគច្រើន តែងជជែងពីរឿងព្រះនៃបាល់ទាត់ ប៉ុន្តែ Kane អាចត្រូវបានគេចាក់ទុកថាជាបិសាចក្នុងវិស័យបាល់ទាត់ទៅវិញ ដោយក្លាយជាកីឡាករមួយរូបដែលមានឈ្មោះល្បីល្បាញ លេចធ្លោរខ្លាំងក្នុងនាមជាខ្សែប្រយុទ្ធ មិនដែលឈ្នះពានអ្វីទាល់តែសោះ។ កន្លងមក Bayern Munich រក្សាកំណត់ត្រាឈ្នះពានលីគកំពូលអាល្លឺម៉ង់ ១១ឆ្នាំ ជាប់ៗគ្នា ប៉ុន្តែរដូវកាល ២០២៣-២៤ បែរជាមិនឈ្នះពានសូម្បីតែមួយ ពេលមានវត្តមានរបស់ Kane ចូលរួមទៅវិញ។
 

កាល ​Kane ប្រកបអាជីពនៅ Spurs ដោយលេងបាន ៤៣៥ប្រកួត កីឡាករវ័យ ៣០ឆ្នាំ រកបានគ្រាប់បាល់ចំនួន ២៨០គ្រាប់ ដើម្បីឈរក្នុងនាមជាកីឡាកររកបានគ្រាប់បាល់ច្រើនជាងគេប្រចាំប្រវត្តិសាស្ត្រក្លិប។ ប្រចាំ Premier League វិញ គេស៊ុតបាន ២១៣គ្រាប់ ជាកីឡាករលំដាប់ទីពីរ បន្ទាប់ពីលោក Alan Shearer។
 

Kane ធ្វើបានល្អបង្ហាញខ្លួនក្នុងនាមជាខ្សែប្រយុទ្ធ និងបានឈ្នះពានរង្វាន់ជាលក្ខណៈឯកត្តជន ដូចជាស្បែកជើងមាស ៣លើក ប្រចាំ Premier League។ ពេលដែលស្ថិតនៅ Spurs ខ្សែប្រយុទ្ធអន្តរជាតិអង់គ្លេស ធ្លាប់បានជួយក្រុមធ្វើបានល្អដូចគ្នាដែរ កាលរដូវកាល​ ២០១៦-១៧ Spurs ឈរតំណែងលេង ២ នៅ Premier League ហើយរដូវកាល ២០១៨-១៩ Spurs ទទួលបានជើងឯករង ​UEFA Champions League ក្រោមការដឹកនាំរបស់លោក Mauricio Pochettino។