អន្តរជាតិ
នយោបាយអន្តរជាតិ
អាមេរិក៖កិច្ចសហការរវាងអ.ស.បនិងរដ្ឋនៅអាស៊ីធានានិរន្តរភាពនៃការរក្សាសន្តិភាពសាកល
×
បច្ចុប្បន្នជម្លោះប្រដាប់អាវុធនិងសង្គ្រាមស៊ីវិលបន្តកើនឡើងនៅតំបន់អាហ្វ្រិក និងមជ្ឈិមបូព៌ា ប៉ុន្តែសម្រាប់អាស៊ីប៉ាស៊ីហ្វិកអាចរក្សាបានសន្តិភាព និងស្ថិរភាព ព្រមទាំងជួយគាំទ្រប្រតិបត្តិការរក្សាសន្តិភាពអង្គការសហប្រជាជាតិយ៉ាងសកម្មទៀត។ ដើម្បីធានាពីនិរន្តរភាពនៃការរក្សាសន្តិភាពតំបន់ និងចូលរួមរក្សាសនិ្តភាពសាកល វាចាំបាច់ត្រូវមានការបង្កើកិច្ចសហប្រតិបត្តិការរវាងអង្គការសហប្រជាជាតិនិងប្រទេសក្នុងតំបន់។
រាយការណ៍ព័ត៌មានលម្អិតដោយ លោក រឿន ភារុន
បន្ទាប់ពីអន្តរាគមន៍ជួយបញ្ចប់សង្គ្រាមស៊ីវិលនៅកម្ពុជា អង្គការសហប្រជាជាតិជាពិសេសប្រតិបត្តិការរក្សាសន្តិភាពសាកលបានជួយបញ្ចប់ជម្លោះនៅក្នុងប្រទេសទីម័រខាងកើតផងដែរ។ បើនិយាយទៅអន្តរាគមន៍របស់អង្គការសហប្រជាជាតិក្នុងជម្លោះទីម័រខាងកើត ជាប្រតិបត្តិការរក្សាសន្តិភាពចុងក្រោយនៅអាស៊ីប៉ាស៊ីហ្វិក។ បច្ចុប្បន្ន គេមិនទាន់មានជម្លោះប្រដាប់អាវុធ ឬសង្គ្រាមស៊ីវិលថ្មីផ្ទុះឡើងដែលបង្កមហន្តរាយមនុស្សជាតិ និងបង្កអសន្តិសុខ អស្ថិរភាពនៅក្នុងតំបន់នោះទេ។
ប៉ុន្តែយ៉ាងណាក៏ដោយ ការបង្កើនទំនាក់ទំនងឲ្យកាន់តែជិតស្និទ្ធរវាងរដ្ឋដែលមានឆន្ទៈចង់ចូលរួមសកម្មភាពរក្សាសន្តិភាពពិភពលោក និងស្ថាប័នអង្គការសហប្រជាជាតិនៅតែជាបញ្ហាប្រឈមនៅឡើយនាពេលបច្ចុប្បន្ន។ ការជំរុញនិងលើកកម្ពុជាទំនាក់ទំនងរវាងរដ្ឋដែលសកម្មក្នុងតំបន់ក្នុងការរក្សាសន្តិភាព ឬ រដ្ឋថ្មីថ្មោងដែលចង់ចូលរួមចែករំលែកការទទួលខុសត្រូវ ក្នុងការបង្កើតសនិ្តភាពជាមួយស្ថាប័នជំនាញដូចជាអង្គការសហប្រជាជាតិនោះជារឿងដែលសំខាន់បំផុត។
ដូចឃើញស្រាប់ រដ្ឋខ្លះចង់ចូលរួមចំណែក ប៉ុន្តែពួកគេនៅខ្វាយខ្វល់ពីសមត្ថភាព និងកម្រិតនៃការចូលរួម តើពួកគេអាចចូលរួមដូចម្តេច និងស្ថិតក្នុងកម្រិតណា។ ក្នុងនាមជាអ្នកជួយជ្រោមជ្រែងអង្គការសហប្រជាជាតិ និងភាគីពាក់ព័ន្ធក្នុងការបន្តការប្រឹងប្រែងបង្កើតសន្តិភាពជូនប្រជាជនពិភពលោកសហរដ្ឋអាមេរិកយល់ថាគម្លាតរវាងរដ្ឋដែលជាអ្នកចូលរួមនិងស្ថាប័ន អង្គការសប្រជាជាតិនិងស្ថាប័នពាក់ព័ន្ធចាំបាច់ត្រូវដោះស្រាយ។ ទំនាក់ទំនងកាន់តែជិតដិតគ្នារវាងរដ្ឋនិងអង្គការសហប្រជាជាតិ នឹងជួយធានាពីភាពជោគជ័យនៃការរៀបចំផែនការ ដែលធានាពីនិរន្តរភាពសកម្មភាពរក្សាសន្តិភាពពិភពលោក។
ជុំវិញបញ្ហានេះ លោកស្រីឧបការីរងរដ្ឋមន្ត្រីការបរទេសអាមេរិក Victoria Holt បានសង្កត់ធ្ងន់ថា ដើម្បីជំរុញឲ្យប្រតិបត្តិការរក្សាសន្តិភាពក្នុងតំបន់ ឬពិភពលោកឲ្យប្រសើរ មានប្រសិទ្ធភាពនិងធានាថារដ្ឋទាំងអស់មានលទ្ធភាពចូលរួមសកម្មក្នុងការកសាងសន្តិភាពពិភពលោក វាចាំបាច់ណាស់ត្រូវមានការធ្វើរួមគ្នានិងសហការគ្នាកាន់តែជិតស្និទ្ធ។ លោកស្រីបានសង្កត់ធ្ងន់ថាសហរដ្ឋអាមេរិកបន្តជួយជ្រោមជ្រែងភាគីពាក់ព័ន្ធជាពិសេសជួយជំរុញការសហការគ្នារវាងអង្គការសហប្រជាជាតិនិងប្រទេសនៅក្នុងតំបន់អាស៊ីប៉ាស៊ីហ្វិកនៅពេលខាងមុខទៀត។
គួរបញ្ជាក់ថា គេមិនឃើញ មានជម្លោះប្រដាប់អាវុធឬសង្គ្រាមថ្មីណាមួយផ្ទុះឡើងតំបន់អាស៊ីប៉ាស៊ីហ្វិកឡើយ។ នេះជាសញ្ញាវិជ្ជមានមួយដែលបញ្ជាក់ថា តំបន់នេះមិនត្រូវការកងកម្លាំងរក្សាសន្តិភាពពិភពលោកនោះទេ។ដោយសារគ្មានជម្លោះ ប្រទេសជាច្រើនបានបង្ហាញឆន្ទៈ ក្នុងសកម្មភាពរក្សាសន្តិភាពជាមួយអង្គការសប្រជាជាតិតាមរយៈការផ្តល់ជំនួយ និងបញ្ជូនកងទ័ពជាដើម៕
© រក្សាសិទ្ធិដោយ thmeythmey.com