ជាតិ
នយោបាយជាតិ
×![]()
ព្រះមហាក្សត្រកម្ពុជា បានចេញព្រះរាជក្រឹត្យ ប្រទានគោរមងារដល់មន្ត្រីជាន់ខ្ពស់គណបក្សប្រជាជនកម្ពុជាពីររូប គឺ លោក ស ខេង រដ្ឋមន្ត្រីក្រសួងមហាផ្ទៃ និងលោក សាយ ឈុំ ប្រធានព្រឹទ្ធសភា។ បើតាមព្រះរាជក្រឹត្យចុះថ្ងៃទី ១៤ ខែមិថុនា ព្រះបាទ សម្តេច នរោត្តម សីហមុនី បានប្រទានគោរមងារដល់លោក ស ខេង ឡើងជា «សម្តេចក្រឡាហោម ស ខេង» រីឯលោក សាយ ឈុំ មានងារជា «សម្តេចវិបុលសេនាភក្តី សាយ ឈុំ»។
ថ្វីដ្បិតែព្រះរាជក្រឹត្យចេញពីរដាច់ដោយឡែកពីគ្នាមែន តែព្រះរាជក្រឹត្យទាំងពីរនោះ មានខ្លឹមសារដូចគ្នា ដោយខុស តែឈ្មោះ និងងារប៉ុណ្ណោះ។ ក្នុងព្រះរាជក្រឹត្យដដែលនោះ ព្រះមហាក្សត្រ បានសរសើរ លោក សាយ ឈុំ និងលោក ស ខេង យ៉ាងនេះថា៖ «ជាអ្នកដឹកនាំដ៏ឆ្នើម ជាទីគោរពស្រឡាញ់របស់ប្រជារាស្ត្រ បានជួយដឹកនាំប្រទេសកម្ពជា តាមរដ្ឋធម្មនុញ្ញកម្ពុជាឆ្នាំ ១៩៩៣ បានចូលរួមកសាងប្រព័ន្ធច្បាប់ សម្រាប់ប្រើប្រាស់ជាឧត្តមប្រយោជន៍ដល់សង្គមជាតិ ទទួលបានសន្តិភាព ស្ថិរភាព ឯកភាពជាតិ ការអភិវឌ្ឍជាតិលើគ្រប់វិស័យ ការពារប្រជាធិបតេយ្យ និងមានកិច្ចសហប្រតិបត្តិការអន្តរជាតិល្អ ព្រមទាំងរក្សា បាននូវឯករាជ្យជាតិ និងបូរណភាពទឹកដី» ។
ព្រះមហាក្សត្រ ចាត់ទុកលោក ស ខេង និងលោក សាយ ឈុំ ថា ជាអ្នកដឹកនាំឆ្នើម ជាទីគោរពស្រឡាញ់របស់ប្រជារាស្ត្រ មានស្វាមីភក្តិចំពោះរាជបល័ង្គ ការពារនឹងគោរពព្រះពុទ្ធសាសនា ការពារយុត្តិធម៌សង្គមដើម្បីនិរន្តរភាពរាជានិយមនៃព្រះរាជាណាចក្រកម្ពុជា។
សូមបញ្ជាក់ថា លោក ស ខេង និងលោក សាយ ឈុំ ទទួលបានគោរមងារជាសម្តេចពីព្រះមហាក្សត្រនេះ បន្ទាប់ពីលោក ជា ស៊ីម ដែលមានងារ ជាសម្តេចអគ្គមហាធម្មពោធិសាលនិងជាប្រធានគណបក្សប្រជាជនកម្ពុជាទទួលមរណកាលពីថ្ងៃទី ០៨ ខែមិថុនា កន្លងទៅ។ ហើយវាជាពេលដែលគណបក្សប្រជាជនកម្ពុជា គ្រោងនឹងបើកមហាសន្និបាតរើសប្រធាន និងអនុប្រធានបក្សថ្មីផងដែរ។ លោក ហ៊ុន សែន ប្រាកដច្បាស់ហើយនឹងក្លាយជាប្រធានបក្ស រីឯ សាយ ឈុំ និង ស ខេង ដែលទើបឡើងងារជា សម្តេច ថ្មីថ្មោងនេះ ក្នុងចំណោមលោកទាំងពីរអាចនឹងមានអ្នកណាមួយជាប់ជាអនុប្រធានបក្ស៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 2 ថ្ងៃ
