នគរបាល​អន្តោប្រវេសន៍​បាន​រកឃើញ​ជនជាតិ​វៀតណាម និង​ចិន​ចំនួន ២១៥នាក់​ដែល កំពុង​រស់នៅ និង​ធ្វើការ​ខុសច្បាប់​នៅ​កម្ពុជា ព្រឹក​ថ្ងៃទី២៣មិថុនា នៅលើ​ទីតាំង​ការដ្ឋាន​ទីក្រុង​រណប​កោះ​ពេជ្រ។ ក្នុងចំណោម​ជនអន្តោប្រវេសន៍​ខុសច្បាប់​ទាំងនោះ មាន​ជនជាតិ១៣១នាក់ និង​ជនជាតិ​ចិន ៨៤នាក់។

 

ប្រធាន​នាយកដ្ឋាន​ស៊ើបអង្កេត និង​អនុវត្តន៍​នីតិវិធី អគ្គនាយកដ្ឋាន​អន្តោប្រវេសន៍ លោក អ៊ុក ហៃ​សិលា បាន​ប្រាប់​សារព័ត៌មានថ្មីៗថា ជនអន្តោប្រវេសន៍​ខុសច្បាប់​ទាំងពីរ​ជនជាតិ​នេះ កំពុងតែ​ស្នាក់នៅ និង​ធ្វើការ​ដោយ​ខុសច្បាប់​ក្នុង​ការដ្ឋាន​សំណង់​កោះ​ពេជ្រ។ មន្ត្រី​នៃ​អគ្គនាយកដ្ឋាន​អន្តោប្រវេសន៍​បាន​បន្តថា ភាគច្រើន​នៃ​ជនអន្តោប្រវេសន៍​ខុសច្បាប់​ដែល​ត្រូវបាន​ឃាត់ខ្លួន មិនមាន​លិខិតឆ្លងដែន និង​ទិដ្ឋាការ​សម្រាប់​ការ​ស្នាក់នៅ​ធ្វើ​ការងារ​រយៈពេល​វែង​នៅ​កម្ពុជា​នោះទេ។

 

បន្ទាប់ពី​ការឃាត់ខ្លួន​នេះហើយ ជនបរទេស​ទាំងអស់ ត្រូវបាន​បញ្ជូនទៅ​អគ្គនាយកដ្ឋាន​ជនអន្តោប្រវេសន៍ ដើម្បី​ធ្វើការ​អប់រំ​ណែនាំ​ពី​នីតិវិធី​សុំ​ធ្វើ​ទិដ្ឋាការ ក៏ដូចជា​លិខិតឆ្លងដែន មុននឹង​សមត្ថកិច្ច​បញ្ជូន​ពួកគេ​ទៅ​ស្រុកកំណើត​វិញ។ ហើយ​ថា ប្រសិនបើ​ជនបរទេស ណា​ម្នាក់ រឹងទទឹង​មិន​អនុវត្តតាម​ច្បាប់​នោះ សមត្ថកិច្ច​នឹង​ចាប់បញ្ជូន​ខ្លួន​ឡើង​តុលាការ តែម្តង។ នេះ​បើតាម​ការពន្យល់​របស់​លោក អ៊ុក ហៃ​សិលា។

 

លោក​បាន​រំ​ឮ​ក​ប្រាប់​សារព័ត៌មានថ្មីៗថា ចាប់តាំងពី​ការបង្កើត​អគ្គនាយកដ្ឋាន​អន្តោប្រវេសន៍ នៅ​ពាក់កណ្តាល​ឆ្នាំ២០១៤ មកដល់​ខែ ៦ ឆ្នាំ២០១៥នេះ សមត្ថកិច្ច​នៃ​អគ្គនាយកដ្ឋាន អន្តោប្រវេសន៍​បាន​ចាប់​ប​ញ្ជួ​ន​ខ្លួន​ជនបរទេស ខុសច្បាប់​ជាង ២ពាន់​នាក់ ដែលមាន ៤៣ សញ្ជាតិ ទៅ​ស្រុកកំណើត​ពួកគេ​វិញ។ ក្នុងចំណោម​នោះ ជនបរទេស​ខុសច្បាប់​ភាគច្រើន គឺជា​ជនជាតិ​វៀតណាម ដែលមាន​ជិត ២ពាន់​នាក់ បន្ទាប់មក​គឺជា​ជនជាតិ​ចិន៕