ជាតិ
នយោបាយជាតិ
មន្ត្រីព្រំដែនកម្ពុជា-វៀតណាម នាំគ្នាទៅមើលតំបន់ព្រំដែនដែលផ្ទុះហិង្សាដើម្បីស្វែងរកការពិត លោក រៀល ខេមរិន្រ្ទ នៅកណ្តាល ដែលត្រូវគេអម ក្រោយពីប៉ះទង្គិចគ្នាជាមួយវៀតណាម កាលពីថ្ងៃទី ២៨ ខែមិថុនា
× មន្ត្រីជាន់ខ្ពស់ព្រំដែនកម្ពុជា និងវៀតណាម នឹងធ្វើដំណើររួមគ្នាទៅពិនិត្យមើលតម្រុយបង្គោលព្រំដែនលេខ ២០៣ ស្ថិតក្នុងស្រុកកំពង់រោទិ៍ ខេត្តស្វាយរៀង ដែលជាកន្លែងផ្ទុះហិង្សារវាងពលរដ្ឋកម្ពុជា និងវៀតណាមកាលពីចុងខែមិថុនា កន្លងទៅ។ គោលដៅនៃដំណើរនេះ ធ្វើឡើងដើម្បីស៊ើបអង្កេតឲ្យច្បាស់ពីដើមហេតុ ដែលនាំឲ្យមានអំពើហិង្សានោះ។ តំណាងរាស្ត្រគណបក្សសង្គ្រោះជាតិ ស្វាគមន៍ការស៊ើបអង្កេតរបស់មន្ត្រីព្រំដែនកម្ពុជា និងវៀតណាមចំពោះករណីនេះ។
លោក ឡុង វីសាលោក ដែលជាអនុប្រធានគណៈកម្មាធិការព្រំដែនកម្ពុជា និងជាអនុរដ្ឋលេខាធិការក្រសួងការបរទេសកម្ពុជាផងនោះ ជាដឹកនាំមន្ត្រីព្រំដែនកម្ពុជា ទៅពិនិត្យមើលនៅតបន់កើតហេតុ ជាមួយមន្ត្រីព្រំដែនខាងវៀតណាម នៅថ្ងៃទី ១៦ ខែកក្កដា។ នេះបើតាមអ្នកស្រី កុយ ពិសី ដែលជាអនុប្រធានគណៈកម្មាធិការព្រំដែនកម្ពុជាមួយរូបផងដែរ។ អ្នកស្រី បានបន្ថែមប្រាប់សារព័ត៌មានថ្មីៗថា ដំណើររបស់មន្ត្រីព្រំដែនកម្ពុជានិងវៀតណាមទៅមើលតម្រុយបង្គោលព្រំដែនលេខ ២០៣ ស្ថិតនៅក្នុងភូមិត្នោត ឃុំធ្លក ស្រុកកំពុងរោទិ៍ ខេត្តស្វាយរៀង ដែលជាកន្លងផ្ទុះហិង្សារវាងពលរដ្ឋខ្មែរ និងវៀតណាម កាលពីថ្ងៃទី ២៨ ខែមិថុនា គឺដើម្បីស្រាវជ្រាវរករឿងពិតដែលនាំឲ្យមានហិង្សាកើតឡើង។ « លើសពីនេះ យើងចង់ដឹងថា តើខ្មែរយើងអ្នកខុស ឬវៀតណាមអ្នកខុស នៅពេលមានហិង្សាកើតឡើង។ ក្រោយពីដឹងលទ្ធផលយ៉ាងណានោះ យើងនឹងមានវិធានការតាមស្ថានការណ៍ការជាក់ស្តែង»។ នេះជាការបញ្ជាក់របស់អ្នកស្រី កុយ ពិសី។
ដំណើររបស់មន្ត្រីព្រំដែនកម្ពុជា និងវៀតណាមទៅកាន់កន្លែងផ្ទុះហិង្សានេះ ទទួលបានការស្វាគមន៍ពីលោក អ៊ុំ សំអាន តំណាងរាស្ត្រគណបក្សសង្គ្រោះជាតិ ដែលជាអ្នកដឹកនាំសកម្មជន និងនិស្សិតទៅកន្លែងដែលផ្ទុះហិង្សានោះ។ តែយ៉ាងណាលោក អ៊ុំ សំអាន បានស្នើឲ្យការស៊ើបអង្កេតរបស់មន្ត្រីព្រំដែនកម្ពុជា និងវៀតណាម ត្រូវធ្វើឡើងដោយឯករាជ្យ។ « កុំលម្អៀតទៅណា ត្រូវរកឲ្យឃើញអ្នកណាខុស អ្នកណាត្រូវ។ ពលរដ្ឋខ្មែរយើងដើរលើដីខ្មែរ គ្មានអាវុធក្នុងដៃសោះ ឯវៀតណាមមានសុទ្ធតែកាំភ្លើង និងព្រនង់តម្រង់មកវាយខាងយើងមុន»។ នេះជាការបញ្ជាក់របស់អ្នកតំណាងរាស្ត្រគណបក្សសង្គ្រោះជាតិខាងលើ។
សូមបញ្ជាក់ថា បើតាមរបាយការណ៍របស់អាជ្ញាធរខេត្កស្វាយរៀង អំពើហិង្សានៅតាមដែនកម្ពុជា និងវៀតណាមស្ថិតនៅស្រុកកំពង់រោទិ៍នោះ បានធ្វើឲ្យពលរដ្ឋកម្ពុជាយ៉ាងហោចណាស់១០ នាក់រងរបួស រីឯភាគីវៀតណាមរងរបួស៨នាក់។ ក្រោយកើតហេតុកម្ពុជា មិនបានសរសេរលិខិតថ្កោលទោសទៅខាងពលរដ្ឋវៀតណាមនោះទេ តែខាងក្រសួងការបរទេសវៀតណាមឯណោះវិញ បានចេញលិខិតថ្កោលទោសពលរដ្ឋកម្ពុជា ហើយថែមទាំងចាត់ទុកសកម្មភាពហិង្សានោះថា ប្រព្រឹត្តដោយជនជ្រុលនិយមកម្ពុជា ល្មើស សន្ធិសញ្ញា អនុសញ្ញា និងកិច្ចព្រមព្រៀងរវាងប្រទេសវៀតណាម និងកម្ពុជា៕
© រក្សាសិទ្ធិដោយ thmeythmey.com