ជាតិ
ជនភៀសខ្លួនរ៉ូហ៊ីងយ៉ាម្នាក់ ស្នើសុំចេញពីកម្ពុជាទៅរស់នៅប្រទេសភូមាវិញ
× ភ្នំពេញ៖ ជនភៀសខ្លួនជនជាតិភាគតិចរ៉ូហ៊ីងយ៉ាម្នាក់ បានស្នើសុំរដ្ឋាភិបាលកម្ពុជា តាមរយៈស្ថានទូតប្រទេសមីយ៉ាន់ម៉ា ប្រចាំប្រទេសកម្ពុជា ចាកចេញទៅរស់នៅក្នុង ប្រទេសមីយ៉ាន់ម៉ាវិញ ក្រោយពីគេស្ម័គ្រចិត្តចាកចេញពីកោះប៉ាស៊ីហ្វិកណូរុ (Nauru) មកស្នាក់នៅកម្ពុជាអស់ជាង ៤ខែ។
អ្នកនាំពាក្យក្រសួងមហាផ្ទៃលោក ខៀវ សុភ័គ ប្រាប់សារព័ត៌មានថ្មីៗនៅរសៀលថ្ងៃទី៤នេះថា ជនភៀសខ្លួនសញ្ជាតិរ៉ូហ៊ីងយ៉ាម្នាក់ ក្នុងចំណោមជនភៀសខ្លួន ៤នាក់ពីកោះប៉ាស៊ីហ្វិកណូរុ (Nauru) ដែលស្ម័គ្រចិត្តមករស់នៅកម្ពុជាកន្លងទៅ បានស្ម័គ្រចិត្តស្នើសុំរដ្ឋាភិបាលកម្ពុជា ចាកចេញទៅរស់នៅលើទឹកដីដើមកំណើតខ្លួនវិញ។ លោកបាននិយាយពីមូលហេតុនៃការ ស្ម័គ្រចិត្តចាកពីប្រទេសកម្ពុជាវិញថា ដោយសារបុរសជនជាតិភាគតិចរ៉ូហ៊ីងរូបនោះ នឹកស្រុកកំណើតរបស់គេ។
«រដ្ឋាភិបាលកម្ពុជា និងស្ថានទូតមីយ៉ាន់ម៉ាប្រចាំកម្ពុជា កំពុងសម្រួលឯកសារ ដើម្បីបញ្ជូន ជនភៀសខ្លួនរ៉ូហ៊ីងម្នាក់ ដែលបានស្ម័គ្រចិត្តស្នើសុំទៅរស់នៅប្រទេសដើមរបស់គេ»។ នេះជាការបញ្ជាក់របស់លោក ខៀវ សុភ័គ។ យ៉ាងណា អ្នកនាំពាក្យ មិនទាន់អាចបញ្ជាក់ពី កាលបរិច្ឆេទច្បាស់លាស់ថា នឹងបញ្ជូនខ្លួនជនភៀសខ្លួនរ៉ូហ៊ីងយ៉ាម្នាក់នោះ ពេលណានៅ ឡើយ។
គួររម្លឹកថា កាលពីព្រឹកថ្ងៃទី៤មិថុនា កន្លងទៅ ជនភៀសខ្លួនដំបូងទទួលយកការតាំងលំនៅថ្មីពីកោះប៉ាស៊ីហ្វិកណូរុបានមកដល់ភ្នំពេញ ក្រោមកិច្ចព្រមព្រៀងរវាងអូស្ត្រាលី-កម្ពុជាដែលត្រូវបានចុះហត្ថលេខាកាលពីចុងឆ្នាំ២០១៤ ។ ជនភៀសខ្លួនទាំងនោះ រួមមាន ជនជាតិរ៉ូហ៊ីងយ៉ាម្នាក់ និងជនជាតិអ៊ីរ៉ង់ ៣នាក់ (ស្រី១នាក់)។ រដ្ឋាភិបាលកម្ពុជាបានផ្តល់ទីលំនៅដល់ ពួកគេរស់នៅក្នុងខណ្ឌច្បារអំពៅ។
សូមបញ្ជាក់ផងដែរថា លោកនាយក រដ្ឋមន្ត្រី ហ៊ុន សែន នឹងទៅបំពេញទស្សនកិច្ចនៅប្រទេសអូស្ត្រាលី នៅដើមខែធ្នួខាងមុខ ដើម្បីពិភាក្សាជាមួយលោកនាយករដ្ឋមន្ត្រីអូស្ត្រាលី ក្នុងការអនុវត្តន៍អនុស្សារណៈស្តីពីជនភៀសខ្លួន ដែលភាគីទាំងពីរបានចុះហត្ថលេខាកាលពីខែ កញ្ញា ឆ្នាំ២០១៤ កន្លងមក។ កាលពីពេលថ្មីៗនេះ អូស្ត្រាលី បានស្នើឲ្យរដ្ឋាភិបាលកម្ពុជាសិក្សាទទួលយកជនភៀសខ្លួន ពីកោះប៉ាស៊ីហ្វិកណូរុ (Nauru) បន្ថែមទៀត៕
© រក្សាសិទ្ធិដោយ thmeythmey.com