ជាតិ
នយោបាយជាតិ
ការកើនកម្តៅនយោបាយនៅកម្ពុជា ធ្វើឲ្យ UN កាន់តែបារម្ភ
× លោកស្រី រ៉ូណា ស្ម៊ីត អ្នករាយការណ៍ពិសេស របស់អង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា បានសម្តែងការព្រួយបារម្ភយ៉ាងខ្លាំងពីស្ថាការណ៍នយោបាយនៅកម្ពុជា ដែលកំពុងតែកើនកម្តៅខ្លាំងឡើងៗ ក្នុងរយៈកាលចុងក្រោយនេះ។ នេះបើតាមសេចក្តីថ្លែងការណ៍របស់លោកស្រី ចុះនៅថ្ងៃទី២៣ វិច្ឆិកា ។
លោកស្រី រ៉ូណា ស្ម៊ីត បានអះអាងក្នុងសេចក្តីថ្លែងការណ៍នោះថា ភាពតានតឹងនេះ បានកើតឡើងចេញពីភាពមិនចុះសម្រុងគ្នារវាងគណបក្សធំៗទាំងពីរ គឺគណបក្សប្រជាជនកម្ពុជា និងគណបក្សសង្គ្រោះជាតិ។ បញ្ហា ដែលលោកស្រីលើកឡើងនោះគឺ ការប្រើអំពើហិង្សាដោយការវាយដំដ៏ធ្ងន់ធ្ងន់លើតំណាងរាស្ត្របក្សប្រឆាំងពីររូប គឺលោក គង់ សភា និងលោក ញ៉យ ចំរើន នៅក្បែរវិមានរដ្ឋសភា កាលពីថ្ងៃទី២៦តុលា និងការបោះឆ្នោតទម្លាក់លោក កឹម សុខា អនុប្រធានបក្សប្រឆាំងពីតំណែងអនុប្រធានទី១នៃរដ្ឋសភា ពីសំណាក់តំណាងរាស្ត្រពីបក្សកាន់អំណាច កាលពីថ្ងៃទី៣០តុលា។
អ្នករាយការណ៍ពិសេសរូបនេះ បានបន្ថែមថា បញ្ហាធំមួយទៀតនោះគឺ លោក សម រង្ស៊ី ប្រធានបក្សសង្គ្រោះជាតិ ត្រូវបានសមាជិកសភាខាងបក្សប្រជាជន បោះឆ្នោតដកអភ័យឯកសិទ្ធិរដ្ឋសភា ថែមទៀត ដោយសំអាងថា លោក សម រង្ស៊ី មានទោសព្រហ្មទណ្ឌ ដែលតុលាការចោទប្រកាន់ពីបទ បរិហារកេរ្តិ៍ជាសាធារណៈ និងញុះញង់ឲ្យមានការរើសអើង ប្រព្រឹត្តទៅនៅសារមន្ទីរជើងឯក កាលពីថ្ងៃទី១៧ ខែមេសា ឆ្នាំ២០០។ ក្រៅពីដកប្រធានបក្សប្រឆាំងរូបនេះពីសមាជិកសភាហើយ តុលាការ ក៏បានចេញដីការកោះហៅរូបលោកឲ្យចូលបំភ្លឺនៅថ្ងៃ៤ ខែធ្នូ ឆ្នាំ២០១៥ ខាងមុខ ផងដែរ ពាក់ព័ន្ធពីបទសមគំនិតក្នុងអំពើក្លែងបន្លំឯកសារសាធារណៈ ប្រើប្រាស់ឯកសារសាធារណៈក្លែង និងញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម។
លោក ស្រីសង្កត់ធ្ងន់ៗយ៉ាងនេះថា៖ «ស្ថានភាពនយោបាយដ៏ក្តៅគគុកទាំងនេះហើយ ដែលនាំឲ្យកម្ពុជាប្រឈមនឹងអស្ថិរភាពនយោបាយ និងអាចជួបគ្រោះថ្នាក់ផ្នែកសន្តិសុខ នៅពេលខាងមុខ»។
ក្រៅពីក្តីកង្វល់ពីស្ថានការណ៍មិនល្អទាំងនេះ លោកស្រី រ៉ូណា ស្ម៊ីត ក៏បានស្នើឲ្យអ្នកដឹកនាំនៃបក្សទាំងពីរ រួមទាំងតំណាងរាស្ត្រគ្រប់រូប គប្បីមានទំនួលខុសត្រូវខ្ពស់ ចំពោះស្ថេរភាពសង្គម និងប្រយោជន៍ប្រជាពលរដ្ឋ ដែលបានបោះឆ្នោតផ្តល់សេចក្តីទុកចិត្តដល់ខ្លួន។ លោកស្រីស្នើឡើងបែបនេះថា៖ «បក្សទាំងពីរ គួរបន្តពិភាក្សាគ្នាដើម្បីដោះស្រាយរួមគ្នា ជាជាងប្រើសារនយោបាយវាយប្រហារគ្នាទៅវិញទៅមក»៕
© រក្សាសិទ្ធិដោយ thmeythmey.com