ជាតិ
នយោបាយជាតិ
×![]()
នៅថ្ងៃទី៧ មករានេះ សម្តេចនាយករដ្ឋមន្ត្រី ហ៊ុន សែន បានបញ្ជាក់ម្តងទៀតពីការឈប់ផាកពិន័យបណ្ណបើកបរម៉ូតូកម្លាំង ១២៥cc ចុះក្រាម ស្របពេលសមត្ថកិច្ចចុះអនុវត្តន៍ច្បាប់ស្តីពី ចរាចរណ៍ផ្លូវគោកថ្មី រយៈពេល ៧ថ្ងៃរហូតមកនេះ។
សម្តេច ហ៊ុន សែន បានថ្លែងសារជាវីឌីអូបញ្ជាក់តាមរយៈទំព័រហ្វេសប៊ុកផ្ទាល់ថា រដ្ឋាភិបាលបានសម្រេចមិនតម្រូវអោយបង់ថ្លៃប្រឡងប័ណ្ណបើកបរម៉ូតូកម្លាំងម៉ាស៊ីន ១២៥cc ចុះក្រោម។ ហើយថា ប្រសិនបើពលរដ្ឋបានបង់ថ្លៃបណ្ណបើកបរម៉ូតូកម្លាំង ១២៥cc រួចហើយ ចង់បានថវិកាមកវិញនោះ ពលរដ្ឋត្រូវយកបណ្ណបើកបរប្រគល់អោយក្រសួង ដើម្បីទទួលយកថវិកាគ្រប់ចំនួនត្រឡប់វិញ។ ព្រមជាមួយគ្នា សម្តេចថា តម្លៃបង់ថ្លៃបណ្ណបើកបររថយន្ត ក៏នឹងត្រូវបញ្ចុះតម្លៃពាក់កណ្តាល នៃតម្លៃកាលពីមុនជូនពលរដ្ឋផងដែរ។
សម្តេចបានបន្តទៀតថា ពលរដ្ឋដែលកំពុងប្រើប្រាស់ម៉ូតូកម្លាំងម៉ាស៊ីន ១២៥cc ចុះក្រោម អាចឲ្យម៉ូតូទៅសមាជិកគ្រួសារ ឬអ្នកដទៃ ខ្ចី ឬប្រើប្រាស់បាន ទោះបីមានសមាជិកចំនួន ៣ ឬ៤នាក់ ឬច្រើនជាងនេះ ដោយមិនចាំបាច់ស្នើរសុំលិខិតបញ្ជាក់ពីអាជ្ញាធរមានសមត្ថកិច្ចឡើយ លើកលែងតែម្ចាស់ម៉ូតូយល់ព្រមអោយខ្ចីសម្រាប់ធ្វើដំណើរ។
សម្តេចមានប្រសាសន៍យ៉ាងដូច្នេះថា៖«ចាប់ពីពេលនេះតទៅ អស់កម្មអស់ពារហើយ ទៅលើបញ្ហាម៉ូតូដែលមានកម្លាំង ១២៥ cc ចុះក្រាម។ ហើយសូមកុំឆ្ងល់លើរឿងនេះទៀត ប្រសិនបើអាជ្ញាធរណារារាំង ទៅលើបញ្ហានេះ អ្នកនោះ គឺប្រឆាំងជាមួយនឹងផលប្រយោជន៍ស្របច្បាប់របស់ប្រជាជនដែលនាយករដ្ឋមន្ត្រី នៃព្រះរាជាណាចក្រកម្ពុជាផ្តល់ជូនប្រជាពលរដ្ឋ ដើម្បីដោះស្រាយការលំបាក បញ្ចប់ការលំបាក របស់ប្រជាជន»។
ទន្ទឹមគ្នានេះ សម្តេចបានអំពាវនាវប្រជាពលរដ្ឋឲ្យរៀនបើកបរបញ្ជាយានយន្ត និងច្បាប់ចរាចរណ៍ឲ្យបានច្បាស់លាស់ស្ទាត់ជំនាញ ព្រមទាំងចូលរួមរគោរពច្បាប់ចរាចរណ៍ទាំងអស់គ្នា៕
© រក្សាសិទ្ធិដោយ thmeythmey.com
