ជាតិ
នយោបាយជាតិ
ឯកឧត្តម សម រង្ស៊ី ថា រដ្ឋាភិបាលបង្កើតបញ្ហា ហើយដោះស្រាយបំភ័ន្តភ្នែករាស្ត្រ
× ប្រធានគណបក្សសង្គ្រោះជាតិ ឯកឧត្តម សម រង្ស៊ី ដែលកំពុងគេចខ្លួននៅក្រៅប្រទេស បានលើកយកវិធីបំភ័ន្តភ្នែកនិងបន្ទន់ចិត្តប្រជារាស្ត្ររបស់រដ្ឋាភិបាល មកសម្រាយរិះគន់នៅហ្វេសប៊ុករបស់ខ្លួន។
បង្ហោះនៅលើទំព័រហ្វេសប៊ុកខ្លួន ដោយភ្ជាប់ជាមួយកាសែត Cambodia daily ជាភាសាអង់គ្លេស ដែលមានចំណងជើងថា «Hun Sen Defend Value New Electronic Government» នោះ ឯកឧត្តម សម រង្ស៊ី បានចំអកទៅកាន់ប្រមុខរដ្ឋាភិបាលថា បានបង្កើតបញ្ហា១០០ជំពូកតាមអំណាចផ្ដាច់ការខ្លួន ហើយយូៗម្ដងដោះស្រាយបានបញ្ហាណាមួយនោះ រដ្ឋាភិបាលក៏យកសង្គមហ្វេសប៊ុកមកប្រកាសយ៉ាងអធិកអធម ដើម្បីបំភ័ន្តភ្នែកនិងបន្ទន់ចិត្តប្រជារាស្ត្រប៉ុណ្ណោះ។
ប្រមុខបក្សប្រឆាំងរូបនេះបានបន្ថែមដូច្នេះថា៖«គេបង្កើតបញ្ហា ១០០ ជំពូក ហើយដាក់បន្ទុកលើប្រជារាស្ត្រ ដោយសារតែគេធ្វើសេចក្តីសម្រេចតាមរបៀបផ្តាច់ការ និងប្រព្រឹត្តអំពើពុករលួយតាមអំពើចិត្ត។ តែយូរៗម្តង គេបន្ធូរបន្ថយភាពលំបាកខ្លះៗ ទាក់ទងទៅនឹងបញ្ហាណា ១ ហើយគេក៏ប្រកាសយ៉ាងអធិកអធម (ដូចជាតាមហ្វេសប៊ុក) អំពីការបន្ធូរបន្ថយនោះ។ តែចំពោះបញ្ហា ៩៩ ជំពូកទៀតដែលគេបានបង្កើត គេទុកឲ្យនៅដដែល ឬក៏គេធ្វើឲ្យកាន់តែធ្ងន់ធ្ងរថែមទៀតសម្រាប់ប្រជារាស្ត្ររងគ្រោះ»។
ការរិះគន់របស់ឯកឧត្តម សម រង្ស៊ី នេះ គឺធ្វើឡើងក្រោយពីសម្ដេចនាយករដ្ឋមន្ត្រី ហ៊ុន សែន បានប្រកាសថា រដ្ឋាភិបាលរបស់លោកនៅពេលនេះ គឺជារដ្ឋាភិបាលអេឡិចត្រូនិកដែលហៅតាមភាសាអង់គ្លេសថា E-government។ E-government ពីព្រោះ សម្តេច ហ៊ុន សែន ក៏មាន Page Facebook ផ្ទាល់ខ្លួន អាចឆ្លងឆ្លើយជាមួយពលរដ្ឋដោយផ្ទាល់ ដែលសម្ដេចចាត់ទុកថា ការប្រើប្រាស់បណ្ដេញសង្គមហ្វេសប៊ុកនៅពេលនេះ គឺជួយឲ្យលោកទទួលបានព័ត៌មានពិតប្រាកដពីប្រជាពលរដ្ឋ។ ប្រមុខរដ្ឋាភិបាលក៏បានបញ្ជាឲ្យមន្ត្រីតាមក្រសួង និងស្ថាប័ននានា តាមដានហ្វេសប៊ុកលោកដែរ ដើម្បីដោះស្រាយបញ្ហាលំបាករបស់ប្រជាពលរដ្ឋ ខណៈដែលអ្នកវិភាគយល់ថា យន្តការប្រើប្រាស់បណ្ដេញសង្គមហ្វេសប៊ុកនេះ គឺធ្វើឲ្យមន្ត្រីថ្នាក់ក្រោមធ្វើការច្រើនជាងមុន និងមិនហ៊ានផ្ដល់របាយការណ៍ក្លែងក្លាយដល់សម្ដេច ហ៊ុន សែន ទៀតឡើយ៕
Tag:
សម រង្ស៊ី
ហ៊ុន សែន
© រក្សាសិទ្ធិដោយ thmeythmey.com