ព្រះសីហនុ៖ សហគ្រិនវ័យក្មេងកម្ពុជាដែលស្ថិតនៅតំបន់ឆ្នេរសមុទ្រ ទទួលបានការគាំទ្រផ្នែកហិរញ្ញវត្ថុ ក្រោមមូលនិធិចំនួន២លានដុល្លារ ពីសហភាពអឺរ៉ុប(EU)។ មូលនិធិរបស់សហភាពអឺរ៉ុបដែលផ្តល់ឱ្យសហគ្រិនវ័យក្មេងតាមរយៈអង្គការ Action Education នេះ គឺសម្រាប់ផ្តល់ការបណ្តុះបណ្តាល បង្កើតការងារ និងលើកកម្ពស់ជីវភាពរស់នៅរបស់ពលរដ្ឋតំបន់ឆ្នេរដែលរងគ្រោះពីជំងឺកូវីដ-១៩។
ថវិកាសរុប២លានដុល្លារអាម៉េរិករបស់សហភាពអឺរ៉ុបបានផ្តល់ឱ្យសហគ្រិនវ័យក្មេងដែលនៅខេត្តជាប់សមុទ្រ រួមមានខេត្តព្រះសីហនុ កោះកុង កំពត និងកែប ដើម្បីចងក្រងបណ្ដាញសហគ្រិន ការចែករំលែក ការរៀនសូត្រពីធុរកិច្ច និងកសាងសមត្ថភាពយុវជនសម្រាប់កំណើនសេដ្ឋកិច្ចកម្ពុជា។ បើតាមលោក វន សំភាស់ នាយកប្រចាំកម្ពុជានៃអង្គការ Aide et Action (Action Education) កញ្ចប់ជំនួយនេះ គឺស្ថិតក្នុងគម្រោង សម្ព័ន្ធភាពដើម្បីការអភិវឌ្ឍប្រកបដោយចីរភាពនិងគាំទ្រសំឡេងដើម្បីសមធម៌ (COSAVED) សម្រាប់ជំរុញកំណើនសេដ្ឋកិច្ចនៅសហគមន៍នេសាទតំបន់ឆ្នេរ។
លោក វន សំភាស់ នាយកប្រចាំកម្ពុជានៃអង្គការ Aide et Action (Action Education)
លោក សំភាស់ បានបញ្ជាក់ថា៖ «គម្រោងនេះនឹងគាំទ្រ ដល់សហគ្រិនរួមទាំងអាជីវករខ្នាតតូច-មធ្យមដែលរហូតដល់ចំនួន២០៨កន្លែងនៅតាមតំបន់ឆ្នេរ ដើម្បីបង្កើនប្រសិទ្ធភាពប្រកួតប្រជែងកាន់តែប្រសើរឡើង។ លោកបន្តនិយាយដូច្នេះ៖«គម្រោងនេះយើងផ្តោតលើសហគមន៍ក្រីក្រដែលប្រឈមមុខនឹងការលំបាកបំផុត, អ្នករងផលប៉ះពាល់ពីការប្រែប្រួលអាកាសធាតុ, ពីជំងឺកូវីដ-១៩ និងកត្តាផ្សេងទៀត»។
បើតាមលោក សំភាស់ ការអនុវត្តគម្រោងនេះបានបង្ហាញពីការចូលរវាងតួអង្គសំខាន់ៗក្នុងវិស័យសាធារណៈ វិស័យឯកជន និងសង្គមស៊ីវិល ដើម្បីអភិវឌ្ឍសហគ្រាសធុនតូច និងមធ្យម ដែលជាឆ្អឹងខ្នងនៃសេដ្ឋកិច្ចជាតិ។ លោកបន្ថែមថា៖« យើងមានប្រហែល៨០គម្រោង ដែលសហគ្រិននិងអាជីវករខ្នាតតូច-មធ្យមត្រូវមករៀន ហើយនឹងទទួលបានមូលនិធិចន្លោះពី៣ ០០០ ទៅ ៣០ ០០០ដុល្លារ សម្រាប់ធ្វើអាជីវកម្ម»។
វិបត្តិនៃជំងឺកូវីដ-១៩និងសង្គ្រាមរវាងរុស្សីនិងអ៊ុយក្រែន បន្តជះឥទ្ធិពលដល់ការនាំចេញរបស់កម្ពុជា។ ក្នុងនោះ ការនាំកសិផលផ្សេងៗនិងទឹកមាត់ត្រចៀកកាំចូលទីផ្សារប្រទេសចិនក៏ត្រូវបានរឹតត្បិត ផងដែរ។ លោក សាត កុកអាន អ្នកចិញ្ចឹមនិងផ្គត់ផ្គង់សំបុកត្រចៀកកាំ ដែលមានទីតាំងនៅខេត្តព្រះសីហនុ បាននិយាយថា បច្ចុប្បន្នការនាំចេញសំបុកត្រចៀកកាំទៅប្រទេសចិនគឺពិបាក ដោយសារខាងគយចិនរឹតបន្តឹងលើការនាំចូលម្ហូបអាហារ ព្រោះគេខ្លាចមានមេរោគ។
លោក សាត កុកអាន អ្នកចិញ្ចឹមនិងផ្គត់ផ្គង់សំបុកត្រចៀកកាំ
«ប៉ុន្តែអនាគតបើរដ្ឋាភិបាលយើង ចុះអនុសារណៈនៃការយោគយល់គ្នា [MoU] សម្រាប់នាំចេញកសិផលហ្នឹង នោះវាការល្អចំពោះកសិករយើង ក៏ដូចអាជីវករយើងនៅស្រុកខ្មែរ»។ នេះជាការលើកឡើងរបស់លោក កុកអាន។ សំបុកត្រចៀក ដែលជាប្រភេទអាហារបំប៉នសុខភាពនិងសម្រស់ សហគ្រិនរូបនេះមានលទ្ធភាពផ្គត់ផ្គង់ទីផ្សាររាជធានីភ្នំពេញនិងខេត្តព្រះសីហនុ បានពី៣០ទៅ៥០គីឡូក្រាមក្នុងមួយខែ ជាមួយតម្លៃពី៦៥០ទៅ២០០០ដុល្លារ ក្នុងមួយគីឡូក្រាម។
លោក ហុង ហ៊ុនទី ប្រធានសមាគមសហគ្រិនវ័យក្មេងកម្ពុជាសាខាព្រះសីហនុ
សម្រាប់លោក ហុង ហ៊ុនទី ប្រធានសមាគមសហគ្រិនវ័យក្មេងកម្ពុជាសាខាព្រះសីហនុ បានប្តេជ្ញាជួយដល់អ្នកធ្វើធុរកិច្ចនៅក្នុងខេត្តរបស់ខ្លួនឱ្យកាន់តែប្រសើរ។ លោកបន្តនិយាយក្នុងពិធីដាក់ឱ្យដំណើរការគម្រោង COSAVED នារសៀលថ្ងៃទី៨កក្កដា ឆ្នាំ២០២២យ៉ាងដូច្នេះ៖ « ពិសេសយើងបង្កើនលទ្ធភាពទទួលបានព័ត៌មានអាជីវកម្ម ទីផ្សារ និងការពង្រឹងសមត្ថភាព ក៏ដូចជាពង្រីកបណ្តាញអាជីវកម្មក្នុងខេត្ត ក្នុងប្រទេស និងលើឆាកអន្តរជាតិ សម្រាប់សហគ្រិននិងម្ចាស់អាជីវកម្មក្នុងខេត្តផ្ទាល់»។
ជាមួយគ្នានេះ លោក ប៉ិច បូឡែន អនុប្រធានប្រតិបត្តិសមាគមសហគ្រិនវ័យក្មេងកម្ពុជា (YEAC) បានលើកឡើងថា YEACនឹងបង្កើនកិច្ចសហការជាមួយស្ថាប័នពាក់ព័ន្ធនានា ដើម្បីធានាឱ្យមានការប្រកួតប្រជែងថ្នាក់តំបន់ លើធុរកិច្ចបែបបច្ចេកវិទ្យាឌីជីថល អាជីវកម្មបែបបរិយាប័ន្ន ការចៃប្រឌិត និងការបង្កើតថ្មីរបស់សហគ្រាសធុនមីក្រូតូច និងមធ្យមMSME នៅកម្ពុជា។
លោក ប៉ិច បូឡែន អនុប្រធានប្រតិបត្តិសមាគមសហគ្រិនវ័យក្មេងកម្ពុជា (YEAC)
បើតាមលោក បូឡែន មកទល់បច្ចុប្បន្ន YEAC មានសមាជិកចំនួន៤៥០នាក់ ដែលមានអាជីវកម្មប្រមាណ៨០០នៅទូទាំងប្រទេស។ លោក បានបញ្ជាក់ថា សហគ្រិនវ័យក្មេងកម្ពុជាសាខាព្រះសីហនុនេះ គឺជាសាខាទី៦បន្ទាប់ពីខេត្តសៀមរាប កំពង់ចាម ត្បូងឃ្មុំ បាត់ដំបង បន្ទាយមានជ័យ និងក្រចេះ៕