លោក សុន ឆ័យ ប្រាប់អ្នកកាសែតក្រោយចេញពីតុលាការថា តំណាងអយ្យការ ប្រហែលជាត្រូវការពេល២សប្តាហ៍ ទើបសម្រេចយកបណ្តឹងរបស់គណបក្សប្រជាជនកម្ពុជា ទៅចាត់ការបន្តតាមនីតិវិធី ឬតម្កល់ទុកមិនចាត់ការតាមសំណើរបស់លោក។ លោក បញ្ជាក់ដូច្នេះថា៖«ខ្ញុំ ហាក់ដូចជាមិនយល់ថា មានហេតុផលអី ដែលត្រូវឡើងមកតុលាការ ត្រូវប្តឹងផ្តល់មកតុលាការ។ ខ្ញុំ ឆ្លើយព្រឹកមិញហើយ ហើយសុំឲ្យគេតម្កល់បណ្តឹងកុំឲ្យចាត់ការ»។ 

លោក សុខ ឥសាន អ្នកនាំពាក្យគណបក្សប្រជាជនកម្ពុជា ចំអកឲ្យថា ពេលឡើងដល់តុលាការ លោក សុន ឆ័យ ក៏ធ្វើជាតួកម្សត់។ អ្នកនាំពាក្យគណបក្សកាន់អំណាចរូបនេះ សរសេរក្នុងបណ្តាញតេឡេក្រាមដែលប្រមូលផ្តុំដោយក្រុមអ្នកកាសែតដូច្នេះថា៖«ការនិយាយលេងរបស់លោក សុន ឆៃ ធ្វើឲ្យលោក ជាប់គុកមែនទែន បើតុលាការកាត់សេចក្តី»។

 

លោក សុន ឆ័យ មើលឃើញថា ហាក់ដូចជាមិនមានភាពចាំបាច់អ្វី ដែលគណបក្សប្រជាជនកម្ពុជា ត្រូវប្តឹងលោកនោះទេ ហើយការប្តឹងនេះ ក៏មិនមានប្រយោជន៍ដល់គណបក្សប្រជាជនកម្ពុជា និងគណបក្សភ្លើងទៀនដែរ។ ជាមួយគ្នានេះ លោក ការពារខ្លួនថា អ្វីដែលលោក អត្ថាធិប្បាយជុំវិញភាពមិនប្រក្រតីនៃដំណើរការបោះឆ្នោតឃុំ-សង្កាត់អាណត្តិទី៥នេះ គឺមានសំអាង និងមូលដ្ឋាន។ លោក បដិសេធថា លោក ពុំបាននិយាយខុសការពិត បំផ្លើស ឬបង្ខូចកេរ្តិ៍អ្នកណាឡើយ។ 

 

អនុប្រធានគណបក្សភ្លើងទៀនរូបនេះ បានអធិប្បាយជាមួយសារព័ត៌មាន ឌឹ ខេមបូឌា ដេលី ថា ដំណើរការបោះឆ្នោតឃុំ-សង្កាត់អាណត្តិទី៥នេះ ត្រូវបានគ្រប់គ្រងស្ទើរទាំងស្រុងដោយគណបក្សតែមួយ ដែលលោក ចង់សំដៅលើគណបក្សកាន់អំណាច។ លោក ថែមទាំង លើកឡើងទៀតថា ការរាប់សន្លឹកឆ្នោតមានការលួចបន្លំ។ 

 

ដោយមិនអាចទទួលយកបានចំពោះសម្តីរបស់លោក សុន ឆ័យ គណបក្សប្រជាជនកម្ពុជា និងគណៈកម្មាធិការជាតិរៀបចំការបោះឆ្នោត (គ.ជ.ប) បានធ្វើបណ្តឹងប្តឹងលោក ទៅតុលាការ។ គណបក្សកាន់អំណាច ទាមទារឲ្យលោក បង់ប្រាក់ជិត១លានដុល្លារជាការសងជំងឺចិត្ត ខណៈគ.ជ.ប គ្រាន់តែចង់បានការសុំទោសពីលោកប៉ុណ្ណោះ។ លោក បានចូលបំភ្លឺតាមបណ្តឹងរបស់គ.ជ.ប រួចហើយ កាលពីថ្ងៃទី១២ ខែកក្កដា ឆ្នាំ២០២២៕