ជាតិ
សេដ្ឋកិច្ច
ទំហំពាណិជ្ជកម្មអន្តរជាតិកម្ពុជា សម្រេចបាន៤៦,៨ពាន់លានដុល្លារ ធ្លាក់ជិត២% ក្នុងឆ្នាំ២០២៣ ទិដ្ឋភាព ឡានកុងតឺន័រដឹកជញ្ជូនចេញចូលកម្ពុជា-វៀតណាម តាមច្រកព្រំដែនបាវិតខេត្តស្វាយរៀង នាពេលកន្លងមក
× ក្នុងឆ្នាំ២០២៣ កម្ពុជាសម្រេចទំហំពាណិជ្ជកម្មអន្តរជាតិ បានចំនួន៤៦,៨ ពាន់លានដុល្លារ។ ទំហំនេះ គឺធ្លាក់ ១,៩ភាគរយ ធៀបនឹងឆ្នាំ២០២២ ដែលមានតម្លៃ៤៧,៧ ពាន់លានដុល្លារ។ នេះបើយោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា ដែលបានបង្ហាញថា ក្នុងនោះ ការនាំចេញរបស់កម្ពុជាមានតម្លៃជិត២២ ៦៤៥លានដុល្លារ កើន១,៨ភាគរយ។ រីឯការនាំចូលវិញធ្លាក់៥ភាគរយ។
របាយការណ៍ដដែលបានបញ្ជាក់ថា ផលិតផលឧស្សាហកម្មកាត់ដេរនៅតែជាទំនិញនាំមុខគេ ក្នុងការនាំចេញដែលមានតម្លៃរហូតដល់ជិត៨០០០លានដុល្លារ ខណៈអាម៉េរិក ចិន វៀតណាម ថៃ និងជប៉ុន ជាដៃគូពាណិជ្ជកម្មដ៏ធំរបស់កម្ពុជា។ ក្រៅពីនេះ កម្ពុជាមានប្រទេសដៃគូពាណិជ្ជកម្មធំៗចំនួន១៥ឯទៀត ផងដែរ។ ក្នុងនោះ មានកាណាដា ឥណ្ឌូណេស៊ី អង់គ្លេស តៃវ៉ាន់ សិង្ហបុរី បារាំង និងកូរ៉េខាងត្បូង ជាដើម។
សម្រាប់ទំហំពាណិជ្ជកម្មជាមួយប្រទេសជិតខាង ពោលប្រទេសថៃ គឺបានធ្លាក់ចុះខ្លាំងទៅដល់១៧ភាគរយ ។ ប៉ុន្តែ ទំហំពាណិជ្ជកម្មរបស់កម្ពុជានេះ បែរទៅកើនជាមួយវៀតណាមជាង៧ភាគរយ បើធៀបនឹងកាលឆ្នាំ២០២២។
ជាមួយគ្នានេះ មុខទំនិញសំខាន់ៗដែលកម្ពុជាបានចេញទៅកាន់ទីផ្សាររបស់ប្រទេសខាងលើនោះមានវិស័យវាយនភណ្ឌ ជាវិស័យនាំមុខគេក្នុងការនាំចេញដែលមានចំណូលខ្ពស់នៅឆ្នាំ ២០២៣។ ក្រៅពីនេះ មានគ្រាប់ធញ្ញជាតិ ម៉ាស៊ីន និងឧបករណ៍អគ្គិសនី វត្ថុធ្វើអំពីស្បែក បរិកា្ខរធ្វើពីរោមសត្វ ស្បែកជើង កៅស៊ូ និងផលិតផលធ្វើពីកៅស៊ូ បន្លែ និងផ្លែឈើស្រស់....។
ជុំវិញនៃទំហំពាណិជ្ជកម្មជាមួយប្រទេសដៃគូនេះ ត្រូវបានអ្នកជំនាញសេដ្ឋកិច្ចនៅរាជបណ្ឌិត្យសភាកម្ពុជា លោកបណ្ឌិត ហុង វណ្ណៈ មើលឃើញថា ការធ្លាក់ចុះនៃការចូលនាំរបស់កម្ពុជា គឺបណ្តាលមកពីវិស័យលក់រាយក្នុងស្រុកមានភាពជាប់គាំង។ ជាមួយគ្នានេះ កំណើនផលិតកម្មក្នុងស្រុក ក៏កំពុងរុញឱ្យកម្ពុជាក្លាយជាទីតាំងផ្គត់ផ្គត់ទំនិញឱ្យទីផ្សារអន្តរជាតិកាន់តែច្រើន ផងដែរ។ លោកបានប្រាប់សារព័ត៌មានថ្មីៗ(ThmeyThmey) យ៉ាងដូច្នេះ ៖ « ជញ្ជីងពាណិជ្ជកម្មអន្តរជាតិរបស់កម្ពុជាដែលពីមុនមានឱនភាពខ្លាំងនោះ នឹងអាចឈានទៅមានឧត្តមភាពវិញនាពេលអនាគតឆាប់ៗ»។
លោកបណ្ឌិត ហុង វណ្ណៈ លើកឡើងបែបនេះ ក៏ព្រោះតែមើលឃើញពីគោលនយោបាយបើកចំហ លក្ខខណ្ឌអំណោយផលក្នុងស្រុក និងមានទីផ្សារនាំចេញទៅប្រទេសដៃគូក្រោមលក្ខខណ្ឌពន្ធ ដែលកំពុងរុញឱ្យសេដ្ឋកិច្ចកម្ពុជាបោះជំហានទៅមុខគួរឱ្យកត់សម្គាល់។ ពិសេសក្នុងពេលដែលពិភពលោកកំពុងជួបនឹងបញ្ហាជាច្រើនដូចពេលនេះ។
បច្ចុប្បន្ន កម្ពុជាកំពុងអនុវត្តកិច្ចព្រមព្រៀងពាណិជ្ជកម្មសេរីជាមួយប្រទេសចិន ប្រទេសកូរ៉េខាង និងកិច្ចព្រមព្រៀងសេដ្ឋកិច្ចគ្រប់ជ្រុងជ្រាយតំបន់(អាសិប) ដែលកំពុងជំរុញឲ្យមានកំណើននាំចេញកាន់ទីផ្សារអន្តរជាតិ៕
© រក្សាសិទ្ធិដោយ thmeythmey.com