លោក ស៊ឹម ភីរុណ អ្នកជំនាញហិរញ្ញវត្ថុ និងជានាយកប្រឹក្សាហិរញ្ញវត្ថុនៅក្រុមហ៊ុន CoGen សង្កេតឃើញថា រយៈពេលចុងក្រោយនេះ​អ្នករកស៊ីផ្តល់កម្ចីក្រៅផ្លូវការ បានដាក់ខសន្យាមិនសុចរិតមួយចំនួនដល់អ្នកប្រើកម្ចីមិនអាចអនុវត្តបានតាមផ្លូវច្បាប់។ បើតាមការពន្យល់របស់អ្នកជំនាញរូបនេះ អ្នកខ្ចីប្រាក់ក្រៅផ្លូវការ ប្រឈមនឹងការបង់ថ្លៃសេវាពី១០ទៅ២០ភាគរយ​ ហើយអត្រាការប្រាក់ក៏ខ្ពស់ខ្លាំង ជាពិសេស គឺរងនូវការពិន័យខ្ពស់នៅពេលសងយឺត។​ 

 

លោក ភីរុណ បន្តនិយាយដូច្នេះ៖ « បំណុលនោះនឹងកើនពីមួយថ្ងៃទៅមួយថ្ងៃ ធ្វើឱ្យយើងជំពាក់លុយគេច្រើនមែនទែន​ ក្នុងរយៈពេលខ្លី។ ក្នុងស្ថានភាពបែបនេះ យើងលក់ទ្រព្យអស់ហើយដើម្បីសងគេ តែមិនគ្រប់នៅបន្តជំពាក់គេ នោះយើងធ្លាក់ក្នុងបំណុលវ័ណ្ឌកហើយ ខណៈគេនៅតែគុណការប្រាក់ គុណការពិន័យមកលើយើង»។