ចាប់តាំងពីដើមឆ្នាំ២០២៤មក រលកតវ៉ារបស់កសិករអឺរ៉ុប បានកើតមាននៅទូទាំងតំបន់។ ចុងក្រោយនេះ កសិករបារាំង និងប៉ូឡូញ ក៏ជួបជុំគ្នាបង្ហាញការមិនពេញចិត្តរបស់ពួកគេនៅតាមទីក្រុងនានា ដោយយកគ្រឿងយន្តកសិកម្មបាំងផ្លូវដើម្បីតវ៉ាតែម្ដង។

 

តាមពិតទៅ កសិករនៅអឺរ៉ុប មិនពេញចិត្តគោលនយោបាយបរិស្ថានរបស់ប្លុកដែលមានសមាជិក២៧ប្រទេសនេះឡើយ ពិសេសកិច្ចព្រមព្រៀងបៃតងដែលទាមទារឱ្យកំណត់ការប្រើប្រាស់ជីកសិកម្ម និងការបញ្ចេញឧស្ម័នផ្ទះកញ្ចក់ ដែលធ្វើឱ្យកសិផលពួកគេមានតម្លៃខ្ពស់ជាងទំនិញរបស់ប្រទេសក្រៅសហភាពអឺរ៉ុប។ 

 

កសិករអឺរ៉ុប ក៏ត្អូញត្អែរពីការនាំចូលផលិតផលកសិកម្មពីប្រទេសផ្សេងដែលមានតម្លៃថោកជាង ពិសេសទំនិញពីអាម៉េរិកឡាទីន និងអ៊ុយក្រែនជាដើម ដែលធ្វើឱ្យប៉ះពាល់ទីផ្សារក្នុងតំបន់។

 

នៅបារាំង កសិករប្រទេសនេះ ក៏ប្រឆាំងគោលនយោបាយកសិកម្មរបស់រដ្ឋាភិបាលលោក អេម៉ានុយអែល ម៉ាក្រុង ។ ការសន្យាកែទម្រង់ដែលឆ្លើយតបការតវ៉ានៅខែមករា មិនបានបន្សាបកំហឹងកសិករបារាំងឡើយ។ គម្រោងជជែកដេញដោលលើរឿងនេះអំឡុងពិព័រណ៍កសិកម្មនៅប៉ារីស ក៏ត្រូវបានលោក ម៉ាក្រុង លុបចោលថែមទៀត។

 

ឯទឹកដីប៉ូឡូញវិញ កសិករប្រទេសនេះ ក៏រារាំងការឆ្លងដែនរវាងប៉ូឡូញ និងអ៊ុយក្រែន ដោយបង្ហាញការមិនពេញចិត្តចំពោះអ្វីដែលពួកគេចាត់ទុកជាការប្រកួតប្រជែងមិនយុត្តិធម៌ និងលំហូរផលិតផលមានតម្លៃទាបរបស់អ៊ុយក្រែនមានគ្រាប់ធញ្ញជាតិ និងជីកសិកម្មជាដើម។ ក្រោយការឈ្លានពានរបស់រុស្ស៊ី អ៊ុយក្រែនទទួលបានការអនុគ្រោះយ៉ាងខ្លាំងពីប្លុកអឺរ៉ុប៕