RFI
អន្តរជាតិ
ក្រុមហ៊ុនចិនជាប់សង្ស័យថាលួចយកទិន្នន័យនិងការសម្ងាត់រដ្ឋាភិបាលបរទេសជាង១០ប្រទេស ការិយាល័យក្រុមហ៊ុនចិន I-Soon AP - Dake Kang
×
ដោយ៖ហេង ឧត្តម/RFI
ក្រុមហ៊ុនចិនមួយ ជំនាញបច្ចេកវិទ្យាព័ត៌មានវិទ្យា ត្រូវជាប់សង្ស័យថាបានចូលលួចយកទិន្នន័យរបស់អង្គការអន្តរជាតិ, អង្គការអូតង់ ព្រមទាំង លួចទិន្នន័យនិងការសម្ងាត់រដ្ឋាភិបាលបរទេស ជាង១០ ប្រទេស។ នេះបើតាមក្រុមអ្នកជំនាញអាមេរិក ខាងសន្តិសុខបច្ចេកវិទ្យាព័ត៌មានវិទ្យា ដែលបានចេញរបាយការណ៍និងបង្ហាញភស្តុតាង នៅក្នុងសប្តាហ៍នេះ។ ថ្ងៃព្រហស្បតិ៍ ទី២២កុម្ភៈ អ្នកនាំពាក្យក្រសួងការបរទេសចិន បានបដិសេធថាពុំពាក់ព័ន្ធនឹងរដ្ឋាភិបាលចិនឡើយ។
-
ក្រុមហ៊ុនចិនមួយ ឈ្មោះថា I-Soon បានប្រើបច្ចេកវិទ្យាអ៊ីនធ័រនែត ចូលលួចទិន្នន័យ និងការសម្ងាត់រដ្ឋាភិបាលបរទេស ជាង ១០ ប្រទេស រួមទាំងបណ្តាអង្គការស៊ីវិល ដែលគាំទ្រលទ្ធិប្រជាធិបតេយ្យហុងកុង។ នេះបើតាមការបញ្ជាក់របស់ ក្រុមអ្នកជំនាញអាមេរិក នៃ ក្រុមហ៊ុនសន្តិសុខបច្ចេកវិទ្យាព័ត៌មានវិទ្យា ចំនួន២ គឺ SentinelLabs និង Malwarebytes។ ក្រុមអ្នកជំនាញអាមេរិក ខាងសន្តិសុខបច្ចេកវិទ្យាព័ត៌មានវិទ្យា ក៏អះអាងទៀតថា មានភស្តុតាងដែលថាក្រុមហ៊ុនចិននេះ បានធ្វើសកម្មភាពទៅលើបណ្តាក្រសួងសំខាន់ៗជាច្រើន របស់ ប្រទេសឥណ្ឌា ថៃ វៀតណាម កូរ៉េខាងត្បូង និងប្រទេសផ្សេងទៀត។
ឯកសារភស្តុតាងរបស់អ្នកជំនាញអាមេរិក មានបង្ហាញពីករណី១ដែល ក្រុមហ៊ុនចិន I-Soon បានទាក់ទងជាមួយនឹងអាជ្ញាធរចិនក្នុងតំបន់ស៊ីនជាំង ប៉ែកពាយ័ព្យនៃផ្ទៃប្រទេសចិន ដើម្បីធ្វើប្រតិបត្តិការលួចយកទិន្នន័យតាមបច្ចេកវិទ្យាព័ត៌មានវិទ្យា។ មិនតែប៉ុណ្ណេះ ភស្តុតាងផ្សេងឲ្យដឹងដែរថា ពេលកន្លងទៅ ក្រុមហ៊ុនចិន I-Soon នេះ ក៏បានប្រកាសផ្តល់សេវាកម្មខាងបច្ចេកវិទ្យាព័ត៌មានជាច្រើន ជាអាទិ៍ លួចឆ្មក់ចូលក្នុងប្រព័ន្ធទូរសព្ទដើម្បីទាញស្រង់ទិន្នន័យ, មិនចំពោះថាទូរសព្ទ IPhone របស់ក្រុមហ៊ុនApple ឬក្រុមហ៊ុនទូរសព្ទផ្សេងឡើយ។ សេវាកម្មផ្សេងទៀត ដូចជា ចូលទាញយកព័ត៌មានទិន្នន័យចេញពីឧបករណ៍ស្តុកទុកទិន្នន័យចល័ត, សេវាកម្មតាមដានគណនីរបស់អ្នកប្រើប្រាស់បណ្តាញសង្គមណាមួយ និងសេវាកម្មចូលលួចមើលការឆ្លើយឆ្លងសារឯកជន ជាដើម។
តាំងមូលដ្ឋានស្នាក់ការកណ្តាលនៅខេត្តសៀងហៃ ក្រុមហ៊ុនចិន I-Soon ក៏មានការិយាល័យ នៅ រដ្ឋធានីប៉េកាំង និងនៅខេត្តក្រុងជាច្រើនផ្សេងទៀតដែរ រួមទាំងខេត្តស៊ីឈួន ប៉ែកនិរតី នៃផ្ទៃប្រទេស។
ថ្ងៃព្រហស្បតិ៍ ទី២២ កុម្ភៈ ទីភ្នាក់ងារព័ត៌មានបារាំងអាអេហ្វប៉េ បានទាក់ទងសុំការបំភ្លឺពីអ្នកតំណាងក្រុមហ៊ុន I-Soon ដែរ តែគ្មានចម្លើយតប។ ថ្ងៃដដែល វិបសាយក្រុមហ៊ុនចិន I-Soon បើកលែងចេញទេ។
ទន្ទឹមនោះ អាជ្ញាធររដ្ឋអំណាចចិន អះអាងថាពុំបានដឹងពីករណីសំណុំរឿងនេះឡើយ។ ឆ្លើយនឹងសំណួរអ្នកកាសែតនៅក្នុងសន្និសីទសារព័ត៌មានពីក្រុងប៉េកាំង អ្នកស្រី ម៉ៅ នីង អ្នកនាំពាក្យក្រសួងការពារចិន មានប្រសាសន៍ថា សំណុំរឿងនេះជាករណីល្មើសខុសច្បាប់ និងថា ជាគោលការណ៍ រដ្ឋាភិបាលចិន បដិសេធរាល់គ្រប់ទម្រង់នៃការវាយប្រហារតាមបច្ចេកវិទ្យាព័ត៌មានវិទ្យា៕
© រក្សាសិទ្ធិដោយ thmeythmey.com