ចាប់តាំងពីថ្ងៃទី២០ ខែកុម្ភៈមក វេជ្ជបណ្ឌិតកម្មសិក្សានៅកូរ៉េខាងត្បូងជាច្រើនពាន់នាក់ បានលាឈប់ពីការងារជាបន្តបន្ទាប់ ដើម្បីតវ៉ានឹងផែនការរដ្ឋាភិបាលក្នុងការដំឡើងចំនួននិស្សិតចូលរៀនពេទ្យ។ រដ្ឋាភិបាលកូរ៉េខាងត្បូង ចង់ដំឡើងចំនួនសិស្សចូលរៀនពេទ្យ២ពាន់នាក់ទៀត បន្ថែមពីលើចំនួន ៣ពាន់នាក់ នៅក្នុងពេលបច្ចុប្បន្ន។ 

 

ការតវ៉ារបស់វេជ្ជបណ្ឌិតកម្មសិក្សា បានបង្កឱ្យមន្ទីរពេទ្យសំខាន់ៗក្នុងក្រុងសេអ៊ូល ត្រូវខ្វះពេទ្យ ខណៈការវះកាត់ និងផ្នែកផ្សេងទៀត ត្រូវកាត់បន្ថយ។ ស្របពេលមន្ទីរពេទ្យស្ថិតនៅក្នុងស្ថានភាពអាសន្នបែបនេះ រដ្ឋមន្រ្តីមហាផ្ទៃកូរ៉េខាងត្បូង ប្រកាសមិនដាក់ពិន័យលើវេជ្ជបណ្ឌិតកម្មសិក្សា ដែលចូលរួមក្នុងការតវ៉ានៅពេលកន្លងមក។ 

 

«ប្រឈមនឹងស្ថានភាពពិបាកក្នុងពេលបច្ចុប្បន្ន ខ្ញុំសូមអំពាវនាវលើកចុងក្រោយ... រដ្ឋាភិបាល នឹងមិនឱ្យទទួលខុសត្រូវសម្រាប់សកម្មភាពអតីតកាល ប្រសិនបើអ្នកត្រលប់មកមន្ទីរពេទ្យត្រឹមថ្ងៃទី២៩ ខែកុម្ភៈ»។ លោក Lee Sang-min រដ្ឋមន្រ្តីមហាផ្ទៃកូរ៉េខាងត្បូង បានសង្កត់ធ្ងន់បែបនេះ នៅក្នុងកិច្ចប្រជុំរដ្ឋាភិបាលមួយ ក្នុងថ្ងៃទី២៦ ខែកុម្ភៈ។

 

ដោយមើលឃើញពីស្ថានភាពលំបាកខ្លាំងក្នុងមន្ទីរពេទ្យ ដែលត្រូវការវេជ្ជបណ្ឌិតជួយសង្រ្គោះអ្នកជំងឺ លោក Lee បានបង្ហាញថា មន្ទីរពេទ្យសំខាន់ៗក្នុងក្រុងសេអ៊ូល បានកាត់បន្ថយការវះកាត់រហូតដល់ ៥០ភាគរយ និងបានបង្កការលំបាកចំពោះអ្នកជំងឺយ៉ាងខ្លាំង។ 

 

ដោយចាត់ទុកជាការអំពាវនាវលើកចុងក្រោយ រដ្ឋមន្រ្តីមហាផ្ទៃរូបនេះ បានចាត់ទុកការតវ៉ារបស់វេជ្ជបណ្ឌិតកម្មសិទ្ធិ មិនទទួលបានផលចំណេញអ្វីនោះទេ ហើយមានតែបង្កឱ្យមាន​ផល​ប៉ះពាល់ដល់ជីវិត និងសុខភាពរបស់ប្រជាពលរដ្ឋប៉ុណ្ណោះ។ 

 

តាមរយៈការជំទាស់រយៈពេល ១សប្តាហ៍មកនេះ វេជ្ជបណ្ឌិតកម្មសិក្សា បានអំពាវនាវឱ្យរដ្ឋាភិបាល គិតគូរពីសំឡេងប្រឆាំងរបស់ពួកគេ តាមរយៈការដំឡើងប្រាក់បៀវត្ស និងទទួលបន្ទុកការងារមិនច្រើនពេក។ 

 

ដើម្បីព្រមានវេជ្ជបណ្ឌិតកម្មសិក្សា និងវេជ្ជបណ្ឌិតបន្តចូលរួមកូដកម្មខាងលើ រដ្ឋាភិបាលកូរ៉េខាងត្បូង បានព្រមានចេញដីកាចាប់ខ្លួន និងលុបចោលអាជ្ញាប័ណ្ណវេជ្ជបណ្ឌិតចោល។ ក្រោម​ហេតុផលដំឡើងចំនួនសិស្សចូលរៀនពេទ្យនេះ រដ្ឋាភិបាលក្រុងសេអ៊ូល បានថ្លែងការពារថា ជាការដោះស្រាយបញ្ហាខ្វះខាតចំនួនវេជ្ជបណ្ឌិត នៅតាមតំបន់ជនបទដាច់ស្រយាល៕