គណៈកម្មការនិយតកម្មមូលបត្រចិន (CSRC) នៅថ្ងៃទី១៨ ខែមីនា ទើបតែបានប្រកាសពិន័យជាប្រាក់ចំនួន ៤,១៧៥ពាន់លានយ័ន (៥៨០លានដុល្លារ) ចំពោះក្រុមហ៊ុន Hengda Real Estate សម្រាប់ការបំប៉ោងប្រាក់ចំណូលប្រហែល ២១៤ពាន់លានយ័ន (២៩,៧ពាន់លានដុល្លារ) ក្នុងឆ្នាំ២០១៩ និង ៣៥០ពាន់លានយ័ន (៤៨,៦ពាន់លានដុល្លារ) ក្នុងឆ្នាំ២០២០ នៅលើរបាយការណ៍​ប្រចាំឆ្នាំ។

 

តាម​​គណៈកម្មការនិយតកម្មមូលបត្រចិន ក្រុមហ៊ុន Hengda បានបំប៉ោងប្រាក់ចំណូល ដើម្បីទាក់ទាញវិនិយោគិនឱ្យទិញប័ណ្ណភាគហ៊ុនរបស់ក្រុមហ៊ុនក្នុងឆ្នាំ២០២០ និង ២០២១ ដែលមានតម្លៃ ២០​​​​​​​​,៨ពាន់លានយ័ន (២,៩ពាន់លានដុល្លារ) ដែលអាជ្ញាធរចាត់ទុកថាជាឧក្រិដ្ឋកម្មនៃការក្លែងបន្លំហិរញ្ញវត្ថុ។

 

ចំនួនទឹកប្រាក់បានកើនឡើងប្រមាណពាក់កណ្តាលនៃចំណូលសរុបរបស់ Hengda ក្នុងឆ្នាំ២០១៩ និង៧៩ភាគរយក្នុងឆ្នាំ ២០២០។ ទន្ទឹមនេះ ប្រាក់ចំណេញរបស់ក្រុមហ៊ុនក៏កើនហួសប្រមាណ ៦៣ភាគរយនិង ៨៧ភាគរយរៀងគ្នាក្នុងរយៈពេលពីរឆ្នាំនោះ។

 

គណៈកម្មការនិយតកម្មមូលបត្រ បានចោទប្រកាន់ស្ថាបនិក និងជាប្រធានក្រុមហ៊ុន Evergrande លោក Hui Ka Yan ថាបានបញ្ជាបុគ្គលិកឱ្យបំផ្លើសទិន្នន័យអាជីវកម្មរបស់ Hengda ក្នុងអំឡុងពេលពីរឆ្នាំនោះ។ បើតាម CSRC ប្រធាន Evergrande ត្រូវទទួលខុសត្រូវចំពោះការយឺតយ៉ាវក្នុងការចេញផ្សាយរបាយការណ៍ប្រាក់ចំណូលរបស់ Hengda និងការមិនបង្ហាញពីបំណុលដែលនៅសេសសល់ ព្រមទាំងពាក្យបណ្តឹងទៅក្រុមហ៊ុននាពេលកន្លងមក។

 

បន្ថែមពីការពិន័យចំពោះក្រុមហ៊ុន Hengda លោក Hui Ka Yan ក៏ត្រូវបានពិន័យជាប្រាក់ចំនួន ៤៧លានយ័ន (៦,៥លានដុល្លារ) ពីបទក្លែងបន្លំព័ត៌មាន និងការរំលោភបំពានផ្សេងៗទៀត។ លោកក៏ត្រូវបានហាមឃាត់មិនឱ្យចូលរួមក្នុងសកម្មភាពទីផ្សារមូលធនអស់មួយជីវិត។ អតីតនាយកប្រតិបត្តិ Evergande លោក Xia Haijun និង CFO Pan Darong និងនាយកផ្សេងទៀតក៏ត្រូវបានពិន័យដោយនិយតករចិន និងហាមឃាត់ពីទីផ្សារមូលធនដែរ។

 

ធ្លាប់ជាមហាសេដ្ឋីទីពីរនៅអាស៊ីដែលមានទ្រព្យសម្បត្តិមានតម្លៃ ៤២ពាន់លានដុល្លារនៅកម្រិតកំពូលក្នុងឆ្នាំ២០១៧ ទ្រព្យសម្បត្តិរបស់លោក Hui Ka Yan បានធ្លាក់ចុះប្រហែល ១ពាន់លានដុល្លារបន្ទាប់ពី Evergrande ជំពាក់បំណុលគេនៅឆ្នាំ២០២១។ ភាគហ៊ុនរបស់ក្រុមហ៊ុននេះបានធ្លាក់ចុះ ហើយទីបំផុតត្រូវបានផ្អាកការជួញដូរ។ ក្រុមហ៊ុន Evergrande ទទួលបានដីការំលាយទ្រព្យសម្បត្តិពីតុលាការហុងកុងក្នុងខែមករា ដែលជាការដួលរលំដ៏ធំបំផុតនៅក្នុងវិបត្តិអចលនទ្រព្យរយៈពេលបីឆ្នាំនៅចិន៕