លោក ថោង ខុន គ្រោងស្នើកញ្ចប់ថវិកាពិសេសពីរដ្ឋាភិបាល សម្រាប់កែលម្អផ្លូវថ្នល់ និងលូ នៅខេត្តព្រះសីហនុ

ជាតិ

លោក ថោង ខុន គ្រោងស្នើកញ្ចប់ថវិកាពិសេសពីរដ្ឋាភិបាល សម្រាប់កែលម្អផ្លូវថ្នល់ និងលូ នៅខេត្តព្រះសីហនុ

02, Oct 2018 , 11:29 am

រូបភាព

ដោយ: ថ្មីៗ

ព្រះសឹហនុ៖ ក្រសួងទេសចរណ៍ គ្រោងដាក់សំណើសុំកញ្ចប់ថវិកាពិសេសពីរដ្ឋាភិបាល សម្រាប់កែលម្អផ្លូវថ្នល់ និងលូ នៅខេត្តព្រះសីហនុ ក្រោយពីហេដ្ឋារចនាសម្ព័ន្ធ នៅទីនោះខូចខាតស្ទើទាំងស្រុង។

លោក ថោង ខុន រដ្ឋមន្ត្រីក្រសួងទេសចរណ៍ បានបញ្ជាក់ថា ការគ្រប់គ្រងអភិវឌ្ឍតំបន់ឆ្នេរសមុទ្រ ឲ្យមានលក្ខណៈធម្មជាតិនោះ គប្បីដោះស្រាយបញ្ហាសំរាម និងរៀបចំបរិស្ថានឲ្យបានល្អ។ ទន្ទឹមនឹងនេះការដោះស្រាយបញ្ហាផ្លូវថ្នល់ និងប្រព័ន្ធលូ ដែលជាចំណុចអាទិភាព សម្រាប់ការអភិវឌ្ឍទីក្រុងទេសចរណ៍ នាទិសនីរតីនេះ។

ថ្លែងក្នុងកិច្ចប្រជុំពិនិត្យការអភិវឌ្ឍ និងផលប៉ះពាល់បរិស្ថាន ផ្លូវ ថ្នល់ និងប្រពន្ធ័លូ ក្នងក្រុងព្រះសីហនុ លោក ថោង ខុន បានបញ្ជាក់ដូច្នេះថា៖«ដើម្បីអភិវឌ្ឍន៍ក្រុង ខេត្តប្រកបដោយចីរភាព ត្រូវមានដូចជា គោលការណ៍ច្បាប់ , ធនធានមនុស្ស ,និងថវិកា ។ ដូច្នេះយើងត្រូវរៀបចំគម្រោងស្នើសុំកញ្ចប់ថវិកាពិសេសមួយ ទៅប្រមុខរាជរដ្ឋាភិបាល ដើម្បីយកមកកែលម្អ ស្ដារហេដ្ឋារចនាសម្ព័ន្ធផ្លូវថ្នល់ លូ និងបរិស្ថានឲ្យក្លាយជាទីក្រុងបៃតង និងលើកកម្ពស់វិស័យទេសចរណ៍ក្នុងការអភិវឌ្ឍសេដ្ឋកិច្ចបៃតង និងកសាងសង្គមប្រកបដោយបរិស្ថានល្អ កាត់បន្ថយផលប៉ះពាល់ដល់ប្រជាពលរដ្ឋ ភ្ញៀវទេសចរជាតិ អន្តរជាតិនៅពេលខាងមុខ»។

កាលពីពេលថ្មីៗនេះ អភិបាលខេត្តព្រះសីហនុ បានឲ្យក្រុមហ៊ុនចិនចំនួន៦ សិក្សាពីគម្រោងសាងសង់ហេដ្ឋារចនាសម្ព័ន្ធនៅខេត្តព្រះសីហនុ បន្ទាប់ពីមានការរងខូចខាតស្ទើរតែទាំងស្រុង ក្នុងរយៈពេលចុងក្រោយនេះ។ ការអនុញ្ញាតនេះ ធ្វើឡើងតាមសំណើរបស់ក្រុមហ៊ុនចិនទាំងនោះ។

អត្ថបទទាក់ទង

លោក យន្ត មីន ឲ្យក្រុមហ៊ុនចិនសិក្សាគម្រោងកសាងផ្លូវ និងលូ នៅខេត្តព្រះសីហនុ ក្រោយខូចស្ទើរទាំងស្រុង

វិស័យទេសចរណ៍ខេត្តព្រះសីហនុ បានជំរុញវិស័យសេដ្ឋកិច្ច ឱ្យកាន់តែមានភាពរីកចម្រើនឈានឡើងជាលំដាប់។ ដោយឡែកចំពោះសេវាកម្មសម្បទាទេសចរណ៍វិញ ក៏មានការកើនឡើងគួរឱ្យកត់សម្គាល់ផងដែរ ទាំងសណ្ឋាគារកម្រិតជាតិ និងកម្រិតអន្តជាតិ ។ បច្ចុប្បន្ននេះ ខេត្តព្រះសីហនុ មានអាជីវកម្មសរុបចំនួន៨៧០ទីតាំង កើនឡើង៨៣ទីតាំង ស្មើនឹង ១០.៥៥% បើប្រៀបធៀបនឹង ៩ខែ ក្នុងឆ្នាំ២០១៧ ។ ខេត្តនេះ មានសណ្ឋាគារចំនួន ៨៨ ផ្ទះសំណាក់ចំនួន ៣១១ បឹងហ្គាឡូ ១០ ភោជនីយដ្ឋាន និងអាហារដ្ឋាន ២៩១ និងបណ្តាមូលដ្ឋានអាជីវកម្មផ្សេងៗទៀតជាច្រើនកន្លែង។ នេះបើតាមលោក យន្ត មីន អភិបាលខេត្តព្រះសីហនុ។

កន្លងមករដ្ឋាភិបាលកម្ពុជា បានប្រកាសប្រែក្លាយខេត្តព្រះសីហនុទៅជា «តំបន់សេដ្ឋកិច្ចពិសេសគំរូពហុបំណង» ស្របតាមគោលនយោបាយអភិវឌ្ឍន៍វិស័យឧស្សាហកម្មកម្ពុជាឆ្នាំ ២០១៥-២០២៥ ។ ជាមួយគ្នានេះ រដ្ឋាភិបាល រំពឹងថា ប្រាក់ចំណូលរបស់ប្រជាពលរដ្ឋម្នាក់ៗទទួលបាន ២,៣៧៣ ដុល្លា អាមេរិក ជាមួយនឹងអត្រាកំណើនសេដ្ឋកិច្ច ៧.៩ភាគរយ និងកាត់បន្ថយអត្រាភាពក្រីក្រចុះមកត្រឹម ១១.៧២ភាគរយ នៅឆ្នាំ ២០៣០ផងដែរ៕