លោក ជា សុផារ៉ា បញ្ជូនមន្ត្រីជំនាញ៦ក្រុម ទៅពិនិត្យការដ្ឋានសំណង់ នៅខេត្តព្រះសីហនុ ក្រោយសង្ស័យថា មានសំណង់ខុសច្បាប់

ជាតិ

លោក ជា សុផារ៉ា បញ្ជូនមន្ត្រីជំនាញ៦ក្រុម ទៅពិនិត្យការដ្ឋានសំណង់ នៅខេត្តព្រះសីហនុ ក្រោយសង្ស័យថា មានសំណង់ខុសច្បាប់

04, Oct 2018 , 3:14 pm

រូបភាព

រូបពីហ្វេសប៊ុកក្រសួងរៀបចំដែនដី នគរូបនីកម្ម និងសំណង់

ដោយ: ថ្មីៗ

ភ្នំពេញ៖ ក្រសួងរៀបចំដែនដី នគរូបនីយកម្ម និងសំណង់ បានបញ្ជូនមន្ត្រីជំនាញ ៦ក្រុម ទៅខេត្តព្រះសីហនុ ដើម្បីត្រួតពិនិត្យការដ្ឋានសាងសង់ ដែលសង្ស័យថា គ្មានការអនុញ្ញាតត្រឹមត្រូវពីក្រសួង។ ការបញ្ជូនមន្ត្រីជំនាញនេះ ធ្វើឡើងក្រោយពីក្រសួងរៀបចំដែនដី រកឃើញថា រដ្ឋបាលខេត្តព្រះសីហនុ អនុវត្តផ្ទុយពីគោលការណ៍ក្រសួង លើការគ្រប់គ្រងសំណង់នេះ។

មន្ត្រីជំនាញ ដែលក្រសួងបញ្ជូនទៅខេត្តព្រះសីហនុនេះ មានភារកិច្ចចុះតាមដាន និងត្រួតពិនិត្យការដ្ឋានសំណង់ស្ថិតនៅក្នុងភូមិសាស្ត្រខេត្តព្រះសីហនុ លើការអនុវត្តស្របតាមលិខិតអនុញ្ញាតសាងសង់ ច្បាប់ និងលិខិតបទដ្ឋានគតិយុត្ត និងបច្ចេកទេស។ ក្រោយពីរកឃើញចំណុចអវិជ្ជមានហើយ ក្រុមមន្ត្រីទាំងនោះ នឹងត្រូវធ្វើរបាយការណ៍ការងារ មកកាន់ក្រសួងវិញ ដើម្បីត្រួតពិនិត្យ និងសម្រេច។ នេះបើតាមលោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ។

មូលហេតុដែលក្រសួង បញ្ជូនមន្ត្រីជំនាញទៅខេត្តព្រះសីហនុនេះ ដោយសារតែការដ្ឋានសំណង់ជាច្រើននៅទីនោះ កំពុងដំណើរការសាងសង់ (ខ្លះជិតរួចរាល់ទាំងស្រុងទៅហើយ) ដោយពុំមានលិខិតអនុញ្ញាតសាងសង់ពីក្រសួងឡើយ ពោលគឺមានតែគោលការណ៍ឲ្យដំណើរការសាងសង់ ដែលចេញពីរដ្ឋបាលខេត្តព្រះសីហនុប៉ុណ្ណោះ។ ក្រសួងរៀបចំដែនដី បានបញ្ជាក់ថា លិខិតអនុញ្ញាតសាងសង់ ដែលចេញរដ្ឋបាលខេត្តនេះ គឺផ្ទុយពីស្មារតីនៃអនុក្រឹត្យរដ្ឋាភិបាល ស្តីពីលិខិតអនុញ្ញាតសាងសង់។

លិខិតក្រសួងមហាផ្ទៃ ដែលផ្ញើទៅអភិបាលខេត្តព្រះសីហនុ បានបញ្ជាក់ដូច្នេះថា៖«ក្រសួងស្នើឲ្យរដ្ឋបាលខេត្តព្រះសីហនុ បញ្ឈប់ការចេញលិខិតអនុញ្ញាតជាគោលការណ៍ ដល់ម្ចាស់សំណង់ឲ្យដំណើរការសាងសង់ មុនទទួលបានលិខិតអនុញ្ញាតសាងសង់ ពីស្ថាប័នមានសមត្ថកិច្ច និងត្រូវពង្រឹងការគ្រប់គ្រងការដ្ឋានសាងសង់ឲ្យគោរពតាមច្បាប់ បទដ្ឋានគតិយុត្ត និងបច្ចេកទេសជាធរមាន»។

ការផ្ដល់គោលការណ៍សាងសង់ ដោយពុំមានការអនុញ្ញាតពីក្រសួងនេះ វាអាចបណ្ដាលឲ្យកើតមានបទល្មើសសំណង់ ផលប៉ះពាល់សណ្ដាប់ធ្នាប់សាធារណៈ សោភណ្ឌភាព និងគុណភាពសំណង់ជាដើម។ នេះជាការបញ្ជាក់របស់ក្រសួងរៀបចំដែនដី៕