ជាតិ
នយោបាយជាតិ
ព្រោះតែរឿងក្តី លោក កឹម សុខា ខានទៅវត្ត៣ឆ្នាំជាប់គ្នា ក្នុងពិធីបុណ្យភ្ជុំបិណ្ឌ
លោក កឹម សុខា ពិសាអាហារជាមួយភរិយានិងម្តាយ នៅផ្ទះរបស់លោក ក្រោយចេញពីពន្ធនាគារត្រពាំងផ្លុង នៅថ្ងៃទី១០ ខែកញ្ញា ឆ្នាំ២០១៨។ រូបពីហ្វេសប៊ុក Chantha Muth
×![]()
ដោយ: សារព័ត៌មានថ្មីៗ
ភ្នំពេញ៖ ក្នុងរដូវបុណ្យភ្ជុំបិណ្ឌឆ្នាំនេះ លោក កឹម សុខា អតីតប្រធានគណបក្សសង្គ្រោះជាតិ ខកខាតទៅវត្តម្តងទៀត។ លោក មិនអាចចេញទៅណាឲ្យហួសពីព្រំដែនកំណត់នោះទេ បើគ្មានការអនុញ្ញាតពីតុលាការ។
លោក ផែង ហេង មេធាវីម្នាក់របស់លោក កឹម សុខា បានប្រាប់សារព័ត៌មានថ្មីៗ តាមទូរសព្ទថា បើលោក កឹម សុខា ចង់ទៅវត្ត លុះត្រាតែទទួលបានការអនុញ្ញាតពីចៅក្រមស៊ើបសួរជាមុនសិន។ លោក បន្តថា លោក កឹម សុខា មានបំណងចង់ទៅវត្ត តែក្រោយមក ក៏សម្រេចចិត្តមិនទៅវិញ ដោយសារតែស្មុគស្មាញក្នុងការសុំទៅចៅក្រមស៊ើបសួរ។
មេធាវីរូបនេះ បានបញ្ជាក់បែបនេះថា៖«យើង ដឹងហើយថា ចៅក្រមស៊ើបសួរ កំណត់ទំហំដែនដីឲ្យគាត់ធ្វើដំណើរ ហើយក្នុងបរិវេណដែលកំណត់ហ្នឹង អត់មានវត្តទេ។ ដំបូង យើងចង់សុំទៅចៅក្រមស៊ើបសួរដែរ តែនីតិវិធីមើលទៅដូចជាស្មុគស្មាញពេក យើងក៏លុបចោលវិញ»។
ថ្វីដ្បិត លោក កឹម សុខា ត្រូវបានដោះលែងពីពន្ធនាគារ ឲ្យទៅរស់នៅក្នុងផ្ទះរបស់លោកមែន ប៉ុន្តែ ចៅក្រមស៊ើបសួរនៃសាលាដំបូងរាជធានីភ្នំពេញ បានដាក់បម្រាមយ៉ាងតឹងរឹងចំពោះលោក។ បើតាមបម្រាមនោះ លោក កឹម សុខា មិនអាចធ្វើដំណើរទៅណាមកណាឆ្ងាយពីផ្ទះនោះទេ ហើយក៏មិនអាចជួបជនបរទេស ដែលពាក់ព័ន្ធនឹងសំណុំរឿង រួមទាំងអ្នកនយោបាយនៃអតីតគណបក្សប្រឆាំងផងដែរ។
នេះជាឆ្នាំទី៣ហើយ ដែលលោក កឹម សុខា មិនបានទៅវត្តក្នុងរដូវបុណ្យភ្ជុំបិណ្ឌ។ កាលពីរដូវបុណ្យភ្ជុំបិណ្ឌឆ្នាំ២០១៧ លោក ខានទៅវត្ត ដោយសាតែលោក ជាប់ឃុំកក្នុងពន្ធនាគារត្រពាំងផ្លុង ខេត្តត្បូងឃ្មុំ។ សមត្ថកិច្ច បានចាប់លោក កាលពីយប់ថ្ងៃទី២ ឈានចូលថ្ងៃ៣ ឆ្នាំ២០១៧ ពោលគឺ នៅមុនតែពី២-៣ថ្ងៃប៉ុណ្ណោះ នៃការមកដល់ពិធីបុណ្យភ្ជុំបិណ្ឌ។
ចំណែក កាលពីរដូវបុណ្យភ្ជុំបិណ្ឌឆ្នាំ២០១៦ លោក កឹម សុខា ក៏មិនបានទៅវត្តដែរ ដោយសារតែលោក ឃុំខ្លួនឯងក្នុងទីស្នាក់ការកណ្តាលគណបក្សសង្គ្រោះជាតិ។ មូលហេតុ ដែលលោក ឃុំខ្លួនឯង គឺដោយសារតែលោក មិនចង់ចូលទៅបំភ្លឺនៅតុលាការ ក្នុងសំណុំរឿងមួយ។
ការសម្ងំក្នុងទីស្នាក់ការ ដោយមិនព្រមចូលទៅបំភ្លឺនៅតុលាការតាមការកោះហៅ បានធ្វើឲ្យអតីតប្រធានគណបក្សប្រឆាំង រងបទចោទ «បដិសេធក្នុងការចូលខ្លួន»។ កាលនោះ តុលាការ បានកាត់ទោសលោក ឲ្យជាប់ពន្ធនាគារ៥ខែ៕
Tag:
កឹម សុខា
ភ្ជុំបិណ្ឌ
© រក្សាសិទ្ធិដោយ thmeythmey.com
