ជាតិ
ព្រំដែន
មេដឹកនាំកម្ពុជា-ឡាវ ប្តេជ្ញាបញ្ចប់បញ្ហាព្រំដែនឲ្យបានឆាប់ ជំនួបរវាងនាយករដ្ឋមន្ត្រីកម្ពុជា-ឡាវ នៅថ្ងៃទី៥ ខែធ្នូ ឆ្នាំ២០១៨។ រូបពីទំព័រហ្វេសប៊ុករបស់សម្តេច ហ៊ុន សែន
× ទាំងរដ្ឋាភិបាលកម្ពុជា ទាំងរដ្ឋាភិបាលឡាវ សុទ្ធតែមិនចង់ទុកបញ្ហាព្រំដែន ឲ្យបន្តអូសបន្លាយយូរទៀតទេ។ ក្នុងជំនួប ដែលធ្វើឡើងនៅថ្ងៃទី៥ ខែធ្នូ ឆ្នាំ២០១៨ នាយករដ្ឋមន្ត្រីនៃប្រទេសទាំងពីរ បានបង្ហាញឆន្ទៈរួមគ្នា ក្នុងការដោះស្រាយបញ្ហាព្រំដែន ឲ្យបានលឿន តាមតែអាចធ្វើទៅបាន។
ក្រោយពិភាក្សាគ្នារួច នាយករដ្ឋមន្ត្រីទាំងពីរ បានធ្វើសន្និសីទមួយ ដើម្បីបំភ្លឺពីរឿងនេះ។ មេដឹកនាំទាំងពីរ បានអះអាងក្នុងសន្និសីទថា កម្ពុជា-ឡាវ បានដាក់លក្ខខណ្ឌបីយ៉ាងលើតំបន់ព្រំដែន ដែលមិនទាន់ដោះស្រាយ គឺទីមួយ មិនឲ្យមានកងកម្លាំងប្រដាប់អាវុធ ទីពីរ មិនឲ្យប្រជាជនទៅរស់នៅនិងធ្វើអាជីវកម្ម ហើយទីបី បើដាក់ល្បាតត្រួតពិនិត្យ ត្រូវដាក់ទាំងអស់គ្នា។
និយាយដល់តំបន់ដែលមិនទាន់ដោះស្រាយ មេដឹកនាំកម្ពុជា-ឡាវ ក៏បានលើកឡើងពីដំណោះស្រាយភ្លាម។ កម្ពុជា-ឡាវ បានព្រមព្រៀងគ្នារួចហើយ ថានឹងធ្វើលិខិតទៅកាន់លោក អេម៉ានុយអែល ម៉ាក្រុង ប្រធានាធិបតីបារាំង ដើម្បីសុំឲ្យជួយផ្ទេរផែនទីបោនខ្នាត១/១០០០០០ មកផែនទីអ៊ុយធីអិម (UTM) ខ្នាត១/៥០០០០។ លើសពីនេះ ភាគីទាំងពីរ ក៏បានស្នើឲ្យរដ្ឋាភិបាលបារាំង ជួយផ្តល់ឯកសារ ដែលទាក់ទងនឹងព្រំដែនផងដែរ ដើម្បីយកមកដោះស្រាយ ក្នុងតំបន់ដែលនៅសេសសល់។
មេដឹកនាំកម្ពុជា បានបញ្ជាក់យ៉ាងដូច្នេះថា៖«យើង អំពាវនាវឲ្យរដ្ឋាភិបាលបារាំងជួយផ្តត់ផ្គង់ឯកសារទាំងឡាយណា ដែលផ្តល់ប្រយោជន៍ក្នុងការដោះស្រាយបញ្ហាព្រំដែននៃប្រទេសពីរ។ ខ្ញុំនិងឯកឧត្តម ថងលូន ស៊ីសូលីត បានឯកភាពគ្នាថា យើង គួរតែបញ្ចប់បញ្ហាព្រំដែនក្នុងដំណាក់កាលរបស់យើងនេះឲ្យបានឆាប់»។
តាមរយៈអ្នកបកប្រែ លោក ថងលូន ស៊ីសូលីតនាយករដ្ឋមន្ត្រីឡាវ បានថ្លែងយ៉ាងដូច្នេះថា៖«យើង បានឯកភាពនិងសហការគ្នាយ៉ាងជិតស្និទ្ធ ដើម្បីដោះស្រាយបញ្ហាព្រំដែន»។
សូមបញ្ជាក់ថា គណៈប្រតិភូកម្ពុជា បានទៅបំពេញទស្សនកិច្ចនៅឡាវ ពីថ្ងៃទី៥ដល់ថ្ងៃទី៦ ខែធ្នូ ឆ្នាំ២០១៨។ បន្ទាប់មក គណៈប្រតិភូកម្ពុជា នឹងបន្តទៅបំពេញទស្សនកិច្ចនៅវៀតណាម ពីថ្ងៃទី៦ ដល់ថ្ងៃទី៨ ខែធ្នូ៕
Tag:
កម្ពុជា-ឡាវ
ព្រំដែន
© រក្សាសិទ្ធិដោយ thmeythmey.com