អន្តរជាតិ
ជប៉ុនបណ្ដេញទាហាន៥រូប ក្រោយរកឃើញកំហុសបៀតបៀនអ្នករួមការងារ អតីតសមាជិកយោធាជប៉ុន Rina Gonoi (ឆ្វេង) ទទួលការសុំទោសពីមន្ត្រីក្រសួងការពារជាតិជប៉ុននាពេលកន្លងមក។ រូបថត AFP
× យោធាជប៉ុននៅថ្ងៃទី១៥ ខែធ្នូ បានបណ្ដេញបុគ្គលិកកងទ័ព៥នាក់ និងដាក់ទណ្ឌកម្មលើ៤នាក់ទៀត ដែលបានជាប់ពាក់ព័ន្ធករណីរំលោភបំពានផ្លូវភេទលើអ្នករួមការងារ។ ក្រសួងការពារជាតិជប៉ុនបញ្ជាក់ថា រឿងក្ដីនេះបានជំរុញឱ្យមានការស៊ើបអង្កេតដ៏កម្រមួយនៅទូទាំងក្រសួង ហើយបានរកឃើញពាក្យបណ្តឹងនៃការបៀតបៀនផ្លូវភេទជាង១០០ករណីផ្សេងទៀត។
ក្រសួងការពារជាតិជប៉ុនបានបណ្ដេញបុគ្គលិកយោធា៥នាក់ និងដាក់ទោស៤នាក់ផ្សេងទៀតដែលទាក់ទងនឹងករណីបៀតបៀនផ្លូវភេទលើអតីតមិត្តរួមការងារជាទាហានស្រី។ លោកស្រី Rina Gonoi បានដាក់ពាក្យបណ្ដឹងអំពីករណីបៀតបៀនផ្លូវភេទលើរូបលោកស្រីទៅក្រសួងការពារជាតិកាលពីឆ្នាំ២០២១ ។ អតីតយោធារូបនេះ និយាយថា ខ្លួនបានរងការចាប់បង្ខំជាច្រើនដងដោយមិត្តរួមការងារប្រុសជាច្រើននាក់ ទើបសម្រេចចិត្តបោះបង់ការងារក្នុងជួរយោធា។
ក្នុងចំណោមទាហានទាំង ៥នាក់ដែលត្រូវបណ្តេញចេញពីកងទ័ព មាន៤នាក់បានសារភាពទោសកំហុសខ្លួន និងបានសុំទោសជនរងគ្រោះកាលពីខែតុលាកន្លងទៅ។ ចំណែកម្នាក់ទៀតនោះត្រូវបានរកឃើញថាជាមេខ្លោងនៃអ្នកទាំង៤។
លើសពីនេះ ក្រសួងការពារជាតិទីក្រុងតូក្យូ បានពិន័យអ្នកពាក់ព័ន្ធ៤នាក់ទៀតដែរ។ ក្នុងចំណោម៤នាក់នោះ ម្នាក់ជាមេបញ្ជាការទ័ពនៅ Fukushima ដែលជាថ្នាក់លើលោកស្រី Gonoi។ មេបញ្ជាការទ័ព លោក Yoshihide Yoshida ត្រូវបានព្យួរការងាររយៈពេលប្រាំមួយខែព្រោះមិនបានបើកការស៊ើបអង្កេតរឿងក្ដីនេះឱ្យត្រឹមត្រូវ ខណៈដែលម្នាក់ទៀតត្រូវបានរងពិន័យចំពោះការបៀតបៀនដោយពាក្យសំដីទៅលើលោកស្រី Gonoi និងពីរនាក់ទៀតត្រូវបានរងពិន័យចំពោះការមិនខ្វល់ខ្វាយពីបញ្ហានេះ។
«ខ្ញុំសង្ឃឹមថាជនល្មើសទាំងបួននាក់ មិនថាទទួលទណ្ឌកម្មធ្ងន់ធ្ងរកម្រិតណាទេ សូមឱ្យពួកគេទទួលខុសត្រូវដោយស្មោះចេញពីចិត្ត។» លោកស្រី Gonoi បានសរសេរបែបនេះលើបណ្ដាញសង្គម Twitter ជាការឆ្លើយតបទៅនឹងវិធានការរបស់ក្រសួងនៅថ្ងៃទី១៥ ខែធ្នូ។ លោកស្រី Gonoi ក៏បានបន្ថែមផងដែរថា ខ្លួនបានទទួលព័ត៌មានអំពីទាហានរាប់សិបនាក់ផ្សេងទៀតដែលរងគ្រោះដោយការបំពានផ្លូវភេទនៅពេលបំពេញកាតព្វកិច្ច ហើយឪពុកម្តាយជាច្រើនលើកឡើងពីការព្រួយបារម្ភសុវត្ថិភាពកូនស្រីរបស់ពួកគេសនៅក្នុងជួរយោធា។
តាមរយៈរឿងក្ដីលោកស្រី Gonoi មន្ត្រីក្រសួងការពារជាតិជប៉ុនមួយរូបអះអាងក្នុងសេចក្តីថ្លែងការណ៍មួយថា ក្រសួងទទួលបានពាក្យបណ្ដឹងជុំវិញករណីបំពានផ្សេងៗក្នុងជួរយោធាចំនួន ១៤១៤ករណី។ លទ្ធផលបឋមនៃការស៊ើបអង្កេតទូទាំងក្រសួងឃើញថា ប្រហែល៨៤ភាគរយនៃពាក្យបណ្តឹងទាក់ទិននឹងការបំពានដោយប្រើអំណាច ខណៈដែលការបំពានផ្លូវភេទមានចំនួន១១៦ករណី៕
© រក្សាសិទ្ធិដោយ thmeythmey.com