មូលនិធិបរិស្ថាន Global Nature Fund (GNF) របស់អាល្លឺម៉ង់ នាទិវាដីសើមពិភពលោក (World Wertlands Day) កាលពីថ្ងៃទី២ ខែកុម្ភៈ បានចេញសេចក្តីប្រកាសព័ត៌មានដោយចាត់ទុកបឹងទន្លេសាប ជាបឹងដែលរងការគំរាមកំហែងខ្លាំងជាងគេប្រចាំឆ្នាំ២០១៦ ។
បឹងទន្លេសាប ត្រូវបានចាត់ទុកជាបឹងដែលសម្បូរធនធានមច្ឆាច្រើនជាងគេប្រចាំតំបន់អាស៊ីអាគ្នេយ៍ ប៉ុន្តែការបម្រែបម្រួលអាកាសធាតុ និងទង្វើរបស់មនុស្ស បានធ្វើឲ្យបឹងមួយនេះ កំពុងរងការគំរាមកំហែងយ៉ាងធ្ងន់ធ្ងរ។ នេះបើតាមសេចក្តីប្រកាសព័ត៌មានរបស់ មូលនិធិបរិស្ថាន Global Nature Fund (GNF) របស់អាល្លឺង ក្រោមកិច្ចសហការជាមួយអង្គការសម្ពន្ធភាពដើម្បីអភិរក្សធនធានជលផល (FACT)។
ជុំវិញការចាត់ទុកថា «បឹងទន្លេសាប ជាបឹងដែលរងការគំរាមកំហែងប្រចាំឆ្នាំ២០១៦» (Threatened Lake of the Year 2016: Tonle Sap Lake in Cambodia) មូលនិធិ GNF បានធ្វើបទសម្ភាសពិសេសជាមួយលោក ឱម សាវ៉ាត នាយកប្រតិបត្តិនៃអង្គការ FACT ដែលបានផ្តល់ភស្តុតាងផ្សេងៗទាក់ទងនឹងការរងគ្រោះរបស់បឹងមួយនេះ។