អន្តរជាតិ
ត្រាំ អញ្ជើញ Duterte ទស្សនកិច្ចនៅអាមេរិកដើម្បីពង្រឹងទំនាក់ទំនងឡើងវិញ
× ប្រធានាធិបតីអាមេរិក ដូណាល់ ត្រាំ បានអញ្ជើញប្រធានាធិបតីមាត់ឆៅ Rodrigo Duterte ទស្សនកិច្ចនៅរដ្ឋធានីវ៉ាស៊ីនតោននៅពេលខាងមុខ។ ការអញ្ជើញនេះ គឺជាសញ្ញានៃការវិលទៅរកភាពប្រក្រតីឡើងវិញនៃទំនាក់ទំនងសម្ព័ន្ធមិត្តចាស់វស្សាទាំងពីរ ដែលល្អក់កករនៅចុងអាណត្តិអតីតប្រធានាធិបតី បារ៉ាក់ អូបាម៉ា ។
បើទោះជាមមាញឹកដឹកនាំកិច្ចប្រជុំអាស៊ានក្ដី ប្រធានាធិបតីហ្វីលីពីន Rodrigo Duterte ក៏បានឆ្លៀតពេលនិយាយទូរសព្ទជាមួយប្រធានាធិបតីអាមេរិក ដូណាល់ ត្រាំ នៅយប់ថ្ងៃទី២៩ ខែមេសា។ ប្រធានាធិបតី ត្រាំ ក៏បានអញ្ជើញសមភាគី Duterte ទៅទស្សនកិច្ចនៅសេតវិមាន ដើម្បីជជែកពីសារសំខាន់នៃសម្ព័ន្ធភាពអាមេរិក និងហ្វីលីពីន។ ស្ថានភាពនៃទំនាក់ទំនងទ្វេភាគីរវាងអាមេរិក និងហ្វីលីពីន យ៉ាប់យ៉ឺនខ្លាំង ក្រោយលោក Duterte ឡើងកាន់តំណែងមក។
បើតាមសេចក្ដីប្រកាសព័ត៌មានរបស់សេតវិមាន ប្រធានាធិបតី ត្រាំ បានសន្ទនាតាមទូរសព្ទជាមួយប្រធានាធិបតី Duterte ប្រកបដោយភាពស្និទ្ធស្នាល និងបានជជែកលើបញ្ហាជាច្រើន។ សេចក្ដីប្រកាសព័ត៌មានដដែលបន្តថា លោក ត្រាំ កំពុងរង់ចាំឱកាសមកកាន់ហ្វីលីពីននៅខែវិច្ឆិកាខាងមុខ ដើម្បីចូលរួមកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធជាមួយបណ្ដាមេដឹកនាំអាស៊ាន និងដៃគូសន្ទនាជាច្រើនទៀត។
ចំណែកសេចក្ដីប្រកាសព័ត៌មានរបស់វិមានប្រធានាធិបតីហ្វីលីពីន ក៏បញ្ជាក់ដែរ លោក ត្រាំ បានលើកឡើងពីការគំរាមកំហែងមកលើសន្តិសុខរបស់អាស៊ីអាគ្នេយ៍ ជាពិសេសសកម្មភាពរបស់កូរ៉េខាងជើងតែម្ដង។ នៅមុនការសន្ទនាតាមទូរសព្ទនេះ ប្រធានាធិបតីហ្វីលីពីន ក៏បាននិយាយដែរថា លោក នឹងប្រាប់សមភាគីអាមេរិក កុំឲ្យជ្រលក់ដៃលេងជាមួយកូរ៉េខាងជើងឲ្យសោះ ព្រោះកូរ៉េខាងជើង ចង់កម្ទេចពិភពលោក ហើយលោកស្នើឲ្យលោក ត្រាំ អត់ធ្មត់ឲ្យបានច្រើនដែរ។
នេះ ជាការនិយាយទូរសព្ទលើកទី២ រវាងមេដឹកនាំទាំង២ ។ ការសន្ទនាតាមទូរសព្ទលើកទី១ ធ្វើឡើងក្រោយការទទួលជោគជ័យក្នុងការបោះឆ្នោតប្រធានាធិបតិរបស់លោក ត្រាំ ។ ទាំងលោក Duterte ទាំងលោក ត្រាំ សុទ្ធតែមានចំណុចដូចគ្នាជាច្រើនដូចជាការនិយាយស្ដីមិនសូវគិតច្រើន និង ការនិយាយរិះគន់អ្នកសារព័ត៌មាន។ ពេលខ្លះ លោក Duterte ត្រូវបានគេប្រសិទ្ធនាមជា «ដូណាល់ ត្រាំ» របស់អាស៊ីទៅទៀត។
ច្បាស់ណាស់ថា ការនិយាយតាមទូរសព្ទបែបនេះ ជាសញ្ញាល្អនៃទំនាក់ទំនងរវាងអាមេរិក និងហ្វីលីពីន។ កាលពីចុងអាណត្តិរដ្ឋបាលលោក បារ៉ាក់ អូបាម៉ា អាមេរិក បានរិះគន់ហ្វីលីពីនយ៉ាងខ្លាំងលើយុទ្ធនាការបង្ក្រាបគ្រឿងញៀនរបស់លោក Duterte ដែលសម្លាប់មនុស្សជាច្រើនពាន់នាក់។ ប៉ុន្តែ លោក Duterte បែរជាប្រើពាក្យមិនសមរម្យដាក់ប្រធានាធិបតីអាមេរិក និងបានគំរាមបញ្ចប់សម្ព័ន្ធភាពដ៏យូរអង្វែងទៀតផង៕
© រក្សាសិទ្ធិដោយ thmeythmey.com