ជាតិ
ប៉ូលីសអន្តោប្រវេសន៍ឃាត់ខ្លួនវៀតណាមខុសច្បាប់ចំនួន ១៣នាក់ក្នុងខណ្ឌចំការមន
×
ភ្នំពេញ៖ កម្លាំងសមត្ថកិច្ចនៃនាយកដ្ឋានអន្តោប្រវេសន៍ នៃស្នងការរាជធានីភ្នំពេញ បានចុះឃាត់ខ្លួនជនជាតិវៀតណាម ឆ្លងដែនខុសច្បាប់ចំនួន១៣នាក់ ក្នុងនោះ រួមមាន ស្រី្ត ៥នាក់ នៅក្នុងសង្កាត់ទន្លេបាសាក់ និងសង្កាត់ផ្សារដើមថ្កូវ ខណ្ឌចំការមន កាលពីរសៀលថ្ងៃទី១១ ខែមីនា ឆ្នាំ២០១៥ ។ នេះបើតាមការផ្សាយរបស់អគ្គស្នងដ្ឋាននគរបាលជាតិ។
បើតាមការផ្សាយរបស់គេហទំព័រព័ត៌មានប៉ូលីស ប្រតិបត្តិការឃាត់ខ្លួននោះ គឺអនុវត្តតាមដីការរបស់តុលាការ ចុះបង្ក្រាបជនជាតិវៀតណាម ដែលឆ្លងដែនចូលមកប្រទេសកម្ពុជាដោយខុសច្បាប់។
ប្រភពលើបានស្រង់សំដីមន្ត្រីការិយាល័យអន្តោប្រវេសន៍ នៃស្នងការរាជធានីភ្នំពេញ មកផ្សាយយ៉ាងដូច្នេះថា ជនជាតិវៀតណាមទាំងនោះ បានកាន់លិខិតឆ្លងដែនទេសចរណ៍ ប៉ុន្តែពួកគេបែរជាមកប្រកបរបរចិញ្ចឹមជីវិត និងដើរស៊ីឈ្នួលគេខុសច្បាប់ ទើបសមត្ថកិច្ចធ្វើការឃាត់ខ្លួនជាបន្តបន្ទាប់ ។
គេហទំព័រប៉ូលីសបានផ្សាយបញ្ជាក់ថា កម្លាំងការិយាល័យអន្តោប្រវេសន៍ បានចុះទៅឃាត់ខ្លួនស្ត្រីជនជាតិវៀតណាម ៣នាក់ នៅក្នុងហាងអ៊ុតសក់ តាមផ្លូវសុធារស សង្កាត់ទន្លេបាសាក់ ខណ្ឌចំការមន ។ ប្រភពដដែល បានបន្តផ្សាយថា បន្ទាប់ពីឃាត់ខ្លួន ស្ត្រីជនជាតិវៀតណាមបាន៣នាក់រួច សមត្ថកិច្ចបានបន្តទៅឃាត់ខ្លួនជន ជាតិវៀតណាមចំនួន ១០នាក់ផ្សេងទៀត ដែលលួចសម្ងំ ធ្វើជាកម្មករជួសជុលកង្ហា នៅផ្ទះជួសជុលកង្ហា ស្ថិតក្នុងសង្កាត់ផ្សាដើមថ្កូវ ខណ្ឌចំការមន៕
© រក្សាសិទ្ធិដោយ thmeythmey.com