ជាតិ
នយោបាយជាតិ
លោក ហ៊ុន សែន ថា CNRP ប្រមូលថវិកាបង្កើតទូរទស្សន៍ ដើម្បីផ្គត់ផ្គង់ចម្ការម្រេច
× ពីពិធីប្រកាសផ្សព្វផ្សាយនិងដាក់ឲ្យអនុវត្តគោលនយោបាយអភិវឌ្ឍវិស័យឧស្សាហកម្មកម្ពុជាឆ្នាំ២០១៥-២០២៥ នាព្រឹកថ្ងៃពុធនេះ នៅវិមានសន្ដិភាព លោកនាយករដ្ឋមន្ត្រី ហ៊ុន សែន បានរិះគន់ដំណើរការ ប្រមូលថវិកាសម្រាប់បង្កើតទូរទស្សន៍របស់គណបក្សសង្គ្រោះជាតិថា ការប្រមូលថវិកានោះ គឺដើម្បីយកទៅផ្គត់ផ្គង់ចម្ការម្រេច និងទុកចំណាយលើថ្លៃយន្ដហោះ ធ្វើដំណើរទៅក្រៅប្រទេសប៉ុណ្ណោះ។
សូមស្ដាប់សំឡេង៖
ឆ្លើយតបនឹងការរិះគន់របស់លោក ហ៊ុន សែន នេះ អ្នកនាំពាក្យគណបក្សសង្គ្រោះជាតិ លោក យឹម សុវណ្ណ ថា ថវិកាមូលនិធិបង្កើតទូរទស្សន៍របស់គណបក្សសង្គ្រោះជាតិ មិនដែលបាត់បង់នោះទេ សូម្បីតែមួយកាក់ ឬមួយសេន។ លោកថា ថវិកាដែលប្រមូលបាននោះ គឺគណបក្សមានហឹបសម្រាប់ទុកដាក់ថវិកា និងមានឯកសារច្បាស់លាស់សម្រាប់បញ្ជាក់ពីចំនួនទឹកប្រាក់ដែលប្រមូលបាន។
ថ្លែងប្រាប់សារព័ត៌មានថ្មីៗ អ្នកនាំពាក្យគណបក្សសង្គ្រោះជាតិរូបនេះ បានបញ្ជាក់យ៉ាងដូច្នេះថា៖«លោក ហ៊ុន សែន ចេះតែនិយាយ នេះជាទម្លាប់របស់គាត់ ទុកឲ្យប្រជាពលរដ្ឋជាអ្នកវិនិច្ឆ័យចុះ។ គាត់គួរតែគិតពីការបាត់លុយរបស់ជាតិ ដោយសារអំពើពុករលួយ ប្រសើរជាងមកគិតពីការប្រមូលមូលនិធិ បង្កើតទូរទស្សន៍របស់គណបក្សសង្គ្រោះជាតិ»។
គិតត្រឹមថ្ងៃទី២៥ សីហា គណបក្សសង្គ្រោះជាតិ ទទួលបានវិភាគទាន និងទុនវិនិយោគពីសប្បុរសជនជិត ៥០ម៉ឺន ដុល្លារអាមេរិកហើយ សម្រាប់គម្រោងទូរទស្សន៍ព្រះអាទិត្យ ក្រោយពីគណបក្សចាប់ផ្ដើមប្រមូល តាំងពីថ្ងៃទី២៥ ខែមិថុនា ឆ្នាំ២០១៥មក។ បើតាមគម្រោងបង្កើតទូរទ្សសន៍ព្រះអាទិត្យនេះ គណបក្សសង្គ្រោះជាតិត្រូវការប្រមូលវិភាគទាន និងទុនវិនិយោគចំនួន ៣លានដុល្លារ ដើម្បីសម្រេចគោលដៅដែលបានកំណត់ថាបុស្តិ៍ទូរទស្សន៍ថ្មីនេះ នឹងដំណើរការនៅចុងឆ្នាំ២០១៥ ។
© រក្សាសិទ្ធិដោយ thmeythmey.com