ជាតិ
ឧកញ៉ាម្នាក់ជាប់ឈ្មោះក្នុងបញ្ជីខ្មៅក្រសួងដែនដី ហើយនឹងមានបន្តបន្ទាប់ទៀត
× ភ្នំពេញ៖ ក្រសួងរៀបចំដែនដី នគរូបនីយកម្ម និងសំណង់ បានចុះឈ្មោះលោកឧកញ៉ា ឡោក ហ៊ួរ ចូលក្នុងបញ្ជីខ្មៅដោយរារាំងមិនឲ្យមានការលក់ ទិញ ឬផ្ទេរកម្មសិទ្ធិទៅអ្នកដទៃឡើយ។ នេះបើតាមការបញ្ជាក់របស់លោក សេង ឡូត អ្នកនាំពាក្យក្រសួងរៀបចំដែនដីនគរូបនីយកម្ម និងសំណង់។
លោក ឡោក ហ៊ួរ ត្រូវបានដាក់ចូលក្នុងបញ្ជីខ្មៅក្រសួង ក្រោយពេលលោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ព្រមានរៀបចំឈ្មោះបុគ្គលរំលោភដីធ្លី ពលរដ្ឋ ក្នុងបញ្ជីខ្មៅ ជូនសម្តេចនាយករដ្ឋមន្ត្រី ហ៊ុន សែន កាលពីថ្ងៃទី៦ ខែឧសភា កន្លងមក។
ក្រុមការងារក្រសួងដែនដី បានស្រង់ប្រសាសន៍លោក ជា សុផារ៉ា យ៉ាងមុតមាំយ៉ាងដូច្នេះ៖«ខ្ញុំនឹងដាក់បញ្ចូលក្នុងបញ្ជីស្បែកខ្មៅ សម្រាប់ការស្នើចុះបញ្ជី ឬផ្ទេរកម្មសិទ្ធិដីធ្លី និងរាយការណ៍ជូនសម្តេច រាល់បុគ្គលណាដែលតែងតែមានករណីរំលោភយកដីរបស់ប្រជាពលរដ្ឋ ទោះឋានៈធំប៉ុណ្ណាក៏ដោយ»។
លោក សេង ឡូត បញ្ជាក់យ៉ាងខ្លីថា៖ «រហូតមកទល់ពេលនេះមានតែឯកឧត្តម ឡោក ហ៊ួរ ម្នាក់ទេ ដែលស្ថិតក្នុងបញ្ជីខ្មៅ។ ហើយក្រសួងនឹងបន្តចុះឈ្មោះបន្ថែមទៀត ប្រសិនបើបុគ្គលដទៃរំលោភបំពានដីធ្លីពលរដ្ឋ»។
សាធារណជនភាគច្រើន បានគាំទ្រវិធានការលោក ជា សុផារ៉ា ស្របពេលពួកគេសង្កេតឃើញ និងជួបប្រទះការរំលោភបំពានពលរដ្ឋពីសំណាក់មន្ត្រីមានអំណាចមួយចំនួន។ ទាំងអ្នកវិភាគ និងសាធារណជន កំពុងតាមដានមើលវិធានការនេះ ជឿជាក់ថា ក្រសួងចេញវិធានការនេះ ក្នុងគោលបំណងស្តារមុខមាត់រដ្ឋាភិបាល បច្ចុប្បន្ន ក្រោមការដឹកនាំរបស់ គណបក្សប្រជាជនកម្ពុជា៕
© រក្សាសិទ្ធិដោយ thmeythmey.com