ជាតិ
ភាពខុសគ្នារវាងតួនាទីប្រធានក្រុមមតិភាគតិច និងប្រធានក្រុមតំណាងរាស្ត្របក្សក្រៅរដ្ឋាភិបាលនៅរដ្ឋសភា
× បន្ទាប់ពីឯកឧត្តម កឹម សុខា ត្រូវបានរដ្ឋសភាប្រកាសទទួលស្គាល់តំណែងចំនួន ២ នៅក្នុងរដ្ឋសភា ធ្វើឲ្យប្រជាពលរដ្ឋមួយចំនួនងឿងឆ្ងល់ចំពោះភាពខុសគ្នានៃតំណែងពីរនេះ។ តំណែងចំនួន ២ ដែលឯកឧត្តម កឹម សុខា ទើបទទួលបាន គឺតំណែងជាប្រធានក្រុមមតិភាគតិចនៅក្នុងរដ្ឋសភាផង និងតំណែងជាប្រធានក្រុមតំណាងរាស្ត្រគណបក្សសង្គ្រោះជាតិប្រចាំរដ្ឋសភាផង។
បើតាមមាត្រា ៤៨ ថ្មី(បី) នៃបញ្ជាផ្ទៃក្នុងរដ្ឋសភា តំណែងជាប្រធានក្រុមមតិភាគតិច និងតំណែងជាប្រធានក្រុមតំណាងរាស្ត្រគណបក្សនយោបាយក្រៅរដ្ឋាភិបាល នៅរដ្ឋសភា មានលក្ខណៈ និងលក្ខខណ្ឌខុសគ្នា។
ទី ១ តំណែងជាប្រធានក្រុមតំណាងរាស្ត្រមតិភាគតិច
មាត្រា ៤៨ ថ្មី(បី) ពន្យល់ថា តំណាងរាស្ត្រដែលត្រូវកាន់តួនាទី ជាប្រធានក្រុមតំណាងរាស្ត្របក្សនយោបាយក្រៅរដ្ឋាភិបាល គឺជាតំណាងរាស្ត្រនៃគណបក្សនយោបាយ ដែលមានអាសនៈក្នុងរដ្ឋសភា ចាប់ពី ៥ ភាគរយឡើងទៅ ( ចាប់ពី ៤ អាសនៈឡើងទៅ) ។ ប្រធានក្រុមតំណាងរាស្ត្រនេះ ត្រូវរៀបចំថ្នាក់ដឹកនាំតំណាងរាស្ត្រនៃគណបក្សនយោបាយ តាមគណបក្សនយោបាយនីមួយៗ ហើយថ្នាក់ដឹកនាំតំណាងរាស្ត្រនៃគណបក្សនយោបាយ មានសមាសភាពយ៉ាងច្រើន ៣ រូប ដោយត្រូវមានប្រធាន ១ រូប។ ហើយបញ្ជីរាយនាមរបស់ថ្នាក់ដឹកនាំតំណាងរាស្ត្រនៃគណបក្សនយោបាយទាំង ៣ រូប ត្រូវផ្ញើជូនប្រធានរដ្ឋសភា។
-ភារកិច្ចរបស់ថ្នាក់ដឹកនាំតំណាងរាស្ត្រនៃគណបក្សនយោបាយក្រៅរដ្ឋាភិបាល
ទី ១ ថ្នាក់ដឹកនាំត្រូវធ្វើការដឹកនាំតំណាងរាស្ត្ររបស់គណបក្ស ដើម្បីធ្វើឲ្យការងារពាក់ព័ន្ធទាំងឡាយ បានប្រព្រឹត្តទៅស្របតាមកម្មវិធីនយោបាយ និងគោលការណ៍នានារបស់គណបក្ស។ ទី ២ ត្រូវ ធ្វើការសម្របសម្រួលជាមួយថ្នាក់ដឹកនាំតំណាងរាស្ត្រគណបក្សនយោបាយ ដែលមានអាសនៈក្នុងរដ្ឋសភា ដើម្បីធ្វើឲ្យការងារពាក់ព័ន្ធទាំងឡាយបានប្រព្រឹត្តទៅដោយរលូន និងធានាបាននូវផលប្រយោជន៍របស់ជាតិ និងប្រជាពលរដ្ឋ។ ហើយដើម្បីឲ្យថ្នាក់ដឹកនាំតំណាងរាស្ត្រនៃគណបក្សនយោបាយបំពេញតួនាទី បានរលូន រដ្ឋសភាពជាអ្នករៀបចំនូវមធ្យោបាយជូនថ្នាក់ដឹកនាំទាំងនោះ។ នេះបើតាមមាត្រា ៤៨ ថ្មី(បី) ដដែល។
ទី ២ តំណែងប្រធានក្រុមមតិភាគតិចនៅក្នុងរដ្ឋសភា
តំណែងនេះ សម្រាប់ប្រធានក្រុមតំណាងរាស្ត្រនៃគណបក្សនយោបាយក្រៅរដ្ឋាភិបាល ដែលមានអាសនៈក្នុងរដ្ឋសភា ចាប់ពី ២៥ ភាគរយឡើងទៅ (ចាប់ពី ២៨ អាសនៈឡើងទៅ) ត្រូវទទួលបានតំណែងជាប្រធានក្រុមមតិភាគតិច នៅរដ្ឋសភា។ នេះបើតាមមាត្រា ៤៨ ថ្មី(បី) នៃបទបញ្ជាផ្ទៃក្នុង។ ត្រង់ចំណុចនេះ មានន័យថា អ្នកតំណាងរាស្ត្រនោះ ទទួលតំណែងជាប្រធានក្រុមតំណាងរាស្ត្រនៃគណបក្សនយោបាយក្រៅរដ្ឋាភិបាលផង ជាប្រធានក្រុមតំណាងរាស្ត្រក្រៅគណបក្សនយោបាយផង។
-ភារកិច្ចរបស់ប្រធានក្រុមមតិភាគតិចនៅក្នុងរដ្ឋសភា
តំណែងជាប្រធានក្រុមមតិភាគតិចនេះ គជាជាគូសន្ទនាជាមួយនឹងប្រមុខរាជរដ្ឋាភិបាល ទាក់ទងទៅនឹងបញ្ហាប្រទេសជាតិ ហើយប្រធានក្រុមមតិភាគតិច មានឋានៈស្មើនាយករដ្ឋមន្ត្រី។
ជាការកត់សម្គាល់ បច្ចុប្បន្ននៅកម្ពុជា មានគណបក្សនយោបាយចំនួនតែ ២ ប៉ុណ្ណោះ ដែលទទួលបានអាសនៈនៅក្នុងរដ្ឋសភា គឺគណបក្សប្រជាជនកម្ពុជា និងគណបក្សសង្គ្រោះជាតិ។ បើផ្អែកតាមខ្លឹមសារនៃមាត្រា ៤៨ នេះ ប្រសិនបើនាពេលគណបក្សអនាគត កម្ពុជាមានគណបក្សនយោបាយទទួលបានអាសនៈនៅក្នុងរដ្ឋសភាចាប់ពី ៥ ភាគរយឡើងទៅ ច្រើនគណបក្ស នោះនៅក្នុងរដ្ឋសភា នឹងមានប្រធានក្រុមតំណាងរាស្ត្រគណបក្សនយោបាយក្រៅរដ្ឋាភិបាលច្រើន។ ហើយនៅពេលដែលកម្ពុជាមានប្រធានក្រុមតំណាងរាស្ត្របក្សនយោបាយក្រៅរដ្ឋាភិបាលច្រើន អ្នកទាំងនេះ ទំនងស្ថិតនៅក្រោមការដឹកនាំរបស់តំណាងរាស្ត្រប្រធានក្រុមមតិភាគតិច។ ជាពិសេសប្រធានក្រុមមតិភាគតិច ជាអ្នកយកមតិរបស់ប្រធានក្រុមតំណាងរាស្ត្រក្រៅរដ្ឋាភិបាល ទៅជជែកជាមួយនាយករដ្ឋមន្ត្រី៕
Tag:
រដ្ឋសភា
មតិភាគតិច
© រក្សាសិទ្ធិដោយ thmeythmey.com