សង្រ្គាមនៅអ៊ុយក្រែន មិនទាន់ចប់ឡើយ ដោយរុស្ស៊ីនៅតែបន្តវាយប្រហារលើអ៊ុយក្រែន​។ ក្នុងកាលៈទេសៈស្មុគស្មាញបែបនេះ វិមានក្រេមឡាំង បានប្រកាសថា វានឹងមិនមានសន្និសីទសារព័ត៌មានរវាងលោកវ្ល៉ាឌីមៀ ពូទីន ជាមួយអ្នកសារព័ត៌មាននៅមុនដំណាច់ឆ្នាំឡើយ។ នេះជាការលុបចោលលើកដំបូង បើគិតចាប់ពីលោកពូទីនចូលកាន់តំណែងចាប់ពីអំឡុងឆ្នាំ២០០០ មក។ 

 

«សម្រាប់សន្និសីទសារព័ត៌មានដ៏ធំ ពិតប្រាកដណាស់ វានឹងមិនកើតឡើងមុនឆ្នាំថ្មីឡើយ»។ លោក Dmitry Peskov អ្នកនាំពាក្យវិមានក្រេមឡាំង បានបញ្ជាក់បែបនេះ ទៅកាន់អ្នកសារព័ត៌មាន នៅថ្ងៃទី១២ ខែធ្នូ ដោយបន្តថា រុស្ស៊ីសង្ឃឹមថា លោកប្រធានាធិបតីនឹងស្វែងរកឱកាសមួយ ដើម្បីជជែកជាមួយអ្នកសារព័ត៌មាន។ 

 

ជារៀងរាល់ឆ្នាំ លោកពូទីនតែងមានជំនួបជាមួយអ្នកសារព័ត៌មាន ជាច្រើនម៉ោង ដើម្បីជជែកពីបញ្ហាក្នុងស្រុក ក៏ដូចជាគោលនយោបាយការបរទេស។ នៅឆ្នាំ២០២១ អ្នកសារព័ត៌មានក្នុងស្រុក និងបរទេសប្រមាណ ៥០០នាក់ ត្រូវបានអញ្ជើញឱ្យចូលរួមក្នុងសន្និសីទសារព័ត៌មានប្រចាំឆ្នាំ៕