តាមរបាយការណ៍របស់ក្រសួងការពារជាតិតៃវ៉ាន់នៅថ្ងៃទី២៦ ខែធ្នូ ការលុកលុយរបស់ទ័ពអាកាសចិននេះរួមមានយន្តហោះចិន៤៣គ្រឿងឆ្លងកាត់ខ្សែបន្ទាត់ខណ្ឌចែកទឹកដីមិនផ្លូវការរវាងតៃវ៉ាន់ និងចិនដីគោក។ ក្រសួងការពារជាតិតៃវ៉ាន់បន្ថែមថា យន្តហោះចិនទាំងនោះភាគច្រើនជាយន្តហោះចម្បាំងដែលឆ្លងកាត់តំបន់រសើបនៅច្រកសមុទ្រតៃវ៉ាន់នេះមួយភ្លែតមុនហោះទៅចិនវិញ។

 

បើទោះមិនបង្កហានិភ័យដល់កោះមួយនេះ ទីភ្នាក់ងារព័ត៌មានតៃវ៉ាន់ CNA រាយការណ៍នៅថ្ងៃទី២៦ ខែធ្នូ ថា វាជាការលុកលុយរបស់កងកម្លាំងទ័ពអាកាសចិនដ៏ធំបំផុតមកទល់បច្ចុប្បន្នដែលបង្ហាញពីសម្ពាធកើនឡើងជាបន្តបន្ទាប់របស់ចិននៅប៉ុន្មានឆ្នាំចុងក្រោយនេះ។ 

 

ជុំវិញបញ្ហានេះ នាពិធីយោធាមួយនៅព្រឹកថ្ងៃដដែល ប្រធានាធិបតីតៃវ៉ាន់ លោកស្រី Tsai Ing-wen បញ្ជាក់ជាថ្មីពីតម្រូវការបង្កើនសមត្ថភាពការពារជាតិសម្រាប់តៃវ៉ាន់ប្រឆាំងនឹងការពង្រីកនៃរបបផ្តាច់ការ។ 

 

«យើងត្រៀមខ្លួនបន្ថែមកាលណា ការប៉ុនប៉ងឈ្លានពានកាន់តែតិច។ យើងរួមរួបគ្នាកាន់តែខ្លាំងកាលណា តៃវ៉ាន់នឹងកាន់តែខ្លាំង និងមានសុវត្ថិភាព»។ ប្រធានាធិបតីតៃវ៉ាន់ លើកឡើងបែបនេះ។ 

 

មុននេះមួយថ្ងៃ ទីបញ្ជាការយោធាចិនភូមិភាគខាងកើត ប្រកាសថាយោធាខ្លួនបានធ្វើសមយុទ្ធបាញ់ប្រហារ និងល្បាតប្រុងជើងការប្រយុទ្ធនៅដែនសមុទ្រ និងដែនអាកាសជុំវិញកោះតៃវ៉ាន់ដើម្បីឆ្លើយតបទៅនឹងការបង្ករឿងរបស់អាម៉េរិក និងតៃវ៉ាន់។ ក្រុងតៃប៉ិប្រតិកម្មរឿងនេះថា ក្រុងប៉េកាំងកំពុងតែគំរាមប្រជាជនតៃវ៉ាន់ ហើយបំផ្លាញសន្តិសុខក្នុងតំបន់។

 

ចុងសប្តាហ៍មុន រដ្ឋាភិបាលលោក ចូ បៃឌិន ដែលតែងលក់អាវុធ និងផ្តល់ជំនួយយោធាដល់តៃវ៉ាន់ការពារខ្លួនពីចិន អនុម័តកញ្ចប់ថវិកាការពារជាតិសម្រាប់ឆ្នាំ២០២៣-២០២៧ ដែលក្នុងនោះមានជំនួយឥតសំណងសម្រាប់តៃវ៉ាន់១០ពាន់លានដុល្លារផងដែរ៕