ក្រសួងសុខាភិបាលវៀតណាមកំពុងបង្កើតគម្រោងអភិវឌ្ឍសេវាថែទាំសុខភាពតាមបច្ចេកវិទ្យាខ្ពស់ ដើម្បីរក្សាអ្នកជំងឺក្នុងស្រុក និងទាក់ទាញអ្នកជំងឺបរទេស ជាពិសេសទាក់ទាញជនជាតិវៀតណាមនៅរស់បរទេសឱ្យមកពិនិត្យ និងព្យាបាល។ បើតាមអ្នកជំនាញ អ្នកដែលប្រើប្រាស់សេវាវេជ្ជសាស្រ្តនៅវៀតណាមអាចកាត់បន្ថយការចំណាយបាន ពាក់កណ្តាល ឬមួយភាគបីបើធៀបប្រទេសដទៃទៀត។
មន្ទីរពេទ្យបង្អែកទាំង៥ ដែលជាមន្ទីរពេទ្យឈានមុខគ្រប់គ្រងដោយក្រសួងសុខាភិបាលវៀតណាម ដែលកំពុងតែកែលម្អនិងធ្វើឱ្យប្រសើរឡើងមាន មន្ទីរពេទ្យ Bach Mai, Viet Duc និង 108 Central Military នៅរដ្ឋធានីហាណូយ ខណៈមន្ទីរពេទ្យ Cho Ray នៅទីក្រុងហូជីមិញ និងមន្ទីរពេទ្យ Hue Central នៅខេត្តភាគកណ្តាលវៀតណាម។ នេះបើយោងតាមសារព័ត៌មានវៀតណាម Vietnamnet ។
ក្រសួងសុខាភិបាលវៀតណាមរំពឹងថា កំណែទម្រង់នេះនឹងជួយកាត់បន្ថយចំនួនជនជាតិវៀតណាមដែលត្រូវការទៅព្យាបាលនៅបរទេស ក៏ដូចជាទាក់ទាញអ្នកជំងឺបរទេសមកមន្ទីរពេទ្យផងដែរ។
លើសពីនេះ ក្រសួងក៏បានស្នើឱ្យវិនិយោគលើមន្ទីរពេទ្យទូទៅ និងឯកទេសកម្រិតខេត្តចំនួន ៤៧ ដើម្បីធ្វើជាកន្លែងថែទាំសុខភាពក្នុងតំបន់ ជាពិសេសតំបន់កណ្តាលខាងជើង និងតំបន់ភ្នំ តំបន់ដីសណ្ដទន្លេក្រហម និងតំបន់ភាគអាគ្នេយ៍ដែលមានដង់ស៊ីតេប្រជាជនខ្ពស់។
បើតាមសាស្ត្រាចារ្យជំនួយបណ្ឌិត លឿង ង៉ុកឃ្វេ នាយករដ្ឋបាលសេវាវេជ្ជសាស្រ្តរបស់ក្រសួងសុខាភិបាល គុណសម្បត្តិមួយនៃការថែទាំសុខភាពរបស់វៀតណាម គឺការចំណាយទាបជាងប្រទេសក្នុងតំបន់ ក៏ដូចជាពិភពលោក ខណៈដែលគុណភាពនៃការព្យាបាលមិនលើសគ្នាប៉ុន្មានោះទេ ។
វេជ្ជបណ្ឌិតវៀតណាម ជាពិសេសនៅមន្ទីរពេទ្យបង្អែកថ្នាក់ជាតិបានសិក្សាយ៉ាងស្ទាត់ជំនាញនូវបច្ចេកទេសទំនើបៗ និងឯកទេសជាច្រើនដូចជា ការប្តូរសរីរាង្គ ការប៉ះធ្មេញ ការព្យាបាលជំងឺដាច់សរសៃឈាមខួរក្បាល ការវះកាត់កាំរស្មីអ៊ិច ការព្យាបាលជំងឺមហារីក ការវះកាត់សរសៃឈាមបេះដូង ការជំនួសសន្លាក់ត្រគាក និងជង្គង់ និងការព្យាបាលសាច់ដុំ ...។
លោក ង៉ុកឃ្វេ កត់សម្គាល់ឃើញថា ៖« ការវិវឌ្ឍផ្នែកបច្ចេកវិទ្យាវេជ្ជសាស្រ្ដបានទាក់ទាញជនជាតិវៀតណាមនៅបរទេសជាច្រើនឱ្យត្រឡប់មកប្រទេសវិញដើម្បីទទួលការព្យាបាល សូម្បីជនបរទេសក៏មានការកើនឡើងក្នុងមន្ទីរពេទ្យធំៗមួយចំនួនក្នុងរយៈពេលប៉ុន្មានឆ្នាំចុងក្រោយនេះ»។
លោក ង៉ុកឃ្វេ បន្ថែមថា វេជ្ជបណ្ឌិតវៀតណាមអាចប្តូរសរីរាង្គបេះដូង ថ្លើម សួត តំរងនោម លំពែង និងពោះវៀន ជាពិសេសជំនាញលើបច្ចេកវិទ្យានៃការវះកាត់កាំរស្មីអ៊ិច វះកាត់សរសៃឈាមបេះដូង ប៉ះនិងពត់ធ្មេញ ដែលអាចកាត់បន្ថយបានពាក់កណ្តាល ឬមួយភាគបីនៃតម្លៃបើធៀបនឹងប្រទេសផ្សេងទៀត ។
ទាក់ទងនឹងការថែទាំសុខភាពឯកទេស ទីក្រុងហូជីមិញគឺជាតំបន់ឈានមុខគេក្នុងប្រទេសក្នុងការអភិវឌ្ឍន៍វិជ្ជាជីវៈ និងបច្ចេកទេស ជាមួយនឹងការអនុវត្តប្រកបដោយជោគជ័យនូវបច្ចេកទេសពិបាកៗជាច្រើនក្នុងការព្យាបាលជម្ងឺដ៏កាចសាហាវ ដូច្នេះអ្នករស់នៅទីក្រុងទទួលបានលក្ខខណ្ឌថែទាំសុខភាពល្អបំផុតនៅក្នុងប្រទេស។ នេះបើតាមការអះអាងរបស់លោក ង៉ុកឃ្វេ ។
ទីក្រុងហូជីមិញ បានក្លាយជាគោលដៅសម្រាប់ពិនិត្យសុខភាព និងព្យាបាលប្រជាជនមកពីប្រទេសជិតខាង។ បើតាមលោក ង៉ុកឃ្វេ ក្រសួងសុខាភិបាលកំពុងបង្កើតគម្រោងអភិវឌ្ឍការថែទាំសុខភាពតាមបច្ចេកវិទ្យាខ្ពស់ មិនត្រឹមតែរក្សាអ្នកជំងឺក្នុងស្រុកប៉ុណ្ណោះទេ ថែមទាំងទាក់ទាញជនបរទេស និងជនជាតិវៀតណាមនៅឯបរទេសមកវៀតណាម ដើម្បីធ្វើការពិនិត្យ និងព្យាបាលផងដែរ។
បើតាមសារព័ត៌មានចិន Xinhua ប្រជាជនវៀតណាមបានចំណាយប្រហែល ២ពាន់លានដុល្លារដើម្បីធ្វើដំណើរទៅក្រៅប្រទេសសម្រាប់សេវាវេជ្ជសាស្រ្តក្នុងឆ្នាំ ២០១៧ ដែលភាគច្រើនទៅសិង្ហបុរី ថៃ និងកូរ៉េខាងត្បូង៕